Ăp nar bah năp Tết Nguyên đán lah rnôk hao ăp nău ƀư nkra njêng, tăch rgâl n’hanh tăch ndơ ngêt sa têh ngăn tâm năm gay rhŏ an nău ŭch ndơ bah nuĭh ƀon lan. Ăp ndơ geh rnoh tăch âk way lah ăp ndơ rih, ƀănh kĕo, mứt, ăp ntil grăp, ndrănh bia, dak njŭng, ăp ntil ndơ nkret gâm sĭn... Aơ lah rnôk geh âk nău khuch âk mô dơi đăp mpăn răk kloh uĕh ndơ ngêt sa yor ndơ rlăm, ndơ mô uĕh dơi tâm rlŭk gay tăch, ƀư khuch tât săk soan nuĭh dŏng. Wa Vũ Thị Gấm, Ntŭk tăch ndơ Thành Phát ta 80 Trần Nhật Duật, nkual ƀon têh Buôn Ma Thuột, Dak Lak an gĭt:

Gay rhŏ an rơh Tết Nguyên đán, ntŭk tăch mpôl hên lĕ nglăp âk ntil, uĕh ăp ntil ndơ âk ngăn lah ăp ntil ndơ ƀănh kĕo, mứt. Gay đăp mpăn ndơ ngêt sa, tâm di bôk năp lah săch tu tơm ndơ geh ntŭk nkra njêng ngăn lah ăp ntil ndơ ngêt sa n’hanh ƀănh. Đah ăp ndơ nkret gâm sĭn ta ntŭk, gay đăp mpăn mpôl hên dŭt uănh khlay ndơ ƀư bôk năp n’hanh nău uănh nđôi ntŭk luh jêh rnôk nkret gâm.

Hăn du đêt siêu thị, bah ntŭk tăch ta nkual ƀon têh Buôn Ma Thuột dơi saơ mông nar năp rwăt dŭt âk, rnoh ndơ âk ntil, rup gui, ntô lĭr, tu tơm nkra njêng. Nkual ƀon têh Buôn Ma Thuột lah ntŭk chính trị, wăng sa, rêh jêng bah n’gor jêng trong kan đăp mpăn ndơ ngêt sa dơi geh nău uănh mĭn ntĭm rđău bah n’gor ủy, UBND n’gor, ndrel đah nău lăp bah n’gâng kan ăp gưl, ăp rmôt, nsum mpôl.

Mĭn lor rơh Tết Nguyên đán, ndơ rlăm, ndơ mô gĭt tu tơm, nkra njêng dŭt dơh tâm rlŭk, dŏng ta ntŭk tăch, yor nê Ban ntĭm rđău ăp nău kan mpeh đăp mpăn ndơ ngêt sa n’gor Dak Lak lĕ n’gor ndâk njêng trong nchrăp n’hanh an ăp sam ƀŭt ntĭm rđău gay đăp mpăn ndơ sông sa tâm nkra njêng, nkret gâm, tăch rgâl n’hanh dŏng ndơ ngêt sa; n’hao uănh nđôi, nking n’gang ngăch nău nkra njêng, tăch rgâl ndơ rlăm, mô uĕh nâp; đăp mpăn nău dơi nuĭh dŏng; njrăng n’gang khih ndơ ngêt sa tâm rơh Tết Nguyên đán Giáp Thìn n’hanh Lễ hội Xuân 2024 ta n’gor. Trong kan uănh nđôi mbra ƀư tĭng geh nău khlay, rgu, tâm ăp ntil ndơ dơi dŏng âk tâm rơh Tết Nguyên đán n’hanh tâm ăp Lễ hội.

Tâm ban đah nău uănh nđôi nĕ lah ƀư uĕh trong kan nkoch trêng, ntĭm nti nău wât pháp luật mpeh đăp mpăn ndơ ngêt sa; mbơh ƀư uănh nđôi lor, tâm n’hanh bah kơi Tết n’hanh yan Lễ hội Xuân 2024, rnôk mbơh ƀư bah khay 12/2023 tât lĕ nar 20/3/2024 ta lam n’gor. Gưl n’gor ndâk njêng 3 mpôl uănh nđôi ăp nău kan mpeh đăp mpăn ndơ sông sa yor Thanh tra: N’gâng kan dak si, công thương, tuch tăm mât rong n’hanh hun hao ƀon lan ƀư tơm, ntơm uănh nđôi ta nkual ƀon têh Buôn Ma Thuột n’hanh 7 nkuăl: M’Đrăk, Krông Búk, Krông Năng, Ea H’leo, Krông Bông n’hanh Krông Ana; gưl nkuăl, xă: UBND ăp nkuăl, nkual têh, nkual ƀon têh ntĭm rđău ăp gưl geh tât ndâk ƀư trong nchrăp uănh nđôi mpeh đăp mpăn ndơ sông sa; ƀư ăp mpôl uănh nđôi ăp nău kan mpeh đăp mpăn ndơ ngêt sa gưl nkuăl n’hanh gưl xă gay ntơm uănh nđôi ăp ntŭk ndơ ngêt sa ta lam nkual mât uănh. Wa Hoàng Văn Nghĩa, Groi chánh Thanh tra N’gâng kan tuch tăm mât rong n’hanh Hun hao ƀon lan n’gor Dak Lak, Kruanh mpôl uănh nđôi ăp nău kan mrô 1 mpeh đăp mpăn ndơ sông sa năm 2024 mbơh :

Tâm rnôk uănh nđôi, mpôl ăp nău kan uănh khlay tâm ăp ndơ khlay rhŏ an rơh Tết Nguyên đán êp tât kơt ăp ntil ndơ ndrănh bia, ƀănh kĕo, poăch n’hanh ăp ndơ bah poăch, biăp, bum play. Tă bah nău uănh nđôi gay ngăch saơ ăp ƀư tih n’hanh nsrôih mkra rjăp ăp nău tih mpeh đăp mpăn ndơ ngêt sa. Tă bah nĕ, kơl an nuĭh dŏng ăp ndơ đăp mpăn uĕh nâp tât nuĭh dŏng.

Tă bah trong kan uănh nđôi gay uănh lah nău tĭng ăp nău ntrŭnh bah pháp luật mpeh đăp mpăn đah ăp ntŭk nkra njêng, tăch rgâl ndơ ngêt sa, ndơ rhŏ ngêt sa, ngăn lah ăp ntŭk nkra njêng, tăch rgâl ăp sông sa dơi dŏng âk tâm rơh Tết Nguyên đán n’hanh yan lễ hội năm 02024. Nkre, ngăch saơ, nking n’gang, rmal ăp nău tih mpeh đăp mpăn ndơ ngêt sa, n’hŭch khih ndơ sông sa n’hanh ăp nău ji ntưp bah ndơ ngêt sa; đă ăp trong n’hao tam, săk rnglăy mât uănh ngih dak mpeh đăp mpăn ndơ ngêt sa. Tâm rnôk uănh nđôi, lah saơ ntŭk geh tih mpeh đăp mpăn ndơ ngêt sa, Mpôl uănh nđôi mbra ƀư sam ƀŭt rmal tih hành chính, jêh sam ƀŭt rhăch nău, njuăl sam ƀŭt nu nău tât ngih pah kan dơi mkra an ƀư rmal tĭng nău ntrŭnh mô lah ngih pah kan cảnh sát uănh nđôi (lah geh nău ƀư tih hình sự); mô an ăp ndơ mô đăp mpăn, ndơ rlăm, mô gĭt tu tơm nkra njêng, tih mpeh ntô lĭr mô lah geh ăp nău tih êng mpeh đăp mpăn ndơ sông sa dŏng ta ntŭk tăch. Nai dak Lê Thị Châu, Chi cục trưởng Chi cục đăp mpăn ndơ sông sa n’gor Dak Lak an gĭt:

 Chi cục lĕ tâm ôp tâm nchră an N’gâng kan dak si, Ban ntĭm rđău n’gor n’hanh UBND n’gor lĕ an trong nchrăp mbơh ƀư trong đăp mpăn ndơ sông sa rơh tết Nguyên đán n’hanh yan lễ hội năm mhe ta lam n’gor. Tâm ôp tâm nchră ndâk ƀư ăp mpôl uănh nđôi ăp naư kan, nuĭh kan tơm khlay bah 3 nău kan geh tât tâm rgop gay ƀư uănh nđôi trong kan ƀư bah ăp nkuăl kơt uănh nđôi ăp ntŭk ndơ ngêt sa. Mpeh đah Chi cục, lĕ geh trong nchrăp n’hanh sam ƀŭt đă ăp ntŭk kan nkoch mbơh tâm rơh Tết. Pă ăp sam ƀŭt nkoch mbơh n’hanh ntĭm rđău ăp ntŭk kơp uănh tay ăp rmôt uănh nđôi njrăng n’gang khih ndơ ngêt sa n’hanh pă an kâp uănh. Ăp rmôt uănh nđôi mpeh khih ndơ ngêt sa mbra geh nău nchrăp mpeh ndoh ndơ, pă ndơ dŏng gay tâm di ngăch trong kan đăp mpăn tâm rơh tết rnôk geh nău mâp.

Gay đăp mpăn ndơ ngêt sa, njrăng dêr geh ăp nău khih ndơ ngêt sa khuch tât săk soan nuĭh dŏng, ndrel đah nău n’hao uănh nđôi bah ăp ngih pah kan dơi kan an âk lơn tay nău wât nchrăp ăp trong đăp mpăn ndơ ngêt sa tâm nkra njêng, tăch bah ăp nuĭh, rmôt kan nkra njêng n’hanh tăch ndơ ngêt sa. Du hê nuĭh ƀon lan mô lah nuĭh dŏng uĕh săch ăp ndơ sông sa kloh, geh tu tơm na nê̆, geh ntô lĭr mbơh nuĭh nkra njêng, njrăng rnôk rwăt ndơ nkret gâm sĭn, nkra njêng đah ty ta rnăk wâl, ndơ mpla tăch tă bah ăp trang mạng xã hội gay ăp rnăk wơt tết Nguyên đán đăp mpăn, răm m’ak, uĕh lăng.

Nau kan njrăng rdâng khih ndơ sa, mât đăp mpăn n’hâm soan tâm rnôk Tết năm mhe Giáp Thìn 2024

          Kơt mhe nkah, tâm ăp rnôk tết tât ndrel yan năm mhe vay rgum âk nŭih, ndrel ma nau rvê mô tŏng ndơ, ndơ hao khlay lah nau mât đăp mpăn ndơ ngêt sa geh ƀon lan njrăng. Yor ăp ntil ndơ mô kloh, mô nâp, mô gĭt tu tơm mra khuch ngăn tât n’hâm soan. Nau nchrăp ân nơm nau gĭt nkô̆ nau ƀư khih, ăp nau năl rnôk khih ndơ sa kŏ kơt lah nau săch ndơ sa, mât ndơ sa, ê nkra ndơ sa kloh ân rnăk vala tâm rnôk Tết tât, rmôt PV geh nau tâm nchră ma nai dai si Lê Thị Châu-Kruanh n’gâng kan mât đăp mpăn ndơ sa n’gor Dak Lak.    

          PV: Dăn nai dai si mbơh nkô̆ nau ƀư jêng khih ndơ sa?

          Nai dai dak si Lê Thị Châu: Tĭng nau kơp, năm 2023 nkô̆ ƀư khih ndơ sa tâm lam n’gor tâm năm 2023 rlau 50% lah yor nau tât êng. Nau khih êng vay mâp tâm ndơ sa geh ƀon lan hăn pĕ sêt sĭt gâm sa ndrel geh sa sêt khih, khih geh sa ndơ kơt lah kon se, sa ăp ntil reh si mô kloh tu tơm...Nê lah nkô̆ nau ƀư jêng ndơ khih êng. Êng nê, rnôk aơ, geh âk ngăn ne elah khih ndơ sa yor ăp ntŭk tăch ndơ ngêt sa, gâm sa. Đah ăp ntŭk ƀư gâm sa tâm di đê̆ ntŭk tăch rgâl ndơ ngêt sa ri hôm mô nâp tâm nau kan mât njrăng. Rnôk hăn gâm sa ri geh ndơ sa mô kloh tu tơm ndơ...mra lah ngoai tâm ăp nau ƀư tât khih. Tĭng nau kơp năm 2023, tâm n’gor geh du đê̆ ntil ndơ khih tâm ăp ntŭk ƀư nau kan tăch rgâl ndơ sa tâm ntŭk ƀư nau kan tăchm gâm. Di rnôk mât đăp mpăn ndơ sa tâm rnôk têt, ăp khay ba kơi tâm năm 2024 nkah ƀon lan rnôk ƀư ăp nar ngêt sa têh ân geh kí nau kan nsum ma ăp ntŭk geh bu rnơm, kí nau kan geh nau dơi gay đăp mpăn trong pháp lý kŏ kơt lah đăp mpăn nau dơi bah nŭih dŏng. Rnôk geh nau nchâp đă kan, ăp ntŭk pă tăch ndơ sa ân geh nau dơi đăp mpăn tu tơm ndơ sa. Kơt kơt nê, nau dơi bah tơm ntŭk kan, nŭih ƀon lan ndrel nau mêt uănh bah ăp ntŭk mât đăp mpăn ndơ ngêt sa tâm nkuăl, geh kơt ne mơ dơi n’huch oi nau khih dnơ sa đah ăp ntŭk tăch rai, jêr njrăng, ăp ntŭk gâm sa tâm trong hăn kơt rnôk aơ.

          PV: Dăn nai dak si mbơh ăp nau ndơn mpơl s aơ nau khih ndơ ngêt sa? Rnôk geh nau ntôn khh ndơ sa ri moh nau nơm ƀư ơi nai dak si?

          Nai dak si Lê Thị Châu: Nau mpơl saơ bah khih ndơ sa nsing tâm âk nkô̆ ngăn. Jêh rnôk sa, nkô̆ nau ƀư khih ndơ sa yor kman khih, vay mpơl ngăn kơt lah ƀư ji bôk, ŭch hok, ji ndul ndrel vay geh nau nê jêh rnôk jêh ngêt sa tâm đê̆ mông, hôm yor dak si ri mra geh ngăch lơn đŏng. Nau mpơl saơ rnôk geh nau khih ndơ sa chăt jêng êng ri  lah saơ ji bôk mra âk lơn. Nŭih geh khih sa vay ji bôk, vay măt, mô lah lêt êng săk, mô lah kn’hăk đŏng. Rnôk geh nau tât đah nau kan hên ri hên mra uănh gay ma năl kloh. Yơn lah, đah nŭih ƀon lan lah geh tâm rnăk vâl, êng săk mô lah tĭng rmôt rnôk geh ăp nau mpơl saơ nau khuch kơt nê ri ƀon lan ân geh mbơh ma ngih dak si dăch ngăn gay ngih dak si ntơm geh nau uănh năl ndrel mbơh ntĭm, lah khuch jâk mra leo tât ngih dak têh săm. Nau ƀư rklaih ngăch rnôk khih ndơ sa bol ma moh rnôk tât tâm rnăk vâl mô lah tâm moh ntŭk kŏ ân geh mbơh ma ngih dak si êp nê ngăn.

          PV: Nau ntĭm đă bah nai dai si ân nŭih dŏng sa ndơ tâm nau săch ndơ sa ân kloh, ân mâp n’hâm soan tâm rnôk Tết lah mhâm nau?

            Nai dak si Lê Thị Châu: Tết tât, năm mhe tât ri geh âk ntil ndơ ngêt sa ndrel nau ŭch ngêt sa bah nŭih ƀon lan kŏ âk, ngăn lah ăp ntil ndơ sa kơl an tâm rnôk tết, Gay đăp mpăn nau dơi ân ƀon lan dŏng ndơ, nŭih ƀon lan ân rvă ndrel sa ndơ geh tăch kloh tu tơm n’hêl. Nŭih ƀon lan nơm mô dơi têm âk ir ndơ sa tâm rnôk tết. Lah têm âk ir ndơ sa mô đăp mpăn mra geh nau khuch tât nau nâp kah, ngăn lah mra geh nau khuch djơh ndơ sa tâm rnôk nơm prăp, ngăn lah geh ăp ntil ndơ nơm prăk ndơ mô kloh nê kŏ lah nkô̆ nau khuch roh đăp mpăn ndơ ngêt sa.

          PV: Ơ, lah ueh nai dak si.