VOV4.M’nông – Kêng măng 28/6, Kruanh dak Nguyễn Xuân Phúc lĕ râng ƀư nkah gĭt 50 năm ndâk njêng Tổng Công ty Dược Việt Nam n’hanh an Huân chương Lao động Hạng nhất an Tổng Công ty. Ndơn măt kruanh Đảng, Ngih dak, Kruanh dak kơp dơn, uănh lah prêh, rnê rhơn ăp nău ƀư Tổng công ty Dược Việt Nam n’hanh ăp doanh nghiệp nuĭh kan ndrel rlău 50 năm bah năp, rgop hun hao nău kan công nghiệp dược Việt Nam n’hanh nău kan mât uănh n’hanh mât chăm săk soan nuĭh ƀon lan. Ntoh lư ăp nău rgop khlay tâm nău đăp mpăn rnoh khlay dak si, tŏng ăp dăp rgâl, ntil dak si, rnoh dak si, uĕh tam dak si n’hanh tâm pă tâm ban dak si njrăng n’gang, săm ji an nuĭh ƀon lan; ƀư uĕh nău kan dơi jao mpeh ntêm nkrem, dŏng dak si ngih dak. Ta năp rnôk âk ntŭk but uănh săm ji lam dak mô tŏng dak si n’hanh ndơ dak si, Kruanh dak Nguyễn Xuân Phúc đă Chính phủ n’hanh nău kan dak si ơm mkra nu nău aơ. Kruanh dak nkoch nău ngăn, ntơm geh 41 n’gor, nkual ƀon têh mô tŏng dak si, ndơ dak si.

Nuĭh rlang: Y Sưng Phê Ja