Ta n’gor Dak Lak mhe geh tay 1 hê kon se ntưp ji môr rngok Nhật Bản. aơ lah nuĭh tâl  3 ntưp ji môr rngok Nhật Bản ta n’gor tâm  năm  aơ. Tĭng ntŭk rgum mât uănh kop ji (CDC) n’gor Dak  Lak nuĭh ji lah kon se bu ur, deh năm 2016, ta xã Ea Hồ, nkuâl Krông Năng.

Tĭng me bơ̆ kon se, nar 17/7, mon geh kop duh hô, ji bôk, dơi njŭn but săm ta Trung tâm Y tế nkuâl Krông Năng. Tât nar 20/7, kon se dơi njŭn hao nhih dak si nkual Tây Nguyên đah nău nchroh kop duh ntoch jong/tĭng groi nđôi nău ji môr rngok, ndâr rngok. Nar 25/7, kêng dŭt an saơ kon se  geh ntưp đah nău ji môr rngok Nhật Bản. Trung tâm y tế nkuâl Krông Năng hŏ an puh kloh uĕh ntŭk gŭ wăr jay nuĭh ji n’hanh nkoch trêng an âk nuĭh ƀon lan tâm nkual, ăp trong nkra njrăng n’gang rdâng lơh./.