Tĭng di nău mbơh bâh ntơm, yuh Nguyễn Thị Diễm Thương, thôn Đăk Kual 2, xã Đăk Ndrung ndơ̆ kon bu ur bơi tât 6 khay tât ngih dak si xã gay ma chuh vacxin 5 tâm 1 njrăng ăp nău ji bạch hầu, siăk, sôt bih, rven n’hanh sôt klơm soh, sôt ntô rngok yor kaman Hib ƀư. Yuh an gĭt, nău chuh n’gang tŏng ăp jêng oh kon yuh têh kuăng ueh.

“Cán bộ n’gâng kan dak si mbơh nar chuh n’gang an kon gâp,nkre lah tât nar chuh rĭ cán bộ kuăl an gâp lor du nar gay ma hăn chuh n’gang. Uănh nsum oh kon se aƀaơ păng êng ngăn đah kăl e, ăp nău ji he mô dơi gĭt lor jêng lah chuh n’gang gay ma njrăng der an oh kon se”.

Tâm ban kơt yuh Nguyễn Thị Diễm Thương, bâh geh mbơh tơih mpeh săk rnglăy tâm ban kơt săk tam bâh chuh n’gang, jêng bol ma ngai ta ngih dak si, nău hăn nsong jêr, yơn lah yuh Thị Bân ta ƀon Bu ndrung, xã Dak Ndrung, nkuăl Dak Song hôm nha geh chuh n’gang tŏng ăp, di nar an 3 nuĭh kon.

“An oh kon chuh n’gang tŏng ăp let năp tay he mô geh nău rvê, uănh nsum lah dŭt đăp mpăn ngăn. 3 nuĭh kon gâp nđâp ma mô geh ndeh rĭ gâp hăn jâng leo hăn chuh n’gang. Bŭn chuh đŏng, gâp chuh n’gang da dê.

Dak Song lah ngoăy tâm âk ntŭk hăn bôk năp tâm nău kan chuh n’gang pơk hvi ta Dak Nông. Tĭng nău mbơh bâh wa Nguyễn Văn Sơn, ntŭk kan dak si nkuăl Dak Song, gay ma njêng nău knơm, ntŭk kan lĕ n’hao nău ntĭm đă ăp ntŭk kan dak si ntrôl dăng nău gĭt vât, nkre lah, uănh năl, ndâk nkra tay ăp nău nơih mpeh ndơ dŏng, nău pah kan, chuh vacxin, mât đăp mpăn an nău chuh n’gang...Tâm ăp nar chuh n’gang, ntŭk kan pă an cán bộ n’hao nău uănh nđôi ăp trạm ngih dak si ƀư tĭng di ntrŭnh chuh n’gang.

“Bâh ntơm dŭt năm mpôl hên lĕ tâm rgop đah ntŭk kan bâh thôn ƀư uănh nđôi ta ăp mom ndăm, tal bar lah uănh sŏk bâh phần mềm rĭ mpôl hên geh mât dŭt ueh bâh ăp nuĭh. Ta phần mềm nĕ geh nău mbơh na nê̆ rĭ mpôl hên tâm ôp, du đê̆ nuĭh geh tât sŏng dăng rĭ dơh nơih, hôm lah nuĭh i mô geh nău dơh nơih mô lah geh nkô̆ nău êng mô dơi tât ma ê hŏ geh chuh rĭ mbra đă y tế thôn gay ma đă khân păng uănh tay ăp nuĭh ta ntŭk geh ta nĕ đŏng lah mô gay ma ơm ngăch gĭt nuĭh mô hŏ chuh mô lah lĕ lôch chuh gay ma ƀư chuh ntop tay dâl ăp nuĭh gay ma mât njrăng ueh an oh kon se”.

Tĭng nău mbơh bâh ntŭk kan dak si n’gor Dak Nông, bol ma geh tăch proăt nău chuh n’gang yor nău tât bâh nuh srê Covid-19 tâm 2 năm ba năp, yơn lah bâh geh nău lăp kan răng dăng, dơn kan bâh lĕ trong kan dak si, nău tâm ban bâh nuĭh ƀon lan jêng nău geh dŭt ueh. Lĕ khay 9 năm 2022, rnoh chuh n’gang pơk hvi bâh n’gor geh tât 70% nău nchrăp. Tâm 3 khay dŭt năm, 150 ntŭk chuh n’gang kan du ntŭk n’hanh ăp ntŭk  lah geh ŭch mbra geh tât chuh an ƀon lan. N’gâng kan dak si lĕ nchrăp na nê̆ nău kan, nuĭh kan, ndơ kan n’hanh dak si gay ma mât đăp mpăn nău kan chuh n’gang geh săk rnglăy, đăp mpăn.

Knơm nău lăp dŭt n’hâm, lĕ nău kan bah lĕ trong dak si, tâm ban ŭch bah nuĭh ƀon lan jêng rnoh tŏng ăp vaccine tâm bôk nău kan pơk hvi bah n’gor Dak Nông geh săk rnglăy uĕh, nsrôih năm aơ mbra geh rnoh chuh vaccine rlău 90% let lơ. Nuĭh nchih nău an Đài TNVN geh rơh ôp wa Huỳnh Thanh Huynh, Groi kruanh n’gâng kan dak si n’gor Dak Nông.

- Ơi wa, dơi gĭt tâm khay 9 bah năp, Dak Nông lĕ chuh geh 70% rnoh tŏng ăp vaccine. N’hanh tâm âk khay dŭt năm, n’gor nsrôih geh rlău 90% rnoh tŏng ăp lĕ ntil vaccine. Gay dơi geh nău aơ, n’gor mbra mbơh ƀư m’hâm trong ƀư mêh wa ?

- Wa Huỳnh Thanh Huynh:  Mpôl hên geh nău ntrŭnh ndâk njêng du rmôt, nkô̆ nău khlay lah ntop kơl n’hanh ndơ̆ an trong mkra bôk năp; tal 1 lah tâm ban ŭch đah ăp ntŭk kơp uănh tay nuĭh tă bah rnôk rgâl ntŭk gŭ nuĭh ƀon lan aƀaơ đah nuĭh chuh m’hâm gay tâm ban ŭch. Tal 2 tay lah tâm pă ntŭk chuh tâm di. Ndrel đah nĕ mpôl hên đă đŏng đah ăp Viện bôk nău kan pă ơm vaccine tâm bôk nău kan gay nău kan dak si Dak Nông đăp mpăn rnoh tŏng ăp”.

- Tĭng wa jêr jŏt ngăn tâm trong kan ntrôl dăng chuh ta Dak nông aƀaơ moh ndơ ơi wa ?

- Wa Huỳnh Thanh Huynh:  “Nău jêr têh ngăn aƀaơ lah he nkre ƀư chuh vaccine njrăng Covid-19 gay dêr srê ntoh plơ̆ tay, lơn lah đah kon se n’hanh bu ur, jêng mpôl hên dôl geh âk trong ƀư n’hanh uănh nđôi tay, kơt ƀư trong nchrăp gay dêr tâm trŭp nglai tâm lvang chuh Civid-19 n’hanh vaccine tâm bôk nău kan chuh pơk hvi. Tal 2 tay yor ntŭk ntô Dak Nông dŭt êng, dŭt tâm ƀah geh du đêt gŭ nkual ƀon lan nuĭh kan dak si an hăn du nar gay ntĭnh nuĭh ƀon lan mư dơi tât ntŭk chuh rgum bah Ngih dak si xă. Bah meng nĕ yor nău way rêh nuĭh ƀon lan hăn gŭ tâm mir, nkre ma nĕ du đêt rnăk mô hŏ wât âk tâm nău chuh an kon se mô dah ăp nuĭh dơi chuh”.

- Ơ, kơt wa tâm nchră ri nău ƀon lan gŭ têh hvi, ntop tâm ƀah lah ngoăy tâm âk nău nking n’gang tâm nău mbơh chuh vaccine, ndrĭ n’gor m’hâm mkra ơi wa ?

- Wa Huỳnh Thanh Huynh:  Ta du đêt xă mpôl hên tâm pă du đêt ntŭk chuh ta Ngih dak si xă ma pơng tâm di. Ntơm bah srê Covid-19 ri ăp ntŭk hăn chuh dơi ƀư âk lơn n’hanh ngăch lơn, rlău ma ăp ntŭk chuh du ntŭk lĕ dơi N’gâng kan dak si uănh an ri N’gâng kan dak si nta an ăp ntŭk kan gay tŏng ăp nău kan, lah ntŭk khlay lor pơk ăp ntŭk chuh hăn ăp ntŭk ri jao an Kruanh Ngih dak si ăp nkuăl nkual ƀon têh dơn uănh tâm pă ăp ndeh rklư, nuĭh kan gay ntop kơl mbơh ƀư ăp ntŭk chuh. Ƀư tŏng klôn bêl mô ƀư lir lar lĕ nkuăl ri trong mkra nu nău geh jêr”.

- Ơ dăn lah uĕh wa Huỳnh Thanh Huynh !