Tâm ăp năm mhe aơ, nău âk bác sỹ dăn hăn rgâl ntŭk pah kan, rlu nău kan n’hanh mô dơi sơch geh bác sỹ lăp kan hŏ ƀư n’gâng kan dak si n’gor Kon Tum tŭp tâm nău mô tŏng bác sỹ. Ndrel đah ăp trong nkra ta năp măt, n’gor Kon Tum dôl ŭch geh trong nkra tâm di trong kơl mha êng tâm nău ntĭm nti tơm nuĭh kan rhŏ dŏng an n’gâng kan dak si.

 Tân Lập lah ngoăy 3 xã bah nkuâl Kon Rẫy, n’gor Kon Tum mô geh bác sỹ. Y sỹ Đa khoa Nguyễn Thị Thanh Tuyền, Kruanh nhih dak si xã Tân Lập an gĭt, nkô̆ lah khay 1 mhe aơ bác sỹ pah kan ta Nhih dak si dơi rgâl hăn pah kan ta Jrô but săm ji nkual Đăk Rve. Mô hôm geh bác sỹ, nău kan rnâng kan bah Nhih dak si xã Tân Lập dŭt mpăng đêt, mô dơn nê  ndơ dŏng but săm ji dơi ntuh kơl rvăt năp aƀaơ an ntlơi dơm:

“Rnôk ma bác sỹ mô geh du đêt ndơ rvăt năp ma ŭch  geh tât nău kan bah bác sỹ ntĭt kơt siêu âm, điện tim ri ta xã mô dơi tĭng ƀư đŏng ôh. Du đêt săk nchih kỹ thuật dơi ƀư ta nhih dak si xã ŭch geh bác sỹ ri tơm dak si tĭng nê đŏng, Nhih dak si geh bác sỹ ri dak si mơ dơi dŏng”.

Ta nkuâl Kon Rẫy, n’gor Kon Tum, nô nău mô tŏng bác sỹ hŏ ntoch jong âk năm. Năm 2023 Trung tâm Y tế nkuâl dơi jao rnoh âk 32 bác sỹ, yơn I ngăn aƀaơ dơn geh 17 bác sỹ. Nô nău bác sỹ dăn ntrơn du ntŭk pah kan n’hanh rlu nău kan way geh mbro đŏng. Ntơm bah năm 2019 tât aƀaơ hŏ geh 7 bác sỹ dăn  rlu kan tâm rnôk đơn vị mô dơi sơch lăp geh du  hê. Bác sỹ Nguyễn Luận, Groi  Giám đốc mât uănh nău kan Trung tâm Y tế nkuâl Kon Rẫy an gĭt, nău mô tŏng tât 15 bác sỹ dôl ƀư nhih dak si mâp dŭt âk jêr jŏt tâm nău ntĭm nti, n’hao nău gĭt blău kan tâm ban kơt nău but săm ji an nuĭh ƀon lan đŏng.

“Mô tŏng bác sỹ khuch tât nău kan but săm ji, mât chăm n’hâm suan an nuĭh ƀon lan  n’hanh pah kan njrăng n’gang kop ji tâm dâng, lơn lah an ƀư  ăp nău  kan  rhŏ dŏng kỹ thuật mhe gay n’hao săk tam mât chăm an nuĭh ji, bah ir geh nău ji ntrơn du tât ntŭk êng pah kan jêng tât roh huach tâm rnôk săm ji”. 

N’gâng kan dak si Kon Tum aƀaơ geh 539 bác sỹ, tâm nê ta n’gor geh 294 bác sỹ, ta nkuâl geh 146 bác sỹ n’hanh ta xã 99 bác sỹ. Nai  dak si ưu tú, Bác sỹ CKII Trần Ái, Groi Giám đốc Sở Y tế n’gor Kon Tum an gĭt, ntơm bah aơ tât năm 2030 n’gor ân geh tay nklăp 100 bác sỹ gay kơi ntop,  rgâl mhe đăp mpăn rnoh geh 10,5- 11 bác sỹ/10.000 nuĭh ƀon lan tâm rnôk nê nău sơch lăp bác sỹ mâp dŭt âk jêr jŏt:

“Sơch lăp nuĭh kan dak si tâm dâng mâp dŭt âk jêr jŏt, êng kơt năm 2023 đah rnoh âk sơch an nhih dak si tâm dâng lah 108 bác sỹ yơn mpôl hên dơn sơch lăp geh 23 bác sỹ. jêr jŏt lơn đŏng lah ăp bác sỹ tốt nghiệp đại học chính quy đa khoa dŭt đêt rnôk sĭt tâm xã, tâm nkuâl, mô ŭch sĭt. Aơ lah du nkô̆ nău dŭt jêr jŏt đah mpôl hên”.

Bah năp nô nău mô tŏng bác sỹ, n’gâng kan dak si n’gor Kon Tum dôl tâm rdâng đah trong ƀư tâm pleh bác sỹ đah ăp  gưl nhih dak si; rhuăt ăp bác sỹ ta ăp Nhih dak si xã ngai đah nklang nkual ntop n’hao an nkual jru ngai mô geh âk nuĭh  ji….Yơn lah, aơ lah trong nkra  manh lor dơm. Mpeh jŏ jong n’gâng kan dak si n’gor Kon Tum dôl dŭt ŭch geh trong nkra tâm di gay nkra bah nău mô tŏng bác sỹ kơt ntĭm nti tĭng ntŭk gŭ pah kan n’hanh ntĭm nti đă sơch hăn.

Mhe aơ ta rơh pah kan đah Mpôl pah kan bah Chính phủ, wa Y Ngọc, Groi kruanh UBND n’gor Kon Tum hŏ dăn đă đah Chính phủ mĭn uănh, geh trong kơl mha êng gay ntĭm nti bác sỹ ta ntŭk, kơl n’gor nkra bah nô nău mô tŏng bác sỹ tâm dâng kơt aƀaơ. Wa Y Ngọc an lah đŏng, lah mô geh trong kơl ntĭm nti bác sỹ lah nuĭh rnoi mpôl  đê̆, nuĭh gŭ rêh ta ntŭk ri ntơm bah 5 năm tât 10  năm tay đŏng mbra geh ma nău ta nkual jru, nkual ngai, nkual ƀon lan rnoi mpôl đê̆ bah n’gor Kon Tum mbra mô geh bác sỹ./