VOV4.M’nông: Jêh 2 năm srê Covid-19, ntrong kan dak si nsum bah n’gor Gia Lai mâp âk nau jêr, kơt nŭih pah kan ŭch rlu kan, ntrơn hăn kan ngih dak si pơk êng, pah kan geh ƀư tơm mpeh tơm prăk tâm ăp ntŭk ân saơ nau ndrât, geh nau khuch tât nau nâp bah nau khám, săm ji jŏ jong. Nau aơ ân geh ŭch ăp nau doh rklaih mpeh nau kan, nau kơl tâm nau kan dak si ndrel nau nchrăp lor bah ăp ntŭk kan dak si nsum.

            Tâm dŭt khay 7 mhe rlau, n’gâng kan dak si Gia Lai nchră ăp nau kan mpeh nau ma ăp nŭih kan tâm ngih dak si nchlơi kan, dăn rlu kan, ntrơn kan tâm ăp ngih dak si bah dih ntơm bôk năm 2021 tât 6/2022. Tĭng nê, geh 7 nkô̆ nau tơm geh tât nau kan trok prăk khay dêh, nau kan âk, ntŭk pah kan mô đăp mpăn, mô tŏng ndơ dŏng năl nau ji, săm ji, nau geh ntĭm nti, n’hao nau blau nau kan mô âk.

            Tâm nê, nau kol mpeh prăk khay bah nai dak si geh ntŭk kan dak si Gia Lai mbơh kloh: Gay dơi geh nau ân kan, ăp nai dak si ân geh đê̆ ngăn 7,5 năm ntĭm nti, ƀư nau kan y khoa, đah tơm prăk dŏng âk lơn nau kan êng. Yơn nau ngăn, prăk khay bah nai dak si jêh lôch nti tâm ban ma prăk khay cử nhân. Mặt êng, rnoh nau khám, săm ji tâm ăp ngih dak si nsum dôl ma ƀư rnôk aơ tĭng nau ntrŭnh 37/2015 năm 2015 yor N’gâng kan dak si ntrŭnh. Tâm rnôk nau ntrŭnh geh ân rgâl nkra, yơn rnoh khám săm ji hôm mât nâm ơm. Wa Lý Minh Thái, Groi Giám đốc N’gâng kan dak si Gia Lai mbơh:

            ‘Êng Gia Lai, tâm ntŭk kan ndâk nsum, nau geh prăk ri tă bah nau khám săm ji geh tât 94%. Tâm rnôk nê, prăk tă bah BHYT geh âk ngăn, geh nklăp 90%. Ndri ma, nau kol bah nau ƀư êng tâm Gia Lai lah rnoh prăk ƀư khám săm ji ê geh đăp mpăn, rnoh ân dŏng lăp bôk năp hôm dêh, mra khuch tât prăk dŏng geh bah ăp rmôt kan nê”.

            Ndrel ma nau mĭn lah, wa Phạm Bá Mỹ-Giám đốc Ngih dak si Đa khoa Gia Lai mbơh, rnoh ƀư nau khám, săm ji rnôk aơ ê tŏng ăp nau njêng, ƀư jêng nau geh kơp mô tŏng. Lah nau aơ ê geh doh rklaih, ngih dak si mra rklaih dơi nau kan êng:

            ‘Rnoh prăk săm tâm ngh dak si ma tĭng tâm di, tĭng tŏng ri mra geh rklaih dơi ăp nau kan hôm êng êng. Rnôk nê, nau geh mra aka lơn. Nau geh âk lơn ri êng nau trok prăk khay ân nai dak si ri nau geh prăk kŏ âk lơn rlau bar tŏ. Tal bar đŏng lah Ngih dak ân geh prăk ntop ân năm gŭ kan ân nau geh kan hao tay. Hao prăk khay ndrel hao prăk ƀư kan ri nau rêh mra ueh lơn”.

            Rnôk aơ, ntrong kan dak si ndâk njêng nsum bah Gia Lai geh 12 ntŭk ƀư kan tâm n’gor, 17 ngih dak si tâm ăp nkuăl, nkuăl têh, nkuăl ƀon têh, ndrel 220 ngih dak si xã, Phường. Nŭih kan tâm ngih dak si geh bơi tât 4.900 nŭih, tâm nê geh rlau 920 nŭih geh nau dơi lah nai dak si hao gŏ lơ. Ăp rnoh mrô mpeh dak si kơt lah nai dak si, rnoh nsưng săm/rmưn nŭih kŏ dêh lơn rđil nau geh nsum bah lam dak. Nau ntuh kơl ndơ dŏng dak si ê tŏng, ê tâm ban.

            Nai dak si ưu tú Nguyễn Hữu Nam- Giám đốc Ngih dak si Đa khoa n’gor Gia Lai ân lah, tâm rnôk kâp rnơm ăp nau kan geh doh rklih, ri n’gor Gia Lai kŏ ân geh nchrăp nau rklaih, rgâl nau dơi pah kan đah cán bộ nai dak si, gay ma khân păng đăp mpăn pah kan. Săk nơm bah ăp ngih dak si nsum kŏ ân geh nau rgâl mhe nau dŏng, n’hao ăp nau kan rhŏ kơl, mât chăm gay ma rgum nŭih tât săm, ntơm bah nê n’hao nau dơi ƀư nau kan mpeh rnoh prăk nơm geh:

            ‘Ƀư nâp êng mpeh văng sa lah nau kan kơl an ntrong kan gleh nơih ndrel geh săk tam prêh hô lơn. Kơt ăp ngih dak si ƀư kan êng ri ƀư tơm êng, ân geh săk nŭih pah kan ân blau, lah mô dơi kan ri ân rlu kan. Êng nê, ân geh nau rgâl tâm nau rđau. Rđau kan dak si ân geh nau blau, geh nau dŏng ăp nŭih gĭt blau, lơi dĭng leo nau geh jêng bah săk nơm prêh ir, ân geh mĭn tât nau geh jêng bah cán bộ nŭih pah kan lor, mĭn tât nau hun hao bah ngih dak si ndrel nau nâp nâl rnôk khám săm ji. Nau nê mơ lah nau kan khlay”.

            Wa Ksor Phước, Kruanh n’gâng kan, tơm Uỷ ban Dân tộc bah Quốc hội gưl XI, Bí thư n’gor uỷ, Ntoh măt Quốc hội n’gor Gia Lai ân lah: Ntuh kơl, mât chăm n’hâm soan ƀon lan lah nau ntuh kơl ân nau hun hao bah neh dak. Wa rnơm lah, Chính phủ ndrel ăp ntŭk kan, n’gâng kan mra ơm geh nau doh rklaih nau jêr ân ntŭk kan dak si Gia Lai lah êng, ntŭk kan dak si lam dak lah nsum:

‘Hŏ geh rlet rlau âk năm kan bah Đảng ndrel Ngih dak nơm hŏ ndrel ma dôl uănh kơl an tât nau kan kơl an ndrel prăk khay ân cán bộ nŭih pah kan tâm lam ntrong kan chính trị tĭng ntrong nar lơn ma n’hao prêh lơn. Phung he saơ lah, ân geh ăp nau kan Chính phủ mât kan, rđau ăp ntŭk kan geh tât ndrel ma ntŭk kan dak si nsum ty doh rklaih ăp nau hôm jêr jŏt ntul rlong nê”./.

                                    Nŭih rblang: H’Thi