Ntung mbăk rlău dak me Vầu nthoi đah 2 xă Ba-Tư bah nkuăl Đông Giang, n’gor Quảng Nam geh klach pă an n’gar tĭl; hôm trong hăn manh mhe jêh mbuh geh dak klôn rlu. Mô geh trong hăn, rlău du khay aơ, ăp y, nai dak si Ngih dak si xă Ba an tum rgăn dak hăn pah kan. Jêr ngăn lah nău rdêng, pă dak si an nuĭh ji. Y Sĩ Nguyễn Thị Thu Hà, Ngih dak si xă Ba lah:

“Ntung pă jêng mpôl hên tum rgăn dak diăng hăn kan, âk nar dak têh, hoch thăng dơi geh dak klôn rdu, mpôl hên an hao mô lah mŭt rlău ntung. Trong hăn mô geh, nuĭh ji tât ngih dak si pă dak si mbrơi, nău rêh bah nuĭh ji klach lơn”.

Ăp y, nai dak si Ngih dak si xă Ba hăn kan dŭt ŏk r’ah.

Nai dak si Phạm Thị Kim Bằng, Kruanh ngih dak si xă Ba an gĭt, Ngih dak si dơn nău kan but uănh, săm ji an rlău 600 rnăk ta 2 xă Ba n’hanh Tư bah nkuăl Đông Giang, n’gor Quảng Nam yơn knŭng geh 6 biên chế. Bôk năm aơ, 2 nuĭh kan dăn trong pah kan sĭt bah dâng jêng ngih dak si hôm 4 nuĭh dơn lĕ rngôch ăp nău kan bah but uănh, săm ji tât mkra săm ngăch, sĭm sôt săk, deh kon.... Nai dak si Phạm Thị Kim Bằng an gĭt, ăp nai dak si an kâp măng nar.

“Nuĭh kan dak si hôm e geh 4 nuĭh kan dŭt ŏk r’ah, kâp măng lah kâp 2 hê lah mô mbra mô dơi mkra nău kan. Ngih dak si nkual yôk trong hăn jêr jêng lĕ rngôch nău kan he ƀư lĕ. Mbơh đah kruanh hôm yơn khân pơng lah năm mhe rlău nuĭh kan dak si trơn pah kan dŭt âk. Aƀaơ, Ngih dak si mô tŏng dŭt hô. Ta nkual yôk nău rêh jêr jŏt jêng oh nô ƀư blao. Kan âk yơn đah prăk kơl ri mô geh. âk oh kan rlău 10 năm ma prăk khay knŭng 5 rkeh tât 5.500 jêng mô tŏng rêh”.

Lĕ rngôch nuĭh kan dak si nkual yôk lah nuĭh dâng rđung. Mô đêt tâm rnoh khân pơng âk năm mro an rêh 2 ƀon. Nău bah điều dưỡng Nguyễn Thị Hương Thảo, Ngih dak si nkuăl Đông Giang lah ngoăy tâm rnoh nĕ. Rnăk wâl bah Thảo ta nkuăl Đại Lộc, yor nău hăn nsong jêr jŏt n’hanh âk nău kan ăp nar jêng rlău 10 năm aơ knŭng tât dŭt pơh Thảo mư sĭt khâl sai n’hanh kon bu klô jêt du tơ̆. Geh rnôk tâm rơh hô nuh srê, geh lĕ khay, đê̆ đŏng 2-3 khay yuh mư sĭt jay:

Băng: Nău kan ta Ngih dak si nkuăl Đông Giang dŭt âk ma prăk khay ri đêt. Mpŏng gưl bah lơ geh nău kơl an âk lơn ăp cán bộ dak si ta nkual jru ngai kơt mpôl hên gay mât jâng nuĭh kan”.

Nău kan bah nuĭh kan dak si lĕ jêr, đah dak si nkual yôk, nkual rnoi mpôl đêt hôm e jêr jŏt âk lơn. Lơn lah, jêh 2 năm srê Covid-19, nar lơ âk nuĭh dăn trơn ntŭk pah kan sĭt bah dâng, đêt đŏng ntlơi nău kan ƀư an nău jêr nuĭh kan dak si nkual prêh lơ mô tŏng. Nai dak si Lê Thị Quyết, Giám đốc ngih dak si Ynkuăl Đông Giang an gĭt, ntŭk kan mhe dơi ntop du đêt rnoh an biên chế yơn lah nkôp đah nău ngăn ri hôm e mô tŏng đah nău ŭch:

“Nkôp đah biên chế ri tŏng yơn nkôp đah nău kan ri biên chế hôm e đêt jêng rmôt kan mô tŏng. Geh du nău kơl êng an lor bôk năp, kơl an nău kan dak si gay cán bộ dak si đăp mpăn, lơn lah đah ăp ngih dak si nkual yôk kơt aơ”.

Nai dak si Phạm Thị Kim Bằng but uănh ji an nuĭh ƀon lan.

Jêr nău kan ŏk r’ah tâm rnôk nău kơl an mô hŏ tâm di lah nkô̆ nău ƀư nuĭh kan dak si ntlơi nău kan geh dŭt âk ta âk ntŭk. Êng ta n’gor Quảng Nam, knŭng 6 khay bôk năm aơ lĕ geh bơi 50 nuĭh kan dak si dăn rlu kan. Ta nkual yôk, nkual rnoi mpôl đêt, rnoh y, nai dak si dăn trơn pah kan hăn bah dâng nar lơ âk ƀư an trong kan mât uănh săk soan nkual rnoi mpôl đêt mâp âk jêr jŏt. Wa Mai Văn Mười, Giám đốc N’gâng kan dak si n’gor Quảng Nam an gĭt, nău kan mhe ƀư tâm rlong săch viên chức an nău kan dak si, mkra nău mô tŏng y, nai dak si aƀaơ.

“Năm mhe rlău, nău kan lĕ ƀư tâm rlong săch bơi 100 nai dak si n’hanh rhiăng điều dưỡng, dược sĩ Đại học. N’gor Quảng Nam lĕ mâp măt ntrŭt nsôr oh nô n’hanh bôl nu nău bah ntŭk pă nău kan tâm di. Kruanh ăp nkuăl nkual yôk dŭt uănh tât nău pă ntŭk gŭ sông sa an nuĭh kan gŭ ngai. Nău kan lĕ mbơh an HĐND n’gor mpeh nău mô tŏng an ăp ngih dak si gưl nkuăl. Lơn lah ta nkual yôk nău kơl ngih dak lĕ ntop kơl trok prăk khay an viên chức, nuĭh pah kan”.

N’gâng kan ƀon lan n’hanh nău kan dơi kan n’gor Quảng Nam dŭt mpŏng Ngih dak ơm geh trong ƀư, nău kơl săch dŏng, kơl an tâm di gay mât jâng nuĭh kan dak si, lơn lah rmôt y, nai dak si pah kan ta nkual jru ngai./.