VOV4.M'nông: Ăp nkuâl tâm n'gor Dak Nông dôl ntrôl ngăch chuh n'glai 3 vaccine njrăng n'gang Covid-19 an nuĭh ƀon lan, n'hanh nchrăp mbra ƀư lôch jêh tâm khay 3 dja. Kơp tât kêng măng 9/3, lam n'gor Dak Nông hŏ chuh rlău 1,22 rkeh dĭng vaccine njrăng n'gang covid-19 an nuĭh ƀon lan. Tâm nê, n'gor  hŏ ơm ƀư lôch jêh chuh 2 n'glai vaccine an nuĭh ntơm bah 12 năm deh let lơ. Đah n'glai chuh vaccine tâl 3, n'gor mbra chuh an nklăp 90% rnoh nuĭh rlău 50 năm deh mô dăng chŏl nuh srê, nuĭh chuh vaccine Vero Cell, n'hanh chuh nkah tay geh 1/3 rnoh nuĭh ntơm bah 18 năm deh let lơ. Sở Y tế Dak Nông an gĭt, lah tŏng geh tơm vaccine tâm pă bah Bộ Y tế, n'gor nsrôih mbra chuh nkrum lam n'glai 3 tâm khay dja, n'hanh ngăch chuh n'gang covid-19 an rlău 94.000 kon se ntơm bah 5-11 năm deh. Tât ôi 9/3, lam n'gor Dak Nông hŏ năl geh 24.526 nuĭh ntưp covid-19, tâm nê lĕ rngôch hŏ săm bah; geh 43 nuĭh khĭt./.  

Nuĭh rblang: Điểu Thân