VOV4.M’nông: Ta n’gor Kon Tum bah âk năm aơ lĕ geh nău nai dak si ta ăp ntŭk ngih dak si ngih dak hăn trơn nău kan n’hanh rlu kan. Đah n’gor nkual yôk hôm e âk jêr jŏt kơt Kon Tum, nău mô tŏng nuĭh kan, ngăn lah nuĭh kan geh nău blău ơm, nti têh nău kan dak si dôl rvê tâm nău kan mât uănh săk soan nuĭh ƀon lan. Ta năp nău ngăn aơ, n’gor Kon Tum lĕ geh âk trong mkra gay mât nuĭh kan dak si. Nău lah bah Khoa Điềm, gŭ kan ta nkual Tây Nguyên.

Kơp bah năm 2018 tât aƀaơ geh 59 nai dak si, dược sỹ nti đại học pah kan ta ăp ngih dak si ngih dak bah n’gor Kon Tum dăn trơn nău kan n’hanh rlu kan. Êng 6 khay bah năp ta n’gor aơ lĕ geh 3 nai dak si n’hanh du hê dược sỹ rlu đah nău kan ngih dak. Wa Huỳnh Thị Hồng, ntoh măt HĐND n’gor Kon Tum nkoch nău rvê bah năp nău nuĭh kan geh nău blău ơm, nti têh bah nău kan dak si dôh ao hăn rlu:

“Ngih dak si Đa khoa n’gor Kon Tum bah hạng II hao hạng I têh hvi 750 nsưng ji joi an geh tŏng ăp nuĭh kan. Nai dak si n’hanh nuĭh kan dak si dăn ntlơi nău kan mô lah trơn nkual dơh gay pah kan jŏ jong mbra jêng tât nău mô tŏng nuĭh kan dak si uĕh blău lơn đŏng lah ta ngih dak si ngih dak”.

Nai dak si Ngih dak si Đa khoa Kon Tum mô ru rhŏ an nuĭh ƀon lan tât but săm ji.

Tĭng wa Lê Ngọc Tuấn, Kruanh UBND n’gor Kon Tum, nkô̆ nău khlay ƀư du năm n’gor geh rlău 14 nai dak si, dược sỹ dăn trơn ntŭk kan, rlu kan lah nău prăk khay n’hanh ndoh ndơ pah kan. N’hêl na nê̆ an saơ prăk khay, ndoh ndơ pah kan ta ăp ngih dak si ngih dak bah n’gor đêt lơn nkôp đah prăk khay, ndoh ndơ pah kan ta ngih dak si ƀư êng kơt âk n’gor nkual ƀon têh êng. Yor nê tĭng wa Lê Ngọc Tuấn gay mât nuĭh kan dak si an geh trong mkra dôh rklaih jêr jŏt an ngih dak si ngih dak.

“Gay mât jâng rmôt y nai dak si an rgâl n’hao prăk khay an rmôt y nai dak si dôl pah kan ta ngih dak si ngih dak. Ntuh kơl ngih wâl ndoh ndơ, năp rwăt ndơ ntŭk pah kan an rmôt aơ uĕh lơn. Geh nău kơl an, nău kơl hăn ntĭm nti n’hanh an n’hao nău ƀư tơm êng an ăp ngih dak si ngih dak gay nta ntop hao prăk khay an rmôt y nai dak si dôl pah kan tâm nău kan”.

Nuĭh kan dak si n’gor Kon Tum tâm ăp nar duh jêr chôt srê Covid-19.

Tĭng wa Lê Ngọc Tuấn, kruanh UBND n’gor Kon Tum, bah năp nău ngăn nai dak si ta ăp ngih dak si ngih dak dăn trơn ntŭk kan n’hanh rlu kan, năm 2020 Ban Thường vụ N’gor ủy Kon Tum lĕ geh nău ntrŭnh kơl an đah cán bộ công chức nău kan dak si rnôk hăn nti chuyên khoa I, chuyên khoa II dơi geh nău kơl ntĭm nti bah tơm prăk. UBND n’gor Kon Tum lĕ an nău rgop tâm nchră hun hao nuĭh kan bah n’gor tât năm 2030, uănh tât năm 2050, tâm nĕ n’gluh an trong mkra gay hun hao nuĭh kan an nău kan dak si. Yơn lah n’hêl na nê̆ an saơ, ăp nău ntrŭnh, nău kơl gay mât jâng nuĭh kan dak si bah n’gor Kon Tum mô hŏ dơi ƀư tĭng săk rnglăy n’hanh mô tâm ban jêng hôm e geh nău cán bộ, nuĭh kan dak si dăn trơn ntŭk kan, rlu kan luh ngih dak si ngih dak./.

          Nuĭh rblang: Y Sưng Phê Ja