VOV4.M'nông: Lôch nuh srê COVID-19 ntưp rêng jŏ jong dơi rngơt rngăt, ăp nar mhe aơ, ta n'gor Dak Lak hŏ năl geh rnoh nuĭh ntưp njrăng n'gang COVID-19 hao âk. Kơp êng tâm 20 nar mhe aơ, n'gor hŏ năl geh bơi 600 nuĭh. Rnoh nuĭh ntưp hao ngăch tâm rnôk rnoh âk nuĭh chuh vaccine njrăng n'gang COVID-19 mô hŏ tât geh rđĭl đah rnoh ma Bộ y tế ndơ̆ luh hŏ ƀư pah kan njrăng n'gang COVID-19 ta Dak Lak mâp âk jêr jŏt. N'gâng kan dak si Dak Lak mbra nkra nău dja mhâm ƀư? Phóng viên Radio nău ngơi Việt Nam geh nău ôp wa Nay Phi La, Giám đốc Sở y tế n'gor Dak Lak mpeh nkô̆ dja!

- Hơi wa dăn may an  gĭt mpeh nău tât bah njrăng n'gang COVID-19 ta n'gor Dak Lak mhe aơ nơh mhâm mêh wa?

Wa Nay Phi La: “Ta n'gor Dak Lak tât nar 12/9 lĕ rngôch rnoh nuĭh ntưp COVID hŏ hao âk, aƀaơ hŏ geh 578 nuĭh. Rnoh nuĭh ntưp hao âk mhe aơ geh tă bah âk nkô̆, bôk năp bol hŏ an chuh vaccine n'glai 4 nkah tay ndrel bah meng nê geh du rnoh đêt oh mon lôch geh ntưp COVID-19 ri mô hŏ chuh du n'glai vaccine đêt. Lơn lah đah bu kuâng lôch rnôk chuh 3 n'glai mĭn lah he mbra dơi chŏl hôm n'hanh rnôk mô dơi chuh n'glai tâl 4 ri rnoh ntưp COVID  ta nuĭh hŏ hao âk. Aơ lah nkô̆ nău dŭt rvê yor nău gĭt êng bah nuĭh ƀon lan tâm nău chuh vaccine ta rnôk dja."

- Ơ, he mbra dơi saơ lah, tâm rơh njrăng n'gang COVID-19 ri vaccine lah ndơ rdâng lơh khlay, yơn lah tĭng nchih rgum bah Sở y tế ri rnoh âk nuĭh ƀon lan ntơm bah 18 năm deh let lơ chuh vaccine njrăng n'gang COVID-19 n'glai 3 geh 86% n'hanh n'glai 4 geh rlău 66%. Kon se ntơm bah 12 tât 17 năm deh, chuh n'glai 3 geh  68% n'hanh kon se ntơm bah 5 năm deh tât bah dâng 12 năm deh chuh n'glai 1 geh bơi 90% n'hanh n'glai 2 geh 45%. Rnoh dja hôm đêt rđĭl đah quy định bah Bộ y tế, ndrĭ trong ƀư gay n'hao rnoh âk nuĭh chuh vaccine njrăng n'gang COVID-19 tâm let năp tay lah moh ndơ mêh wa?

Wa Nay Phi La: “Ta năp nô nău nê ri Bộ y tế hŏ rgŏ  jă trong kan “Yor du Việt Nam nâp dăng n'hanh ngăch uĕh n'hâm suan nsum mpôl tâm ban kơt lam lĕ rngôch rêng kan, ri n'gâng kan dak si hŏ rdâk  njêng du trong nchrăp tâm nchră mbra kan nsum đah Sở giáo dục bah n'gor Dak Lak tâm ban kơt lĕ rngôch ăp nkuâl tâm ban kơt nău lăp kan bah lam trong kan chính trị. Tĭng trong nchrăp nar 24/9 dja UBND n'gor mbra ƀư Rơh rgŏ jă Trong kan nkoch trêng njrăng n'gang COVID-19 tâm nô nău mhe đah nkô̆ "Yor du Việt Nam nâp dăng n'hanh ngăch uĕh n'hâm suan" n'hanh chuh vaccine njrăng n'gang COVID-19 an kon se. Ndrel đah nê, n'gâng kan dak si mbra an chuh lĕ rngôch tât ăp ntŭk nhih nti rnôk ăp mon său hăn nti gay đăp mpăn ăp mon său tât ăp tŏng vaccine n'hanh geh rnoh chuh âk “Yor du Việt Nam nâp dăng n'hanh ngăch uĕh n'hâm suan".

- Hơi wa, ta năp nô nău nuh srê COVID-19 tât krit nji, rnôk lam dak hŏ năl geh rnoh âk nuĭh ntưp n'hanh nău ntoh âk ntil kaman njêng săk mhe SARS-CoV-2, mhe aơ nơh, Bộ Y tế hŏ mbơh gĭt lor trong njrăng n'gang COVID-19 tâm nô nău mhe nê lah nău mbơh gĭt lor 2K, ndrĭ nău mbơh gĭt lor dja moh geh ntil mhe rđĭl đah ăp nău mbơh gĭt lor bah năp nê nơh mêh wa?

Wa Nay Phi La: “Nău 2K ta aơ nê lah puh nkhĭt kaman n'hanh bok put mbung ri nchâp đă đah ăp nuĭh mĭn geh ntưp rnôk he hăn tâm ăp ntŭk geh âk nuĭh kơt chợ mô lah ntŭk krŭl lhăt nuĭh ri ân wăn bok put mbung da dê n'hanh puh nkhĭt kaman. Ndrel bah meng nê ân n'hao chuh âk vaccine, vaccine ri he hŏ an chuh hôm n'hanh tâm ban kơt dak si n'hanh săm ji đŏng ri nău dja lĕ rngôch ăp nhih dak si, ăp trung tâm y tế hŏ nchrăp ăp tŏng ăp ntil dak si rnôk geh nuĭh ji COVID n'hanh ngoăy tâm ăp ntŭk dŭt khlay lah nău gĭt êng bah nuĭh ƀon lan, bol ma he hŏ rlău rơh dŭt duh hô nuh srê yơn ân đăp mpăn dơi rnoh âk chuh vaccine tâm ban kơt tĭng ƀư ăp nău dăn đă bah Bộ y tế ri he mơ rdêl bah lĕ rngôch nuh srê COVID-19.”

• Ơ dăn lah uĕh wa!

Nuĭh rblang: Điểu Thân