VOV4.M’nông- Nar 24/7, n’gâng kan dak si rƀŭn nchră trực tuyến đah ăp nuĭh way kan tâm n’hanh dak bah dih mpeh nău ji duh rtoh ta săk bâh dôk. Rơh rƀŭn nchră lĕ dơn ngoăy uănh năl tât nar 24/7/2022, Việt Nam ê hŏ geh kơp dơn nuĭh ntưp nău ji duh rtoh luh ta săk bâh dôk. Yơn lah mbra geh ntưp nuh srê aơ ta dak he n’hanh mbra geh tâm ntưp lah dŭt âk, yor nuh srê lĕ geh ntưp ta âk ngih dak, nău hăn nsong tâm mâp tâm nđur dơh nơih aƀaơ n’hanh mbra geh ntưp đah Việt Nam n’hanh ăp dak ta lam ntur neh, ta nkual. N’gâng kan dak si lĕ geh sƀ ntrŭnh njoăl an Ủy ban nhân dân ăp n’gor, nkuăl ƀon têh mpeh n’hao ŭnh nđôi nău nuh srê luh rtoh ta săk bâh dôk, nchrăp na nê̆ ăp ntil dak si, ndơ xét nghiệm kơl an nău uănh năl, uănh nuĭh ji, ăp ntŭk kan dak si n’hao nău uănh nđôi ăp nuĭh geh ntôn ntưp ta n’har bri, ta ăp ntŭk kan dak si n’hanh ntŭk kan mbơh nău n’hao nău gĭt vât an nuĭh ƀon lan mpeh nău nuh srê luh rtoh ta săk bâh dôk n’yhanh ăp trong kan njrăng rdâng ngăch ndal.

Nuĭh rblang: Thị Đoắt