Mhe rlău, Đại hội rơh tal 4, năm kan 2023-2028 bah Rmôt kan Nai dak si druh ndăm n’gor Dak Lak lĕ mĭn nău rƀŏng khlay lah: Mât uĕh ăp nău ƀư kơl kan yor săk soan nsum mpôl; ntrôl dăng nău kan bah chi hội Nai dak si druh ndăm ta ăp ntŭk ƀon lan gŭ. Đah nău mbơh ƀư “Nai dak si druh ndăm Dak Lak ƀư tĭng nău wa, kơl kan yor săk soan nsum mpôl”, tâm năm kan mhe, Rmôt kan dak si druh ndăm n’gor Dak Lak mât uĕh tay ƀư tơm n’hanh n’hâm soan bah hội viên tă bah ăp bôk nău kan nti, tiăr nti, n’hao nău wât nău rêh; mât uĕh nău mĭn ƀư mhe tâm mĭn njêng khoa học n’hanh trôl dăng nău ƀư kơl kan yor săk soan nsum mpôl. Nai dak si Phan Thành Trinh, Kruanh Rmôt kan dak si druh ndăm n’gor Dak Lak khóa 4 an gĭt:

Rmôt nai dak si druh ndăm Dak Lak ƀư ăp nkô̆ nău kan bah nơm đah 3 nkô̆ nău đah 3 nkô̆ nău khlay, dŭt âk rgum tâm ăp nău kan nai dak si druh ndăm kơl kan yor nău rêh nsum mpôl; mât uĕh nău ƀư tơm xung kích bah nơm ta ăp ntŭk, nkual. N’hanh nău kan bah ăp chi hội nai dak si druh ndăm ta ăp nkuăl tâm năm tât mbra dăng lơn, ăp nô, oh yuh mbra dơi mât ƀư tơm bah nơm ta ntŭk nơm mât uănh.

Rmôt kan Nai dak si druh ndăm n’gor Dak Lak aƀaơ geh 16 chi hội mpeh tâm n’gor đah bơi 1.000 nuĭh lah ăp y nai dak si druh ndăm dôl pah kan ta ăp ngih dak bah gưl n’gor tât gưl nkuăl n’hanh ăp ngih dak si ƀư êng tâm n’gor. Tâm 5 năm bah năp, ăp gưl rmôt Nai dak si druh ndăm tâm n’gor lĕ geh âk nău ƀư kơl kan yor săk soan nsum mpôl kơt: Ƀư 120 rơh but uănh ji, mbơh ntĭm săk soan, pă dak si an dơm an 86.000 nuĭh đah rnoh prăk rlău 4,2 rmen prăk; tiăr nti ăp trong but săm ngăch an hang rbăn nai ăp ngih sam ƀŭt mầm non, tiểu học tâm lam n’gor. Ƀư nar rgum rao ty đah xa ƀu; tiăr nti mpeh trong kan nkoch trêng ntĭm nti săk soan deh nse nuĭh druh ndăm, njrăng n’gang srê an hang rbăn kon hŏc, sinh viên. Mbơh ƀư bôk nău kan Ntop soan an nuĭh ji ta 14 ngih dak si tâm lam n’gor. Ndrel đah nĕ, Rmôt kan ƀư 1 nău kan kơl kan lam ntŭr neh ta Campuchia gay bŭt săm ji, mbơh ntĭm săk soan n’hanh pă dak si an dơm an nuĭh ƀon lan, an ndeh wah jâng an kon hŏk geh nău rêh jêr jŏt.

Dŭt năm 2023 mhe rlău, ta thủ đô Hà Nội, Rmôt kan dak si druh ndăm Việt Nam lĕ ƀư bôk nău kan “Rgâl mrô yor săk soan klơm soh’ but, uănh săch ji Ung thư klơm soh n’hanh ăp nău ji mpeh klơm soh. Bôk nău kan but uănh săch lor kơt dŏng công nghệ mhe yor ăp nai dak si bah ăp ngih dak ji ƀư tĭng. Đah ăp nău ƀŭt but uănh lĕ rngôch, chụp X-quang, siêu âm, điện tim, điện tâm đồ, uănh nđôi sĭk mham, xét nghiệp chrach njŭng, ngi mham... dơi nuĭh ƀon lan uănh lah prêh. Du hê nuĭh ji lah:

Gâp dơi weh huyết áp n’hanh sŏk mham gay rlong uănh, ndrĭ aƀaơ kâp gay chŭp klơm soh, hôm an siêu âm tay, gâp dŭt kơl bôk nău kan aơ. Dăn lah uĕh Ngih dak uănh tât nuĭh ƀon lan.

Aơ lah bôk nău kan but uănh an dơm gay saơ ngăch ăp nuĭh geh dơi geh ntưp ji ung thư klơm n’hanh ăp nău ji klach mpeh klơm soh, ntop kơl nking n’gang mât soan n’hanh săm ngăch, n’hŭch đêt ngăn klach khĭt nuĭh, geh khuch tât ăp nău kan n’hanh săk soan, rgop mât đăp mpăn nău rêh jêng, n’hao uĕh nău rêh bah nuĭh ƀon lan Việt Nam. Nai dak si Hà Anh Đức, Chánh văn phòng, N’gâng kan dak si, Kruanh Rmôt kan nai dak si druh ndăm Việt Nam an gĭt:

Nău uănh săch ơm, saơ ơm, săm ngăch ri mbra kơl an nuĭh ji bu njong jŏ dơi rêh, nău rêh n’hanh n’hao uĕh n’hanh kơl n’hŭch prăk ma kon nuĭh an mbak anh. Rmôt kan dak si druh ndăm mpôl hên ŭch n’gluh an nĕ lah geh trong ƀư tâm di, kơl an ƀư n’hŭch prăk đêt ngăn, săk rnglăy âk ngăn, nuĭh ji dơi geh n’hanh cán bộ dak si ƀư di trong đŏng, dơi saơ di nuĭh ji gay ndơ̆ hăn săch.

Bôk nău kan ‘Rgâl mrô yor săk soan klơm soh’ bu uănh săch lor ji ung thư klơm soh ta 5 n’gor, nkual ƀon têh tâm năm 2023 n’hanh 2024. Bôk nău kan rƀŏng tĭng but uănh săch lor an dơm ji ung thư klơm soh n’hanh ăp nău ji mpeh klơm soh êng an rlău 50.000 nuĭh ƀon lan. Ta năp nĕ bôk nău kan lĕ dơi ƀư ta nkual ƀon têh Hồ Chí Minh, aƀaơ bôk nău kan dơi mbơh ƀư tay ta ăp nkual ƀon têh Hà Nội, Cần Thơ, Đà Nẵng n’hanh n’gor Thừa Thiên Huế, đah tât râng bah bơi 1000 y nai dak si.