VOV4.M’nông: Tây Nguyên lĕ ntơm tâm yan mih, lah yan hô ngăn bah ăp nău kop srê tâm ntưp kơt duh siêu vi, duh rtoh luh mham rih, siăk lơh, kop srê ta ntô săk... M’hâm ƀư gay dơi mât njrăng săk soan tâm yan mih ? nkô̆ trăch nar nkoch du đêt trong kônh wa n’hanh băl mpôl njrăng gay mât uănh săk soan tâm yan mih nđĭk ta Tây Nguyên.

Rao ty ƀa ƀơ, mât uănh săk jăn rnôk hăn tâm mih.

 Mih âk, ƀư duh r’ôl âk, jêng aơ lah ntŭk ntô uĕh an ăp kaman tâm ntưp gŭ âk lơn. Lah geh tâm mâp đah ăp ndơ geh kaman yor nuĭh ji n’glơi an, trong chŏl nău ji bah he mbra mâp geh. Yor nê, gay njrăng, kônh wa an ƀa ƀơ rao ty đah xa ƀu mô lah dak duh, lơn lah lor rnôk sông sa mô lah jêh rnôk ăch chrach gay kaman mô dơi lăp tâm săk.

Kaman dơi lăp tâm săk kon nuĭh tă bah măt, muh n’hanh mbung.

 Yor rĭ, gay mât njrăng săk jăn tâm yan mih, mô dơi dŏng ty jut măt mô lah jut dak rhal ma ndơn nĕ dŏng bok kloh mô lah bok jut măt. Du nău mô đêt khlay lah rao măt ƀa ƀơ gay jăng lơi ăp kaman, dŏng dak rao ty puh kaman mô lah dak puh rao dơi đă dŏng tâm yan phŭt sial.

Rnôk hăn tâm mih jŏ ir, kônh wa an ŭm tay săk gay kơl săk đăp mpăn n’hanh tâm ban duh nđĭk. Kônh wa an sa du ngan trău mô lah ngêt du ka chok dak toh duh. Nău aơ mbra kơl dêr nu nău siăk nđĭk mô lah jăng lơi ăp kaman ƀu bih grăi ƀư kop ji yor săk rgâl duh nđĭk ndal.

Kônh wa an nkah gĭt đŏng, mô dơi sa ndơ sa ta bah dih trong:

 Ndơ sa gâm sĭn n’hanh tăch bah dih trôk dơi mbra mâp đah ăp ntil nău kop srê n’hanh kaman tâm n’hâm sial n’hanh dak. Yor rĭ, uĕh ngăn, du rnăk an sông sa ăp ndơ sa rih, gâm ta jay gay mât njrăng săk jăn tâm yan mih.

Khlay lơn lah geh nău wât njrăng n’gang măch kăp: Trôk nar nđĭt bêh lah ntŭk an măch deh n’hanh hun hao. Gay njrăng n’gang măch, an ƀa ƀơ mât ngih wâl kloh nsơh; an uănh ăp yăng nkao, mpôi krih dak, trong dak hoch, ăp ntŭk tâm jay ntŭk way nkân dak n’hanh jŭt rao kloh. Rlău ma nĕ, kônh wa dơi dŏng dak si krih măch, nhang măch tâm jrô mô lah m’hĭng kem măch ta săk, lơn lah rnôk hăn bah dih.

Ntop vitamin, ƀư tĭng ndơ ngêt sa kloh uĕh:

Kônh wa n’hanh lĕ băl mpôl njrăng an ndâk njêng soan chol nău ji bah săk đah trong ntop vitamin C n’hanh E ndơ geh ơm mô lah sa ăp ntil ndơ sông sa ntop tay. Ăp ntiol vitamin aơ mbra ntrŭt ăp nău chŏl kơl ntlơi kaman siăk duh ngăch lơn n’hanh ƀư n’hŭch mbăn bah kop ji. Tâm ndơ sa ăp nar an geh ăp ntil play rih n’hanh biăp bum âk vitamin A, E, C, n’hanh B, âk chất njrăng n’gang oxy hoa n’hanh khoáng chất. Rlău nĕ tay, sa du đêt trău duh ăp nar mô knŭng kơl kônh wa n’hanh băl mpôl tâm ban tay duh bah săk tâm yan mih ma hôm geh ndơ kah gay ntop dơi chŏl ăp nău ji.

Hăn thể dục ƀa ƀơ.

Tiăr nti săk soan lah ngoăy tâm âk nău săch mô dơi jăng tâm nău mât njrăng săk jăn tâm yan mih. Rnôk săk mpât n’gơ, mbra ngăch dăng n’hanh dơi rgâl jêng duh săk. Nău aơ mbra kơl săk he nchăng n’gang trôk bri nđĭk bah dih trôk.

          Nuĭh rblang: Y Sưng Phê Ja