Chơ Chun lah xă n’har bri dŭt jêr jŏt bah nkuăl yôk Nam Giang, n’gor Quảng Nam. Xă aơ geh 3 thôn đah bơi 250 rnăk, dŭt âk lah nuĭh Cơ Tu. Gĭt tăng geh mpôl pah kan Quân y tahen n’har bri Quảng Nam ƀư but uănh ji n’hanh phăt dak si an dơm ta xă Chơ Chun, ôi rŭk, wa A Viết Mư n’hanh nuĭh ƀon lan thôn Blăng, xă chơ Chun, nkuăl Nam Giang lĕ rlet hăn trong ngai gay geh măt ta ntŭk but uănh ji. Wa lah:

Way ŭch but uănh ji ri hăn ăp ngih dak si ta nkual ƀon têh Đà Nẵng mô lah nkuăl Đại Lộc, n’gor Quảng Nam, yơn mpôl hên lŏ mô geh prăk, mô geh ndeh, mô dơi hăn but uănh. Nar aơ geh oh nô tahen hăn but uănh an nuĭh ƀon lan nkual prêh n’har bri, gâp đăp mpăn hôm”.

Rlău ma but uănh lĕ rngôch n’hanh pă dak si an dơn an nuĭh ƀon lan, ăp y, nai dak si Quân y Tahen n’har bri Quảng Nam hôm djôt n’ăp ndoh ndơ dak si mhe gay dơi but uănh n’hanh săm ăp ntil nău ji ma nuĭh ƀon lan nkual yôk way ôp kơt trong proch, trong n’hâm, play nuih, thần kinh, nting... Bah nĕ, mbơh ntĭm an nuĭh ƀon lan săm tâm di, nkoch trêng, ntĭm nuĭh ƀon lan răk kloh uĕh ntô ntô gŭ âm, njrăng n’gang ăp srê tâm ntưp. Wa Riah Pêl, Kruanh UBND xă Chơ Chun; nkuăl Nam Giang an gĭt, năm bah năp nuĭh ƀon lan ntơm jăng lơi ăp nău rlŭk mâl, mô hôm djăt n’hŭm hŭm rnôk geh kop ji, deh nse...

“Nău aơ nta nơih ngăn an ăp nuĭh ji ta lam xă. Du đêt nuĭh ji mbăn ri dơi gĭt kop ji n’hanh ndơ̆ gưl bah lơ”.

Du năm, ăp nai dak si ntăr grat put lĕ tât ăp ƀon lan jru ngai ngăn ta nkual n’har bri Việt-Lào gay ƀư âk rơh săm ji an nuĭh ƀon lan. Khân pơng mô knŭng săm ji ngăch âk nuĭh ji mbăn, ma hôm kơl an nuĭh ƀon lan nkual prêh Quảng Nam n’hanh nuĭh ƀon lan n’gor Sê Kông, dak băl Lào geh dơi gĭt đah ăp ntil nu nău dak si mhe. Quân y tahen n’har bri hôm ƀư nkoch trêng, mbơh tơih nău wât mpeh njrăng n’gang srê kơt ji kop sâr, jâng ty mbung, duh rtoh luh mham rih... Ăp y, nai dak si dŭt n’hâm, kônh wa tât ri mât uănh, but uănh ji, mô an kônh wa kâp jŏ, gay kônh wa hăn kan. Thượng tá, Nai dak sai Lê Đức Mạnh, Chủ nhiệm Quân y Tahen n’har bri Quang Nam an gĭt, âk nuĭh dơi saơ kop ji n’hanh săm ngăch, nuĭh ƀon lan ntlơi nău way ơm rluk mâl:

“Tă bah ăp nău ƀư ƀa ƀơ kơt aơ, lĕ kơl rmôt Tahen n’har bri n’gor Quảng Nam ndâk njêng nău tâm rnglăp dăch deh đah kônh wa nuĭh ƀon lan n’har bri. Bah aơ, kônh wa lơ ntop tay nsing nơm Tahen n’har bri, rgop mât njrăng nâp nâl ƀư tơm n’har bri neh dak”.

Đại tá Hoàng Văn Mẫn, Chính ủy N’gâng kan ntĭm rđău tahen n’har bri n’gor Quảng Nam an gĭt, năm e, nkah gĭt 60 năm Việt Nam-Lào ndâk njêng tâm boh tâm rnglăp nchră nău n’hanh 45 năm nar ký ton Hiệp ước dăch dêh n’hanh kan ndrel Việt Nam-Lào, Đoàn druh ndăm Ngih dak si 199 (N’gâng kan Công an) tâm rgop đah Doanh nghiệp xă hội Vạn Phúc n’hanh Pôih tahen n’har bri Nam Giang, n’gor Quảng Nam lĕ ƀư bôk nău kan “Rơh tăch ndơ mô sŏk prăk Việt-Lào”, tâm rgop but uănh săk soan, pă an si an dơn an nuĭh ƀon lan Lào ta mpông n’har bri Nam Giang, n’gor Quang Nam. Ăp y, nai dak si Ngih dak si 199, N’gâng kan Công an gŭ ta nkual ƀon têh Đà Nẵng tâm rgop but uănh săk soan, mbơh ntĭm n’hanh pă dak si an dơm an lĕ rngôch ăp nuĭh ƀon lan râng bôk nău kan. Đại tá Hoàng Văn Mẫn, Chính ủy N’gâng kan ntĭm rđău tahen n’har bri n’gor Quảng Nam mĭn lah:

“Tâm nău tâm boh tâm bên dăch dêh Việt Nam-Lào lah nsum n’hanh Quảng Nam-Sê Kông lah êng dơi lah dŭt n’hâm ntrong leo. Mpôl hên mât uĕh nău way ơm nĕ ndrel ndâk njêng tâm boh tâm rnglăp 2 ding n’har bri nar lơ dăch dêh, kan ndrel n’hanh ntrong leo lor dŭt n’hâm”.

Ta “Rơh mpla tăch ndơ mô sŏk prăk Việt-Lào, ăp doanh nghiệp hăn ndrel, Tahen n’har bri n’gor Quảng Nam, Pôih tahen n’har bri Nam Giang an 700 nklâm ndơ. Du nklâm khlay 300 rbăn prăk, geh ndơ ngêt sa, ndơ dŏng, kho ao... an nuĭh ƀon lan ăp rnoi nuĭh Lào ta nkuăl Đắk Chưng, n’gor Sê Kong (Lào) rêh êp n’har bri Việt-Lào nău rêh jêr jŏt.