VOV4.M'nông: Aƀaơ n'gâng kan dak si n'gor Gia Lai dôl an ƀư ăp trong njrăng n'gang âk ntil nuh srê. Tâm nê, dŭt rvê lah nuh srê ji luh mham rih, đah bơi 3000 nuĭh ntưp ji ta ăp nkuâl ntơm bah bôk năm tât aƀaơ. Nuh srê COVID-19 hŏ dơi mât kân, yơn ăp nar, ăp ntŭk kan dak si hôm năl geh rlău 10 nuĭh ntưp ji đŏng. Ndrel đah nê, ăp ntil nău ji êng ƀa ƀă kơt, ji ndâr pưm ko, kop luh  mê gŭr n'hanh ji rtoh luh dôk geh ma nău ntoh luh đŏng lah mô dơi mât kân lhăt. Ta năp geh ma nău nuh srê rdăp nuh srê, n'gâng kan dak si Gia Lai ntrôl âk rơh nkoch trêng ƀon lan tĭng ƀư ăp trong puh nkhĭt kaman, mât kloh uĕh ntŭk gŭ rêh gay bah ir nuh srê ji luh mham tih. Mpeh pah kan chuh n'gang, Gia Lai nchrăp chuh n'gang lôch 700.000 n'glai vaccine njrăng n'gang ji ndâr pưm ko tâm bar pe khay tât, ntrôl ngăch chuh vaccine COVID-19 an ăp rmôt năm deh, lơn lah rmôt kon se nchrăp hăn tât nhih nti./.

Gay ma  rgâl nkra nău mô mât njrăng, mô kan jăp tâm nău kan njrăng rdâng nuih srê Covid-19, lâm Đồng dôl nsrôih mbơh ƀư âk trong kan, ngăn lah ntrôl dăng nău chuh n’gang an oh kon se ta năp năm nti mhe. Aƀaơ, ta Lâm Đồng, nuĭh rlău 18 năm deh chuh vacxin Covid-19 nglai 3 mhe geh 64%, nglai 4 mhe geh 43,5%, chuh nkah tay nglai 3 an oh kon se tŏng 12 năm deh tât ba dâng 18 năm deh kanŭng geh rlău 58%. Nkô̆ nău yor du đê̆ nuĭh ƀon lan geh nău mô njrăng, mô ŭch chuh tŏng vacxin njrăng nuh srê Covid-19 tĭng nău đă bâh n’gâng kan dak si. Gay ma nău kan njrăng rdâng nuh srê Covid-19 geh ueh, n’hao rnoh nuĭh tât chuh n’gang, n’gor Lâm Đồng dôl mbơh ƀư nău kan chuh n’gang vacxin Covid-19 ta lam n’gor, tâm nĕ rgum an chuh lôch nglai 3 an nuĭh kon hoc bâh 12 tât 18 năm deh ê lor lăp năm nti mhe 2022-2023.

Nuĭh rblang: Điểu Thân