Rgum tâm rlong wăch rlăi 40 ntŭk ntĭm nti mầm non ta 10 nkuăl, nkual ƀon têh bah n’gor Kon Tum râng. Du rmôt tâm rlong geh 3 nuĭh, tâm rlong ta 2 gưl nău nti n’hanh ƀư ngăn. Gưl tâm rlong nău nti, ăp rmôt ndâk ƀư nchih ndơ sa an kon se mầm non nkre sam ƀŭt nkoch rblang na nê̆ ndơ dŏng, ƀư nkret gâm ndơ sa.

Gưl ƀư ngăn, ăp nai n’hanh nuĭh kan mât rong bah tĭng rmôt tât nkret gâm 10 nuĭh sa nung nar n’hanh sa kêng măng bah kon se đah rnoh prăk 20 rbăn/du tơ̆ sa/du nar. Ăp ndơ sa an đăp mpăn tŏng 4 rmôt ndơ sa, geh: chất đạm, ngi, rnih n’hanh vitamin. Rgum tâm rlong di an cán bộ mât uănh, nai, nuĭh pah kan ta ăp ntŭk ntĭm nti mầm non tâm mâp, tâm ntĭ nău blău kan; mât uĕh nău dơi mĭn ƀư mhe ƀư tâm nar sa an kon se, kơt ndâk ƀư rnoh sa, ndâk âk nuĭh sa, nchih ndơ sa ăp nar, tĭng pơh, tĭng yan, bah nĕ, kơl săch geh âk ndơ sa kah, gay nar sa bah kon se ntop uĕh n’hanh đăp mpăn ndơ sa kah.