Rnoh kon se khĭt yor ăp nău ji dơi chuh njrăng n’gang đah vaccine lĕ hŭch âk kơp bah rnôk Việt Nam ntơm ƀư bôk nău kan Chuh pơk hvi lam dak tâm năm 1981, đah nău ŭch đăp mpăn lĕ rngôch kon se ta ăp nkual lam dak dơi gĭt tât đah vaccine njrăng n’gang kop ji. Chuh lĕ mât njrăng hang rkeh kon se ta Việt Nam bah ăp ntil nău kơp ji tâm rlău 40 năm bah năp.

Aơ lah nău mbơh bah Rmôt kan dak si lam ntŭr neh (WHO) n’hanh Tơm prăk nkrem kon se Liên hợp quốc (UNICEF) an gĭt nkhêp di rơh nkah gĭt Pơh lễ Chuh lam ntŭr neh (24-30/4). Ăp năm Việt Nam geh nklăp 1,7 rkeh kon se deh n’hanh rlău 95% kon se tâm rnoh aơ dơi chuh vaccine an dơm njrăng n’gang 10 ntil nău ji tâm ntưp phit klach. Pơh lễ chuh năm aơ ƀư bah lơ 24-30/4/2024 ndrel đah rnôk nkah gĭt 50 năm ndâk njêng Bôk nău kan Chuh pơk hvi lam ntŭr neh, aơ lah di an ntô̆ n’hao nău geh bah Chuh pơk hvi, lah nău ntrŭt bah Bôk nău kan Chuh pơk hvi tâm nău rêh, mât njrăng săk soan kon nuĭh, ntrôl rgâl mhe gay n’hao trong kan chuh khlay aơ.