Nar 22/9, Trung tâm Y tế nkuâl Krông Pa, n’gor Gia Lai mbơh gĭt mpeh du  hê  nuĭh khĭt tă bah ji so ndrăng kăp lah mon Ksor Kiêm (8 năm deh, nuĭh Jrai, gŭ buôn Chư Krih, xã Chư Drăng, nkuâl Krông Pa). Me bơ̆ mon Kiêm an gĭt, tă bah mô gĭt mon geh ji so ndrăng kăp jêng mô hăn chuh vaccine njrăng n’gang ji so ndrăng kăp. Rnôk mon Kiêm geh nău mpơl kop duh, lêt rgănh, me bơ̆ hăn rvăt êng dak si an ngêt yơn mô bah.

Tât nar 12/9, mon dơi njŭn hăn tât Trung tâm Y tế nkuâl Krông Pa đah nău mpơl kop duh, ji siăk, lêt rgănh. Tât măng ndrel nar, mon geh nău mpơl ji jru jêng hăn rdeng tât Nhih dak si Sản Nhi n’gor Phú Yên n’hanh dơi nchroh tĭng groi nđôi ji so ndrăng kăp. Nar 15/9, mon Kiêm dơi rdeng hăn tât Nhih dak si Nhi đồng 2, Nkual ƀon têh Hồ Chí Minh tâm rnôk hŏ khĭt lêt. Mon dơi ŭanh năl mham, geh ntưp đah kaman ji so ndrăng kăp n’hanh tât nar 20/9, mon Kiêm khĭt. Ntơm bah  bôk năm tât aƀaơ, Gia Lai geh 11 nuĭh khĭt tă bah ji so ndrăng kăp, dŭt âk ta nkual Tây Nguyên.