Hăn bơi 40km hăn siêu thị ta nkual ƀon têh Buôn Ma Thuột gay rwăt ndơ Tết, yuh Võ Thị Diệu Hương ta nkuăl Krông Pách an gĭt, ơm ŭch yuh hăn ngai gay năp rwăt Tết yor mô hŏ đăp mpăn đah ndoh ndơ tăch ntoh lư ta bah dih:

Ndoh ndơ tâm siêu thị pơng âk uĕh ntil lơn đah pơng dơh đŏng yor păng ta du ntŭk he dơi rgum rwăt geh âk lơn. Đah hăn siêu thị saơ đăp mpăn lơn mpeh uĕh kah ndoh ndơ yor bah dih âk rnôk klach ndơ ntoh lư đah ndơ rlăm jêng săch rwăt ndơ ta siêu thị lơn.

Ơm đŏng hăn rwăt năp du đêt ndơ Tết, yuh Nguyễn Thị Mai Hương ta phường Ea Tam, nkual ƀon têh Buôn Ma Thuột an lah, rnôk aơ geh âk nar săch, uănh nđôi ndoh ndơ uĕh lơn, dêr rwăt ăp ndơ mô uĕh nâp:

Đah ntŭk tăch ndoh ndơ Tết gâp saơ âk n’hanh âk ntil, rnoh khlay ri âk ntil bah thuk tât khlay. Rnoh an săch ndoh ndơ bah rnăk wâl gâp năm aơ ri rup ntô uĕh n’hanh hăn ndrel đah uĕh nâp. Gâp mpŏng ăp ngih pah kan dơi kan uănh năl nău răk đăp mpăn ndơ sông sa âk lơn gay mpôl hên đăp mpăn.

Rhŏ an rơh Tết Nguyên Đán Giáp Thìn năm aơ, ăp doanh nghiệp, nuĭh tăch ta lam n’gor Dak Lak lĕ nchrăp ndoh ndơ, ký ton đah ăp nuĭh pă tăch nsing nơm gay tŏng ăp uĕh kah. Yuh Nguyễn Thị Em, nuĭh tơm ntŭk tăch ndoh ndơ ta trong Nguyễn Tất Thành, phường Tân Lợi, nkual ƀon têh Buôn Ma Thuột an gĭt:

Lah nsum ndoh ndơ gâp nsing nơm đŏng ta ntŭk tăch têh hôm jêng nglăp ndoh ndơ na nê̆, moh ndơ nsing nơm uĕh nâp, geh ntô lĭr na nê̆ mư nglăp, rnôk aơ tâm rlong siêu thị hôm  bách hóa pơk âk ir jêng gâp an nsing nơm uĕh kah ri mư dơi wăch rgum năch tât an he.

Gay tŏng ăp đăp mpăn tâm rơh bah năp, tâm n’hanh bah kơi Tết Nguyên đán, n’gor Dak Lak lĕ đă ăp ngih pah kan mât uănh n’hao trong kan tŏng ăp đăp mpăn ndơ ngêt sa, n’hanh ntĭm rđău ăp ntŭk kan, ƀon lan an mbơh ƀư uănh nđôi, rmal nău nkra njêng, tăch ndơ rlăm, mô uĕh. Ăp nău ƀư nkoch mbơh dơi n’gor ntrôl dăng gay kơl nuĭh nkra njêng, nkret gâm, tăch ndơ wât lĕ nău kan tâm nău mât đăp mpăn ndơ sông sa, nkre kơl nuĭh dŏng wât gay dơi rwăt ndơ đăp mpăn tŏng ăp n’hâm soan. Wa Hoàng Văn Nghĩa, Groi chánh thanh tra N’gâng kan tuch tăm mât rong n’hanh Hun hao ƀon lan n’gor Dak Lak an gĭt:

Mpôl hên uănh khlay uănh nđôi ăp ndơ dŏng an Tết Nguyên đán êp tât kơt ăp ntil ndơ bia, ndrănh, ƀănh kĕo, poăch n’hanh ăp ndơ bah poăch, biap bum, play. Tă bah nău uănh nđôi ngăch saơ ăp nău ƀư tih mpeh nău ntrŭnh đăp mpăn ndơ ngêt sa n’hanh mpôl hên nsrôih mkra rjăp ăp nuĭh tih. Tă bah nău uănh nđôi ri nkoch trêng an ăp ntŭk nkra njêng tăch rgâl ăp ntil ndơ ngêt sa bah ndơ ntŭk luh an tât ndơ tăch an đăp mpăn tĭng trong way ƀư 1 trong tĭng nău ntrŭnh mpeh đăp mpăn ndơ ngêt sa.

Nău lăp dŭt n’hâm bah nău kan dơi kan lah nkô̆ nău găy đăp mpăn ndơ ngêt sa rơh Tết êp tât. Bôl ndrĭ, nuĭh ƀon lan an ƀư tĭng ăp nău đă bah ăp ngih pah kan dơi kan, geh nău săch uĕh, knŭng rwăt n’hanh dŏng ndơ geh tu tơm, nkra njêng na nê̆, uănh na nê̆ lĕ nar dŏng, nu nău mbơh ta ndơ.