VOV4.M’nông: Lơ 24/8, UBND n’gor Dak Nông ƀư nau rƀŭn “Rgă jă chuh vắc xin njrăng srê Covid-19” năm 2022. Tĭng nau mbơh tâm nar rƀŭn, tât rnôk aơ hŏ geh rlau 87% rnoh nŭih rlau 18 năm tâm Dak Nông geh chuh 3 nglai vắc xin njrăng srê Covid-19, ndrel aơ lah n’gor geh rnoh nŭih chuh vắc xin Covid-19 ueh ngăn tal 6 bah lam dak. Yơn lah, nau chuh vắc xin Covid-19 tâm âk ntŭk tâm Dak Nông dôl ma nsrŭng, ngăn lah chuh nglai 2 ân kon se ntơm 5 tât tâm dâng 12 năm, nglai 3 ân kon se ntơm 12 năm tât tâm dâng 18 năm.

Tâm nau rgŏ jă, UBND n’gor Dak Nông đă ăp ntŭk kan tâm lam n’gor n’hao nuih n’hâm kan, rgum rmôt ƀư ngăch nau chuh dak si tŏng nglai ân kon se ntơm 5 năm tât tâm dâng 12 năm, đăp mpăn ƀư ân jêh tâm khay 8 aơ, nsôih ƀư jêh ơm ngăn nau chuh nglai 4 ân kon se ntơm 18 năm hao gŏ lơ ndrel ntrŭt dăng nau chuh nglai 3 ân nŭih ntơm 12 năm tât tâm dâng 18 năm tĭng nau ntĭm bah N’gâng kan dak si ndrel đăp mpăn nau chuh n’gang./.

Nŭih rblang: H’Thi