Ndrel đah ăp n’gor tâm lam dak, n’gor Ninh Bình lah ngoai tâm ăp n’gor têh geh bơi tât 100 lễ hội têh, jê̆ geh ƀư tâm bôk năm mhe. Tâm nê, geh ăp nau ƀư ueh, rgum âk năch tât pâl n’aih. Wa Phùng Văn Giang, Groi Kruanh n’gâng kan mât đăp mpăn ndơ ngêt sa n’gor Ninh Bình mbơh: Yan lễ hội năm 2023, Rnâng kan rđau nau mât kloh ndơ ngêt sa bah n’gor Ninh Bình hŏ nchrăp nau kan, mêt uănh ăp ntŭk tăch ndơ sa, đăp mpăn ndơ sa tâm lôch nau kan:

‘Bôk năp lah rgum âk ăp ndơ dŏng ndrel ntŭk nkoch mbơh nau gay ma nkoch trêng ăp nau ntrŭnh bah Ngih dak mpeh nau đăp mpăn ndơ ngêt sa tâm ê nkra ndrel tăch rgâl. Ndrel ntĭm nŭih ƀon lan săch ăp ntil ndơ sa ân gâm sa ân kloh, rgum tâm ăp ntil ndơ ma geh dŏng sa âk tâm lễ hội. Nkre lah, ntơm lơ 15/12/2022 tât 15/3/2023 ri ăp rmôt kan bah n’gor kŏ ntơm ƀư ăp nau nkoch trêng mpeh nau đăp mpăn ndơ ngêt sa ndrel ƀư ăp rmôt kan, ntŭk kan, mêt uănh ndơ ngêt sa răk kloh gay ma ơm saơ ndrel năl rklaih lơi ăp nau tih mpeh ndơ ngêt sa”.

 Lễ hội Chùa Hương tâm xã Hương Sơn, nkuăl Mỹ Đức, nkuăl ƀon têh Hà Nội lah lễ hội geh nar ƀư jŏ ngăn, tâm 3 khay. Wa Nguyễn Bá Hiển, Kruanh Rnâng kan mât ntŭk ƀư ơm ueh ăp ntil bah Hương Sơn mbơh: Hŏ ndâk du rmôt ƀư nau kan mpeh nau răk kloh ndơ ngêt sa ndrel rklaih rjăp nau nau rŏng ma ƀư tih nau ntrŭnh:

‘Phung hên hŏ ndâk rmôt mêt uănh, tâm nê geh dak si, mât ntŭk ntu gŭ âm ndrel ăp nau kan geh tât n’gâng kan bah nkuăl tâm ntŭk gay ma grum ntĭm mbơh ndrel ma nkoch trêng ân kônh wa, mô lah rklaih ăp nau rŏng ma ƀư tih, mô tĭng nau ntrŭnh bah rnâng kan lễ hội Chùa Hương tâm nau răk kloh ndơ ngêt sa kŏ kơt lah lir nchih rnoh mbơh kloh tâm ăp ntŭk tăch ndơ”.

Tĭng nau nchrăp ngăn “N’hao nau mêt uănh, tĭng mêt ndrel njrăng rjăp ngăn nau geh tât ndơ sa mô kloh tâm rnôk lễ hội 2023”, N’gâng kan mât ntŭk tăch ndoh ndơ rđau ân N’gâng kan mât ntŭk tăch ndơ bah ăp n’gor, nkuăl ƀon têh n’hao nau tâm rgop đah ăp mrôt kan mêt uănh, nkân njrăng rjăp tâm ăp ntŭk, ntŭk rgum ndoh ndơ êp nkuăl n’har bri, ăp ntŭk tăch ndơ ậk, siêu thị, chợ bôk tơm, ntŭk mât ndơ sa ân n’ik, ăp rmôt ƀư nau rvăt tă bah dak ba dih tăch ndơ sa ân n’ik...Nkre lah, đă rklaih rjăp đah ăp ntil ndơ mô kloh tu tơm gay ma njrăng rdâng lơi nau geh ndơ sa mô kloh, mô geh đăp mpăn. Wa Nguyễn Đức Lê, Groi Kruanh n’gâng kan Nghiệm vụ, N’gâng kan mât đăp mpăn nau kan tăch rgâl, mbơh:

 “Phung he ân ntrơn ntơm bah prăk jêng nau kan mêt uănh ba kơi nê, gay mhâm ƀư ân ăp ntŭk ƀư nau kan ê nkra, tăch rvăt lăp dak nơm, tăch rgâl ăp ntil ndơ sa ngăch leo luh ăp ntil ndơ ma nơm gay ma leo dŏng kơl pă ân nŭih dŏng sa. Yơn lah, jêh mêt uănh rnôk ma nơm saơ ăp nau tih mô lah ăp ntil ndơ mô kloh tu tơm geh nau tih rnôk nê hŏ leuh luh tât ntŭk tăch âk rnoh ndoh ndơ. Nau kan sŏk nsĭt lơi kŏ kơt lah nau rklaih ri păng mâp âk nau jêr. Ma ngăn lah rnôk nê nŭih dŏng sa hŏ geh dŏng sa ăp ntil ndơ sa mô kloh, mô lah ndơ sa mô geh dơi răk kloh ri hŏ geh du gưl khuch tât n’hâm soan, ndri ma hên ndơn saơ nau nê ri ma N’gâng kan mât ntŭk ntu tăch rgâl mât kloh ndơ sa mro leo luh ăp nau rdâng ăp nau tih tâm nau rakư kloh ndơ sa ân geh hao tât bôk năp”.

Rnâng kan rđau nau kan bah ăp ntŭk kan Trung ương mpeh nau răk kloh ndơ ngêt sa lah rjăp: yan lễ hội năm 2023 geh nau khlay, yor lah rnôk ntơm ndâk jêh yan srê ji. Ndri ma, ăp N’gâng kan, ntŭk kan, nkuăl, rmôt ƀư nau kan ân geh tâm rgop nsum ân rjăp, ntrŭt dăng nau kơp uănh, ƀư nơih ngăch ăp nau kan hành chính tâm rnôk mêt uănh đah ăp ntil ndơ geh rvăt lăp tă bah dak ba dih. Tĭng nê, lŏ ƀư nau kan, ntrong kan ân ngăn, gay ma ntrŭt dăng, bonh đă gay ma leo ăp ntil ndơ sa ân kloh, ndơ sa hữu cơ lăp tâm ntrong pă tăch. Ngăn lah ân geh nkah, ndơ sa ân geh nau ntĭm nti ân rjăp, ndơ sa ân tâm di mpeh nau mât đăp mpăn ndơ ngêt sa rnôk tăch tâm ăp ntrong mạng xã hội. Nau kan mêt uănh, nkoch mbơh nau mpeh nau nkoch mbơh tât ndơ đăp mpăn ndơ ngêt sa geh ntrŭt dăng, ƀa ƀơ, mro mrăng gay ma n’hao nau gĭt, kơt tĭng pháp luật bah nŭih ê nkra, tăch rgâl ndơ ngêt sa, mât đăp mpăn ân nŭih năch rvăt dŏng sa tâm rnôk lôch năm mhe, hăn pâl n’aih./.