Ta n’gor Kon Tum, ji luh mham rih dôl geh trong rƀŏng hao âk. N’gâng kan dak si ta ntŭk dja dôl nar lơn ma ntrôl  dăng pah kan njrăng,  n’gang rdâng lơh đah geh ma nău ntoh luh nuh srê. Ntơm bah bôk  năm tât aƀaơ, n’gor Kon Tum năl geh 33 tơm nuh srê ji luh mham rih đah rlău 160 nuĭh ntưp ji, rđĭl  đah ndrel khay dja năm e nơh 10 tơm nuh srê n’hanh hao 98 nuĭh ntưp. Aƀaơ ji luh mham rih ta n’gor Kon Tum dôl ntưp  rêng lam hvi.

Kơt ta nkuâl Kon Plông, ntŭk  ăp năm bah năp nơh mô hŏ tă geh ntoh luh nuh srê, aƀaơ ntoh tơm nuh srê đah 4 nuĭh ntưp ji luh mham rih. Hôm ta nkuâl Kon Rẫy hŏ năl geh rlău 110 nuĭh ntưp ji luh mham rih, dŭt âk tâm ăp nkuâl, nkual  ƀon  têh bah n’gor Kon Tum bol hŏ lor nchrăp an ƀư pah kan njrăng n’gang nuh srê. N’gor Kon Tum hŏ dăp rgum ăp tŏng ban rđău đă njrăng n’gang nuh srê ăp gưl; nchrăp tơm prăk dŏng, ndơ dŏng kan dak si; nkoch trêng, mbơh nti na nê̆ nău gĭt blău njrăng n’gang ji luh mham rih an bơi 26.000 tơ̆ nuĭh ƀon lan; ƀư rlău 2.200 tơ̆ luh nkhĭt tăp măch rhai dak.