VOV4.M’nông:   Tâm 2 năm geh srê Covid-19, ntŭk ngih dak si ngih dak n’gor Gia Lai lĕ ƀư uĕh nău tơm nking n’gang, mât uănh săk soan nsum mpôl. Tâm âk khay mro, hang rbăn cán bộ dak si bah gưl n’gor tât gưl bah dâng, lĕ mô klach ntưp, pah kan dŭt n’hâm âk khay mro tâm ăp ngih dak si rdâng săm, nkual săm ji Covid-19. Bôl ndrĭ, aƀaơ, prăk khay bah cán bộ dak si Gia Lai mô hŏ dơi tŏng nău rêh. Nău aơ ƀư âk nuĭh hăn joi nău kan ntop tay ŏk r’ah bah dih mông kan, mô lah dŭt njê joi an nău rêh đah rnoh prăk khay đêt.

Lôch nar pah kan kêng măng ta ngih dak si Y dược Cổ truyền n’hanh Phục hồi Chức năng n’gor Gia Lai, hộ lý Phùng Thị Lan ndăn sĭt ntŭk jay gŭ gay uănh nău kan tâm jay, jêh nĕ ndăn tât ntŭk nkra njêng dak lŭ pler gay pah kan măng. Ta aơ, jêh du rơh dơi măy nkra njêng, nău kan bah yuh Lan n’hanh ăp nuĭh lĕ tâl lŭ tâm bao n’hanh dô̆t lŭ pler têh an tâm ăp ndeh rdêng. Mông kan ntơm bah 7 mông măng tât 5 mô ôi nar bah kơi.

Du nar, yuh Lan pă măt bĭch jêng 3 tơ̆, du tơ̆ 2 mông tâm pă đah ăp mông kan gay đăp mpăn săk soan. Ŏk r’ah, jêr jŏt kơt nĕ, yơn đah yuh, aơ lah nău geh geh prăk đăp mpăn lơn đah nău rao rlŭ ngan ta ntŭk sông sa ma yuh tă ƀư. Yor kơt nĕ đŏng, ăp khay, yuh geh tay 6 rkeh prăk rlău ma prăk khay 5.020.000 bah ngih dak si gay mât du hê kon nti đại học ta nkual ƀon têh Hồ Chí Minh n’hanh nău rêh 3 me kon ta Nkual ƀon têh Pleiku:

        “Ngih dak si aƀaơ trok prăk khay an oh nô lĕ jêr hôm, geh rơh 3 khay mư geh 1 tơ̆. Tâm 3 khay nĕ, he an joi êng. Hăn pah kan ntop tay lah nău ŭch êng bah gâp, gâp hăn kan ri mư dơi rêh. Prăk khay đêt ir ri mô dơi đăp mpăn, âk nuĭh an hăn kan ntop tay kơt gâp”.

Hộ lý Lan pah kan ta ntŭk nkra ƀư dak lŭ nđik ta măng gay joi tay prăk mô 3 kon.

Mô knŭng ăp hộ lý, ma n’ăp ăp nai dak si pah kan ta Ngih dak si Y dược Cổ truyền n’hanh Phục hồi chức năng n’gor Gia Lai dôl kƀah mô tŏng đah prăk khay đêt. Năm aơ, bôl lĕ geh 13 năm pah kan ta aơ, yơn dĭng lĕ prăk khay bah ur sai nai dak si Nguyễn Quốc Tuấn n’hanh Huỳnh Thị Như Tài knŭng nklăp 10 rkeh prăk. Đah prăk khay đêt kơt nĕ, Nai dak si Tuấn an lah, gay rwăt du lôk neh, ƀư du mlâm jay jêt đah rnăk wâl lah dŭt ngai:

“2 hê ur sai, 2 hê kon lah 4 nuĭh. Dŏng prăk dŭt nkrem, kơp uănh na nê̆ gay tŏng dơm dơm. Pơng khuch đah nău mât rong kon se kơt ngêt sa, nti nsơm, gŭ âm bah kon. Kơt lah, dak toh kon  nơm ngêt an săch dak toh tâm di đah prăk. Bôl, kon hŭch nti đơn, nti vẽ, gâp mô dơi an. Nĕ lah nău rvê”.

Prăk khay lĕ đêt, jêr nău kan bah nai dak si nar lơ jâk mbăn. Rĭng, du nar, Khoa Cấp cứu-Ngih dak si Đa khoa n’gor Gia Lai wơt dơn bah 70 tât 80 nuĭh ji, dŭt âk an dơi ntop kơl, nchroh ơm. Bôl ndrĭ, lĕ khoa knŭng geh 50 cán bộ nai dak si. Rnoh nuĭh đêt, jêng khoa knŭng geh 3 kíp kâp uănh, Nar kan âk, yơn ăp khay prăk bah nai dak si Nguyễn Ngọc Trọng (53 năm deh) knŭng 7,8 rkeh prăk, jêr dơi mât an ăp kon nti nsơm. Aơ lah nkô̆ nău bơi 10 nuĭh kan tâm khoa bah nai dak si Trọng rlu nău kan knŭng tâm 3 khay dăch aơ:

 “Bôl kop ji jêr jŏt, dơh ntưp ji mbăn. Nuĭh jay nuĭh ji âk rơh tâm janh, lơh n’ăp nuĭh kan dak si. Rmôt săm ngăch njrăng n’gang kop srê bah mpôl hên bơi 50 nuĭh, yơn knŭng geh 6 nuĭh dơi kơl, dŭt lah yô̆. Âk oh nô druh ndăm bu ntlơi lĕ, hăn ngih dak si bah dih, hăn khual ƀon têh geh prăk khay rlău âk tơ̆ prăk khay ta aơ. Du đêt nuĭh ranh, hăn mô dơh, ri ân dơn gŭ tay đah prăk khay đêt”.

Nai dak si Trọng but uănh nuĭh ji ta Khoa Cấp cứu.

Aƀaơ, ta Gia Lai geh bơi 4.900 cán bộ nai dak si pah kan tâm 27 nbtŭk tâm ngih dak si ngih dak. Bah 2021 tât aƀaơ, geh 133 cán bộ nai dak si rlu kan gay hăn ăp ngih dak si bah dih. Tâm rnoh nĕ, âk nuĭh djôt dơn ăp nău kỷ luật, trok prăk ntĭm nti. Tâm rnôk mpôl cán bộ ntlơi nău kan dak si ngih dak mô hŏ geh nău rlu, ri nău săch dŏng bah nău kan dŭt jêr jŏt. Năm 2022, nău kan dak si Gia Lai mô tŏng 574 nuĭh, yơn knŭng săch mhe geh 246 nuĭh.

Nkô̆ nău khlay dơi N’gâng kan dak si Gia Lai uănh lah yor cán bộ dak si tâm ngih dak si ngih dak geh prăk khay đêt, mô dŏng tâm di kơl. Lơn lah, jêh 2 năm geh srê Covid-19, nu nău sŏk dŏng êng prăk kaih ta ăp ngih dak si ngih dak tâm n’gor lơ jêr jŏt tay, dŏng mô tŏng âk rmen prăk, prăk khay bah nuĭh pah kan knŭng bah prăk khay bôk năp. Wa Phạm Bá Mỹ-Kruanh Ngih dak si Đa khoa Gia Lai, ntŭk geh rnoh cán bộ dak si rlu kan âk tâm ăp năm dăch aơ an lah:

“Nău rêh mô tŏng ri bu joi nău kan êng, bu ntlơi kan. Nău nĕ gĭt, yơn mô dơi ƀư. Mpŏng kâp ngih dak ngăch nkra rgâl tay, ntĭt nsa ntop kơl an nai dak si, n’hao rnoh nuĭh kan. Nău rêh cán bộ hao, ri mô geh nău mĭn rlu kan, mô geh nău mĭn pah kan êng; nkra rgâl tay săk soan, nkra rgâl rhŏ an nuĭh ji uĕh lơn, ntuh kơl an nuĭh ji âk lơn”.

Tŏng ăp nău kơl, prăk khay an cán bộ dak si nkre lah trong mkra kơl tŏng ăp đăp mpăn, nâp nâl bah trong dak si ngih dak, rgop ƀư uĕh nău mât uănh săk soan nuĭh ƀon lan bah nuĭh nai dak si./.

                    Nuĭh rblang: Y Sưng Phê Ja