VOV4.M’nông: Khay bah năp, ta Dak Lak na nao geh ăp nău rmok dak ƀư âk kon se khĭt. Nău kan dơi kan dôl nsrôih ƀư âk trong mkra gay n’hŭch nău aơ.

Mhe pơh bah năp, ta Cư Pơng, nkuăl Krông Búk (Dak Lak geh nău rmok dak yô̆ nđach ƀư 3 oh yuh tâm du rnăk khĭt. Mon têh mhe 9 năm, mon jêt ngăn 5 năm. Yuh Nguyễn Thị Loan wa mon tơm bah ăp nuĭh khĭt, rngot yô̆:

“Nung nar mê̆ pơng hăn sĭt ri mon dăn mê̆ hăn bah kơi geh ntu ka uĕh gay pâl, mê̆ pơng mô an hăn, nkri lah hăn n’glău lah khĭt rmok. Pơng hăn pâl, nklăp n’gul mông bah kơi mô saơ ăp kon ri mư ndrăt săk nkah gĭt hăn joi. Rnôk hăn ri oh gâp nkah gĭt tât n’glău dak bah kơi kon dăn hăn rnôk nung nar jêng nchoăt tât, tât ta ntŭk ri saơ jep joi du mlĭt 2 mon jêt n’ông, mon bah kơi ăp nuĭh nhâp joi kơl mro yơn mô dơi”.

Tâm ăp nuĭh mô lap geh 2 oh lah kon hŏk Ngih sam ƀŭt Tiểu học Phạm Hồng Thái, xă Cư Pơng, Yơ Vũ Thị Vân-Hiệu trưởng ngih sam ƀŭt an gĭt, tâm ngih sam ƀŭt geh bể re, nchrăp dăm mih aơ, jêh rnôk srê Covid-19 hŭch oi ngih sam ƀŭt mbra pơk tay ăp jrô ntĭm re dak an kon hŏk. Ăp mon geh săk tâm sam ƀŭt nti re, yơn mô năn nti ri lĕ geh nău rmanh.

N’glău Ea Dhung Tiêng, xă Cư Pơng, nkuăl Krông Búk ntŭk 3 oh yuh tâm du rnăk geh rmok dak tâm pơh bah năp.

“Lah srê hŭch oi ri ngih sam ƀŭt mbra ƀư ăp jrô nti re dak an ăp kon. Mpeh đah tổng phụ trách đội nkoch trêng mro tât ăp kon đah nău blău njrăng n’gang rmok dak, rmanh yô̆ nđach gay mât njrăng đăp mpăn ăp kon. Bah sa ơm tât aƀaơ ngih sam ƀŭt mô hŏ geh nău yô̆ nđach kơt nĕ, dŭt rngot rnôk geh du tơ̆ roh 2 hê kon hŏk gơih blău nti n’hanh dŭt uĕh”.

Kơp uănh bah N’gâng kan Lao động Thương binh n’hanh Xã hội n’gor Dak Lak an saơ, năm 2020 ta n’gor geh 54 tơ̆ rmok dak ƀư 73 kon se khĭt; rnoh aơ bah năm 2021 lah 48 tơ̆ đah 51 nuĭh khĭt. Êng ăp nar dŭt khay 3/2022 mhe rlău lĕ geh 2 ŏ rmok dak ƀư 5 kon se khĭt ta nkuăl Ea Súp n’hanh Krông Búk.

Wa Nguyễn Duy Tuyết-Kruanh jrô kan Bảo trợ Xã hội, n’gâng kan Lao động thương binh n’hanh Xã hội Dak Lak nkoch, tâm đêt năm plơ̆ ma aơ, nu naư rmok dak ta kon se ta Dak Lak bôl geh hŭch, yơn hôm e âk, lơn lah geh âk tơ̆ rmok dak nsum. Ngih pah kan dơi kan n’hanh ăp ntŭk na nao đă nuĭh ƀon lan đăp mpăn an kon se, ngăn lah tâm rơh rlu nti dăm mih.

“Ngih pah kan Lao động Thương binh xã hội lah ntŭk ƀư tơm, n’gâng kan ƀon lan ta nkuăl, xă an nkoch trêng tât ăp me bơ̆, mô lah ăp nuĭh ntop kơl kon se êng an ƀa ƀơ groi nđôi kon se ta jay, mô an kon se hăn du hê tât ăp nkual dak me, dak n’glău klach rmok”.

Mpôl kan nău kan nsum mpôl ta ntŭk tât ntrŭt nsôr, tâm pă nău rngot, n’hanh an bơi 130 rkeh prăk an du rnăk geh 3 kon mâp rmanh ta xă Cư Pơng, nkuăl Krông Búk, n’gor Dak Lak.

Nkoch mpeh trong kan njrăng n’gang rmok dak an kon se, Wa Đỗ Tường Hiệp-Groi Kruanh n’gâng kan ntĭm nti Dak Lak mbơh.

“N”gâng kan ntĭm nti n’gor ntĭm rđău ăp ngih sam ƀŭt mĭn ntĭm nti mpeh nău blău rêh, mpeh njrăng n’gang rmok dak an kon hŏk; đă ăp nai bộ môn thể chất hăn tiăr nti gay ntop kơl ntĭm re an ăp kon hŏk. Ndâk njêng rnoh kôp njrăng n’gang rmanh yô̆ nđach tâm nĕ geh rmok dak ta lĕ rngôch ăp ngih sam ƀŭt, nsrôih tât năm 2030 ri n’hŭch 10% ăp nău rmok dak, tât năm 2025 ri geh 50% kon hŏk ta lam n’gor Dak Lak gĭt re”.

N’ăp rnăk wâl, ngih sam ƀŭt n’hanh lĕ kon nuĭh ndrel ty wât nău njrăng n’gang rmanh sôt săk an kon se tâm nĕ geh rmok dak, mpŏng ŭch tâm năm tât ta Dak Lak mbra mô hôm saơ ăp nău khĭt ôm yor rmok dak./.

          Nuĭh rblang: Y Sưng Phê Ja