VOV4.M’nông: Tâm n’gor Dak Lak, rnôk aơ rnoh nŭih ntưp ma srê Covid-19 dôl ma hao ngăch đah rlau 4000 nŭih du nar. Nau aơ njêng nau jâk ân nŭih nai dak si. Ntơm rnôk N’gâng kan dak si geh nau ntrŭnh, ntĭm mpeh nau săm F0 tâm ngih, ndrel nau kơt tĭng mạng xã hội, nau mât, săm nŭih ntưp Covid-19 hŏ jêng ueh lơn, rmôt nai dak si kơl an nŭih săm bah rmôt chat Zalo geh nau tam lơn.

Dŭt khay 1 mhe rlau, yuh N.T.P tâm Phường Ea Tam, nkuăl ƀon têh Buôn Ma Thuột saơ păng geh ntưp ma srê SARS-Cov2. Jêh rnôk mbơh đah ngih dak si ndrel ƀư đơn săm êng tâm ngih, yuh N.T.P geh mbơh ntĭm bah rmôt chát Zalo ân ăp nŭih F0 săm êng tâm ngih tâm phường Ea Tam. Ndơn saơ nau kan aơ ueh, nơih ân săm tâm ngih, yuh N.T.P ŭch râng. Nkoch đah ăp nau rnôk râng rmôt aơ, yuh N.T.P nkoch:

‘Rnôk dŭt khay 1, gâp geh ntĭm mbơh nau nkhah, săm êng tâm ngih rnôk ma geh tŏng nau dơi tĭng nau ntrŭnh ndrel ngăn lah geh nau kơl an ueh ngăn bah ntŭk Zalo săm F0. Rnôk râng tâm ntŭk aơ, hŏ geh ma rhiăng nŭih, geh nai dak si, nŭih ji ndrel ăp nŭih bah ji. Tâm rnôk săm nkhah êng ri nau râng rmôt Zalo kơl an gâp rklaih nau jâk tâm nau mĭn yor ăp nar gŭ knŭng tâm ngih. Ndrel ma nau ân hăn ngih dak si nkhah rgum kơt ntơm, ri săm tâm ngih ndrel ndơn nau mbơh, kơl an bah cán bộ nai dak si bah trong mạng xã hội mô knŭng kơl an ân gâp ma ăp nŭih ntưp Covid-19 kŏ ndơn saơ ueh, nơih êng đŏng”.

Tĭng nai dak si Ngô Mạnh Cường, Kruanh Ngih dak si Phường Ea Tam, nkuăl ƀon têh Buôn Ma Thuột, ntoh tă bah nau ngăn ăp nŭih ntưp srê Covid-19 kŏ geh nau ji mô jâk ndrel nau dơi săm tâm ăp ngih dak si mô lăng dăng ri ma âk F0 ŭch săm êng tâm ngih. Yơn lah, yor rmôt nai dak si mô âk, mô dơi tât ăp ngih gay ma kơl an ri dĭng mrôt kan hŏ dŏng mạng xã hội gay ma kơl nau mât, săm, tâm nê geh ndâk rmôt chat Zalo. Rmôt aơ yor ngih dak si ƀư ndrel nŭih tâm ngih dak si mât, ƀư nau mbơh, ntĭm ăp nau ŭch ôp bah ăp F0 săm tâm ngih. Aơ mô knŭng lah ntŭk ƀư nau mbơh ueh bah n’gâng kan dak si ma hôm lah ntŭk gay ăp nŭih ji Covid-19 tâm nchră, nkoch nau blau, bonh đă, tâm kơl ân ueh nau mĭn, n’huch nau khuch jêh bah srê Covid-19. Nai dak si Ngô Mạnh Cường, mbơh:

‘Rnôk aơ Phường Ea Tam geh nklăp 1.300 tât 1.400 nŭih F0 săm êng tâm ngih, Đah rnoh nŭih ji âk kơt ê ma mô geh trong Zalo ri mô gĭt dŭm âk cán bộ nau dak si mơ dĭng tŏng mât, yor nau kan ƀư ri âk ngăn, kơt uănh ăp nau: ji kop, siăk, jêr sŏ n’hâm, ji ntang ntơh, veh mrô oxy tâm manh (Spor2), ntĭm mbơh nau saơ ăp nau tât gay ma mbơh n’hâm soan ăp nar ndrel cán bộ ngih dak si uănh tâm nê, ntĭm nti nau săm”.

Nai dak si Cường ân lah, nau kơt dŏng công nghệ 4.0 tâm nau kan mât, săm nŭih ntưp srê Covid-19 lah nau nơih. Kơt lah đah nŭih hăn an ŭch geh săm ƀŭt gay ma rklaih rnôk nơm rlu ji kop geh kơl an bah bảo hiểm xã hội, rgâl ma leo nau ntrŭnh săm tâm ngih ân ăp nŭih ri cán bộ ngih dak si ân geh nau njoăl nau ntrŭnh tâm chat zalo lah ma  rhiăng nŭih geh ndơn, mô roh mông hăn ro. Ăp nŭih ji mô geh nau ji jâk ri knŭng ân geh nkhah tâm rmôt mô lah kuăl nŭih nai dak si ri geh bu kơl nkre. Ăp nau ueh aơ bah mạng xã hội dôl kơl an ueh ngăn ân nau njrăng rdâng srê Covid-19, n’huch nau jâk ir ân ngih dak si.

Tĭng nai dak si Lại Quang Miễn, Groi Giám đốc Ngih dak si nkuăl ƀon têh Buôn Ma Thuột, rnoh F0 hao ngăch tâm gleh khay ƀư nau jâk ngăn tâm ntrong kan dak si, ri ma nau ntrơn leo nŭih F0 mô lăng jâk săm êng tâm ngih lah nau tâm di Yơn lah, nŭih ji F0 mô gĭt ntă rnôk nau ji nơm jâk gay ma năn săm ri geh nau khuch tât nŭih. Ndri ma, nau dŏng chat Zalo nkoch tât nau mô gĭt mpeh ăp nau ji, nau săm, ngêt dak si ân tâm di mra leo tât nau ueh ân nŭih ji. Nkoch tât nau tam rnôk ndâk chat Zalo kơl an F0 săm tâm ngih, nai dak si Lại Quang Miễn nkoch:

‘Gay ma nơih ân nau ntrŭnh ƀư nau săm F0 tâm ngih, ntŭk ngih dak si hŏ ndâk luh rmôt chat Zalo. Rmôt aơ geh âk nau ueh, nau tam ngăn bôk năp lah gĭt kloh năn du đê̆ nau ntrŭnh mbơh bah rmôt ba lơ. Tal 2 lah tâm nchră mbơh nau kan tâm rnốk ăm. Tal pe lah nau dŏng dak si du trong ueh ngăn, đăp mpăn ndrel săk tam. Rmôt aơ kŏ geh mbơh kloh, knŭng mbơh mpeh nau kan, mpeh nau mât, êng nê mô geh nau tâm nchră nkô̆ êng. Rnôk aơ rmôt geh ntrŭnh tâm 25 ngih dak si, tâm nê geh 21 ngih dak si xã phường ndrel 4 ngih dak si ƀư êng”.

Nuĭh răk rblang: H' Thi