VOV4.M’nông: Ndrel ma ăp n’gor tâm nkuăl Tây Nguyên, srê rtoh trong mham tâm n’gor Gia Lai kŏ dôl ma geh nau tât jêr. Bah năp nê, ntŭk kan n’gâng kan dak si bah n’gor Gia Lai hŏ ntrŭnh âk nau kan gay ma njrăng rdâng ndrel nkân srê. Rnôk aơ, rnoh luh trong mham ntoh dăng tâm 16/17 nkuăl, nkuăl têh, nkuăl ƀon têh bah N’gor Gia Lai, đah 308 nŭih geh nau ji, hao 57% rđil rơh aơ năm e.

Ăp nkuăl geh rnoh nŭih ji rtoh trong mham hô ngăn lah Ia Grai, Ia Pa, Chư Prông, Krông Pa, Chư Pưh, Pleku, Đăk Đoa đah 112 ntŭk. Wa Đinh Hà Nam, Groi Giám đốc n’gâng kan dak si n’gor Gia Lai mbơh, srê rtoh trong mham mre geh tât jêr tât rơh tât, n’gâng kan dak si dôl ma ntrŭt dăng nau nkhĭt lơi măch tâm ăp nkuăl geh srê, ƀư ueh nau ndơn, săm ân nŭih ji gay ma n’huch ngăn ăp nŭih ntưp srê ji rtoh trong mham tâm ƀon lan./.

Nŭih rblang: H’Thi