Tĭng nau mbơh bah ơm, yuh Nguyễn Thị Diễm Thương, thôn Dak Kual 2, xã Dak Ndung leo kon bu ur bơi tât 6 khay gay ma tât ngih dak si xã chuh nglai 3 vắc xin 5 tâm 1 njrăng ăp nau ji bạch hầu, siăk, uốn ván, bại liệt ndrel ji klơm soh, viêm màng não yor kman Hib lơh. Yuh mbơh, nau hăn chuh tŏng ăp ri ma kon yuh geh ueh n’hâm soan:

            ‘Cán bộ ngih dak si mbơh nar ân gâp, ndrel ma bơi tât nar ri cán bộ kuăl gâp lor du nar gay ma hăn chuh.  Lah nsum kon se rnôk aơ păng êng ngăn rđil kăl e, ăp nau ji ri nơm mô dơi gĭt lor ôh ri ma nơm ân geh chuh njrăng rdâng lor ân kon nơm”.

            Kŏ kơt yuh Nguyễn Thị Diễm Thương, rnơm geh nkoch mbơh mpeh nau săk tam bah nau chuh n’gang, bol ma ngih ngai rđil ngih dak si, ndeh hăn mô geh, yơn yuh Thị Bân tâm thôn Bu N’drung, xã Dak Nsung, nkuăl Dak Nsong hôm hăn chuh ân tŏng, tâm di ân 3 nŭih kon păng:

            ‘Ân kon hăn chuh tŏng jêh aơ nơm bah oi nau rvê, lah nsum ri đăp mpăn nkre ro. 3 kon gâp kơp n’ăp ma mô geh ndeh ri kŏ hăn jâng gay ma chuh đŏng. Rnôk bŭn kŏ chuh đŏng, lah nsum lah tŏng lĕ ro”.

            Dak Nsong lah ngoai tâm ăp nkuăl hăn lor tâm nau chuh n’gang pơk hvi tâm Dak Nông. Tĭng wa Nguyễn Văn Sơn, Ngih dak si nkuăl Dak Nsong, gay ma pơk nau rnơm ân ƀon lan, ntŭk kan hŏ n’hao nau rđau đă bah ăp ngih dak si gay ma ntrŭt dăng nau nkoch mbơh n’hao nau gĭt, nkre ma kơp, ƀư nâp ăp nau dơi mpeh ntŭk ntu, ndơ dŏng, vắc xin, đăp mpăn nau chuh n’gang...Tâm ăp nar chuh, ngih dak si pă ân cán bôk tâm uănh tâm ăp ngih dak si ƀư tâm di nau chuh:

            ‘Ntơm bah dŭt năm phung hên hŏ tâm rgop ma ban thôn ntơm ƀư nau mêt uănh ăp kon se, tal bar lah uănh klơ ntŭk nchih nkah ri hên hŏ mât ƀư ueh dơi ăp nŭih. Tâm phần mềm geh nau mbơh kloh ri hên mbơh, du đê̆ nŭih dơi geh tât ri nơh, lah nŭih ma mô geh nau tiŏng mô lah geh nkô̆ nau êng êng ma mô dơi chuh ri mra jao ân nŭih kơl an ngih dak si bah thôn gay ma khân păng uănh nŭih nê geh tâm nkuăl đŏng lah mô gay ma ơm saơ ăp nŭih ê geh chuh mô lah chuh ê tŏng nglai gay ma chuh ntop ăp nŭih gay ma đăp mpăn ân kon se”.

            Wa Huỳnh Thanh Huynh, Groi Giám đốc N’gâng kan dak si Dak Nông mbơh, bol ma nkol rnôk chuh yor geh nau khuch bah srê Covid-19 tâm 2 năm rlau, yơn rnơm nau lăp kan ngăn bah lam ntrong kan dak si, nau tâm ban nuih n’hâm bah ƀon lan ri ma nau chuh n’gang pơk hvi bah n’gor geh nau dơi ueh. Lôch 9 khay bah năm 2022, rnoh geh chuh bah lam n’gor geh 705 nau nchrăp. Tâm 3 khay dŭt năm, n’gor nsôih geh 90% rnoh geh chuh ăp ntil vắc xin. Tĭng wa Huỳnh Thanh Huynh, rnôk aơ Dak Nông mât 150 ntŭk chuh ndrel mra leo ntop tay ăp ntŭk chuh êng lah ŭch. Ntŭk kan dak si nchrăp tŏng nŭih, ndơ dŏng ndrel dak si gay ma đăp mpăn nau chuh geh săk tam:

            ‘N’gâng kan dak si rđau ndrel jur tât ăp ngih dak si tâm dâng gay ma kơp uănh ăp nŭih gay ma tâm ban. Tal bar lah rnôk mêt uănh nŭih ri hên ndrel ma ngih dak si ndrel n’gâng kan mbơhg pă ntŭk chuh ân tâm di gay ma ƀon lan nơih ueh ngăn, kơp n’ăp ma nar chuh ân nơih ma khân păng, kơt lah du đê̆ nŭih tă luh bah mir tâm dŭt pơh ri hên tâm rgop nsum đah ăp nŭih geh bu rnơm tâm ƀon lan ndrel bonh đă oh nô dơi hăn chuh tâm ngih”.

            Nau nsôih tâm nau kan chuh n’gang pơk hvi tâm Dak Nông hŏ ăp nhoat n’hao prêh tâm nau mât chăm n’hâm soan, njrăng der dơi ăp nau tât bah srê nuih jâk jru ân ƀon lan, rgop nau n’huch oi nau khuch rnôk khám săm ji ân ăp ngih dak si./.