Nar 15/12, UBND n’gor Gia Lai lĕ ƀư rƀŭn nchră n’hanh joi trong mkra dôh rklaih jêr jŏt yor mô tŏng dak si, mô tŏng prăk dŏng. Tâm năm 2021 n’hanh 2022, 23 ngih dak si ngih dak lĕ pă 758 ntil dak si, đah dĭng lĕ rlău 646 rmen prăk, yơn mhe ƀư geh 66%. Aƀaơ du đêt ntŭk but uănh, săm ji ta n’gor dôl mô tŏng du đêt ntil dak si.

Wa Nguyễn Thị Thanh Lịch ntĭm rđău rƀŭn nchră.

Trong kan joi êng prăk kaih ta ăp ngih dak si ngih dak ta Gia Lai mâp âk ntŭl rlong. Nău sŏk mô tŏng an dŏng dôl ƀư âk ntŭk kan geh rnon prăk khay, khuch tât trong kan but uănh săm ji. Ƀĭt joet rƀŭn nchră wa Nguyễn Thị Thanh Lịch-Groi Kruanh UBND n’gor Gia Lai ntĭm rđău N’gâng kan dak si, tâm rgop đah Bảo hiểm Xã hội n’hanh N’gâng kan prăk kaih dăn đă, tâm ôp trong pă ntop, manh prăk gay mkra nău trok prăk khay an cán bộ dak si n’hanh đăp mpăn pă an dak si an ăp ngih dak si; nkre đă kruanh n’gâng kan dak si n’hao dơi mât uănh tĭng trong săk rnglăy, lĕ đah nău kan.