Dôl mât rong kon geh duh rtoh luh mham rih ta Khoa Hồi sức Cấp cứu nhi n’hanh Nhi sơ sinh, Ngih dak si Đa khoa nkual Tây Nguyên, yuh Nguyễn Thị Nguyệt Ánh, ta xă Ea Tiêu, nkuăl Cư Kuin, n’gor Dak Lak an gĭt, yor thơ tha jêng rnôk ntơm geh ji rnăk wâl yuh hăn rwăt dak si sĭt an mon ngêt. Rnôk jêng mbăn mư hăn ngih dak si jêng nău ji bah mon lĕ plơ̆ jêng mbăn ngăn đah nău ntoh duôr nsôr hô, geh nău djơh kŏt mham an chuh tiểu cầu, huyết tương n’hanh ntop mham.

Mon jêh duh nar nĕ mê̆ mô ru 2 nar, an njuăl jay nuĭh bên, tât nar tal 3 mư hăn but uănh ri duh ji mlông dơ̆ ngêt dak si 1 nar, tât nar tal 4 mon geh rplay jêh nĕ ndơ̆ hăn ngih dak si nkuăl Cư Kuin n’hanh hăn ta aơ. Gŭ jay hok yơn hăn ta aơ sao nu nău mbăn jêng klach đŏng.

Ta nsưng ji ta pĭt, yuh Hoàng Thị Điệp ta xă Cư Ê Bur, nkual ƀon têh Buôn Ma Thuột dôl mât rong kon bu klô 8 năm deh geh ji duh rtoh luh mham rih. Kon yuh Điệp lăp ngih dak si tâm nu nău tiểu câu hŭch âk, ăp nai dak si an chuh ntop dak na nao:

 Tal 5 pơh bah năp mon geh duh, jêh nĕ ndơ̆ ngih dak si nkual ƀon têh but uănh ta nĕ ri lah mon geh duh ji mlông dơ̆, 3 nar bah kơi an uănh năl mham ri saơ mon duh rtoh luh mham rih. Tât măng ri mon jêng mbăn ri ntĭm an mon săm ngăch ndal Ngih dak si nkual. Rnôk mon lăp ta aơ ri nău duh bah mon hŭch hôm, yơn ma dak ri mon ntop dak dŭt âk n’hanh mon tiểu cầu geh hŭch âk n’hanh geh tâm nău mbơh njrăng klach.

Ta ngih dak si Đa khoa nkual Tây Nguyên aƀaơ geh 3 Khoa dôl wơt dơn, săm ji duh rtoh luh mham rih lah Khoa Truyền nhiễm, Khoa Nhi tổng hợp n’hanh Khoa Hồi sức Cấp cứu Nhi n’hanh Nhi sơ sinh. Tĭng rnoh kơp bah ăp khoa bah bôk năm tât aƀaơ, ăp Khoa wơt dơn n’hanh săm an nklăp 500 nuĭh ji duh rtoh luh mham, rgum âk tâm khay 7 n’hanh bôk khay 8. Tĭng nai dak si Hoàng Ngọc Anh Tuấn, Kruanh Khoa Hồi sức-Cấp cứu Nhi n’hanh Nhi sơ sinh, ăp nuĭh ji lăp ngih dak si geh âk mon ntưp duh rtoh luh mham rih mbăn, rnôk lăp ngih dak si lĕ ta nău mbăn, hok luh mham, luh huyết tương... ƀư klach tât nău rêh n’hanh săk soan bah kon se.

Ăp nuĭh lăp ta aơ mbăn da dê n’hanh plơ̆ mbăn tay. Mpŏng ăp me bơ̆ mô lah nuĭh mât uănh kon se rnôk saơ kon se geh nău tât ndal kơt duh hô, geh khĭt brŭt mô lah mô sa ri jêng ndơ̆ tât ngih dak êp ngăn gay dơi but uănh n’hanh mbơh ntĭm dêr nău rgâl mbăn jêng mô ngăch săm.

Tĭng Ntŭk uănh nđôi kop ji n’gor Dak Lak bah bôk năm tât aƀaơ, lam n’gor lĕ djôt dơn 1.325 nuĭh ntưp duh rtoh luh mham rih Dengue. Êng bah bôk khay 8 tât aƀaơ geh rlău 400 nuĭh ji. Nkual ƀon têh Buôn Ma Thuột lah ntŭk geh rnoh nuĭh duh rtoh luh mham rih âk ngăn n’gor, đah 422 nuĭh. Wa Hoàng Hải Phúc, Giám đốc Ntŭk uănh nđôi kop ji n’gor Dak Lak an gĭt, ta năp nu nău srê ntưp ta n’gor Dak Lak hao ngăch n’hanh geh dŭt n’hâm jêr, ntŭk kan lĕ dăn đă N’gâng kan dak si pă ntop tay prăk njrăng n’gang srê ntưp ndal, hôm mô tŏng đah prăk nklăp 500 rkeh.

Năm aơ srê hao ndal n’hanh mpôl hên lĕ ntop kơl ăp nkuăl dŭt âk, yơn aƀaơ mpeh sinh phẩm, dak si kơt mpeh măy mŏc ri mpôl hên dôl mbơh an N’gâng kan dak si gay dăn ntop. N’gâng kan dak si mbơh an N’gâng kan prăk kaih, hôm N’gâng kan prăk kaih Ủy ban gay uănh an m’hâm ƀư ri mbra an kâp đŏng. Mpôl hên mpŏng ŭch geh tơm prăk ơm gay rwăt hóa chất, bình krih, ăp măy mŏk puh dak si gay ntop kơl đăp mpăn tâm khay tât.

Tĭng nchroh mbơh bah nău kan dak si, bah aƀaơ tât dŭt năm 2024, srê duh rtoh luh mham rih dŭt dơh geh ntoh lam hvi ta du đêt ƀon lan ta nkual Tây Nguyên, tâm nĕ geh n’gor Dak Lak. Nău nking n’gang srê dôl mâp âk jêr jŏt yor tâm ƀon lan hôm e geh nău thơ tha, hôm nău kan dak si ta du đêt ntŭk ri dôl mô tŏng dak si dak glê n’hanh ndoh ndơ dak si.