Yuh Phan Thị Bích Thảo, ta nkuăl têh Ia Kha, nkuăl Ia Grai, n’gor Gia Lai geh kon se 3 năm deh geh duh hô, rgănh jêng rnăk wâl an oh lăp ngih dak si Nhi Gia Lai gay săm. Yơn lah, jêh nĕ oh rgâl mbăn jêng dŭt ngăch an săm ndal ta Ngih dak si Đa Khoa nkual Tây Nguyên, n’gor Dak lak. Jêh 8 nar săm dŭt n’hâm, tât aƀaơ nu nău oh lĕ rgâl uĕh, săk soan dôl mbrơi mbrơi bah. Nkah gĭt tay nu nău bôk năp rnôk ndơ̆ kon hăn săm ndal, yuh Thảo mô hŏ bah klach.

“Mon hăn ta aơ đah jâng ty mbung rnoh 3, mon geh djuôr play nuih hôm, lah nsum săk brâp lĕ hôm, dăng hôm. Hăn ta aơ dơi nai dak si dŭt n’hâm kơl săm ngăch. Lah nsum kon oh aƀaơ lĕ rlău nău klach hôm. Oh saơ klach ngăn, kon oh pơng rgâl dŭt ngăch n’hanh mô geh saơ luh rplay ta ty ta jâng du đêt, mon knŭng geh duh n’hanh sôt ta mbung”.

Geh kon ntưp ta jâng ty mbung mbăn dôl săm ta Khoa Hồi sức Cấp cứu Nhi-Nhi sơ sinh Ngih dak si Đa khoa nkual Tây Nguyên, yuh Hồ Thị Phượng ta phường Thống Nhất, nkuăl têh Buôn Hồ, n’gor Dak lak mô hŏ bah rvê rnôk kon rgâl mbăn. Yuh Phượng an gĭt, bah năp đaơ mon têh jay yuh tă ntưp jâng ty mbung yơn n’gơch, knŭng luh du đêt rplay dak ta jâng, ty, ta jay mhĭng dak si lah bah êng jêng rnôk mon tal 2 ntưp ji, rnăk wâl thơ tha.

“Mon bôk năp hăn nai dak si bah dih ngêt dak si geh 2 nar lah bah. rnôk kăl e lah n’gơch lơn, aƀaơ mbăn lơn rnôk bah năp. Saơ klach ir, klach khuch tât rngok, jêng mô hăn ngih dak si ngăch lah mô dơi bah”.

Dôl mât chăm kon bu ur 16 khay deh ta Khoa nhi tổng hợp Ngih dak si Đa khoa nkual Tây Nguyên, yuh Huỳnh Thị An ta xă Cư M’lan, nkuăl Ea Súp, n’gor Dak Lak an gĭt, tă aơ nklăp du pơh, yuh saơ kon siăk âk, ŏk r’ah, duh hô n’hanh ta mpang jâng ty geh rplay dak jêng ndơ̆ hăn but uănh. Nai dak si n’glôn jêh mon geh jâng ty mbung. Jêh 3 nar săm ta jay mô bah, rnăk wâl lĕ ndơ̆ mon lăp ngih dak si nkual Tây Nguyên.

“Rnôk lăp ta aơ mŭn dak pơng ntoh âk 2 mpang jâng jêh nĕ rêng du đêt ta mpang ty tay. Gâp mô gĭt mpeh nău ji jâng ty mbung jêng gŭ ta jay pâl ri gâp an mon pâl dơm mô mĭn yan aơ pơng ntoh nău ji aơ”.

Tĭng nai dak si Huỳnh Thị Bích Như, Khoa Nhi tổng hợp, Ngih dak si Đa khoa nkual Tây Nguyên, bah bôk năm tât aƀaơ, khoa lĕ wơt dơn, săm an rlău 85 mon ntưp ji jâng ty mbung. Nău dôl uănh tâm 1 khay plơ̆ ma aơ rnoh nuĭh lăp ngih dak si hao âk. Aƀaơ khoa dôl săm 15 nuĭh ntưp ji jâng ty mbung, tâm nĕ, geh 2 nuĭh mbăn. Nai dak si Huỳnh Thị Bích Như mbơh ntĭ:

“He njrăng dêr đah trong n’hao ngăch săk soan an kon, ngêt sa tŏng ndơ kah, ngêt tŏng dak jêh nĕ ntop ăp vitamin gay dăng soan chŏl nău ji an kon n’hanh he chuh ăp nglai vaccine njrăng n’gang kop ji n’hanh ntĭm an kon răk rao ty yor ty jâng mbung he răk kloh an pơng n’hŭch ntưp rêh”.

Knŭng kơp êng ta Khoa Hồi sức Cấp cứu Nhi-Nhi sơ sinh. Ngih dak si Đa khoa nkual Tây Nguyên, bah bôk năm tât aƀaơ, Khoa lĕ wơt dơn n’hanh săm an 4 nuĭh kon se ntưp ji jâng ty mbung mbăn n’hanh dŭt mbăn, hao 100% nkôp đah rơh aơ năm bah năp. Nai dak si chuyên khoa 2 Hoàng Ngọc Anh Tuấn, Kruanh Hồi sức Cấp cứu nhi, Nhi sơ sinh an gĭt, ăp năm bah năp ji jâng ty mbung đêt geh nuĭh mbăn, yơn năm aơ rnoh nuĭh ji mbăn hao, nuĭh ji rgâl mbăn dŭt ngăch, nu nău jêr njrăng jêng ăp nai dak si ta Khoa an uănh nđôi rjăp săk soan tĭng kon se gay mkra ngăch:

“Đah ji jâng ty mbung ri an lah tât aƀaơ mô dơi thơ tha. Gâp đă rlău ma nău njrăng n’gang kơt ăp nău ngêt sa, ăp nău đăp mpăn răk rao, đăp mpăn ntŭk ntô ri ăp me bơ̆ uănh rnôk kon se geh ok sôt ta mbung, mô lăp sa, ntlơi sa mô lah kon se duh hô mô lah ta săk nuĭh bah kon se ntoh mŭn dak ri an tât ngih dak si êp ngăn gay dơi nuĭh dak si mbơh ntĭm gay geh trong mkra săm, mât rong”.

Tĭng nău mbơh bah Ntŭk Grôi nđôi kop ji n’gor Dak Lak, bah bôk năm tât aƀaơ, lam n’gor kơp dơn 158 nuĭh ntưp jâng ty mbung, tâm nĕ geh nuĭh khĭt. Dôl uănh rnoh kon se ji jâng ty mbung rgâl mbăn geh trong hao nkôp đah ăp năm bah năp.