Yuh H’Dung Niê ta ƀon Tơng Jŭ, xă Ea Kao, nkual ƀon têh Buôn Ma Thuột, n’gor Dak Lak nkoch: Bah năp đaơ nuĭh rnoi Êđê mô hŏ hăn nti âk, mô hŏ gĭt jêng ăp rnôk rnăk wâl kop ji mô dơi hăn tât ngih dak si săm ji, ma way săm đah ăp dak si ƀon lan, săm ji đah n’hum gay dăn brah yang să, bah. Yơn aƀaơ lĕ êng.

“Bah rnôk geh uănh mĭn bah Đảng, Ngih dak, bah dak si bâh ƀon tât xă, nkual ƀon têh, aƀaơ nkoch trêng mpeh bu ur trong nchrăp rnăk wâl deh kon đêt, mô lah tâm khay bŭn ri mât uănh oh bô tŏng ăp an săk soan, ƀa ƀơ hăn uănh nđôi, an tât nuĭh pah kan manh bah ƀon gay mbơh ntĭm. Srê Covid-19 tâm ƀon gâp geh ntoh bôk năp tâm xă Ea Kao, yơn geh nău uănh mĭn bah Đảng, Ngih dak ri mât uănh rjăp, rgum dŭt âk, srê tâm ƀon dŭt âk yơn mô geh ji mbăn mô lah khĭt-nĕ lah nău dŭt rhơn tâm năm bah năp”.

Tât aƀaơ, đah nău nsrôih nău kan dak si, kônh wa ăp rnoi nuĭh ta n’gor Dak Lak lĕ n’hao nău wât tâm nău mât uănh săk soan, ŭch êng tât ngih dak si but uănh rnôk kop ji, ăp nău way hŭm, săm ji đah n’ha si lĕ mbrơi mbrơi jŭt jăng. 100% bu ur deh ta ăp ngih dak si, mô hôm geh nuĭh deh kon ta jay. Ăp ngih dak si lĕ dơi năp tŏng ăp ndeh rklư măy mŏk, tŏng ăp dak si gay mât uănh săk soan an nuĭh ƀon lan ăp rnoi mpôl đêt bah bôk trong rlong sial. Nai dak si Nông Văn Sáng, Kruanh trạm y tế xă Ea M’Droh, nkuăl Cư M’gar, mĭn lah:

“Aƀaơ lĕ geh măy siêu âm, măy vĕ điện tim, ăp măy kơt măy rhôp n’hak, uănh năl mham. Rnôk nău mât uănh săk soan ta ntŭk bah nơm dơi n’hao prêh, nuĭh ƀon lan mô hăn but săm ji ta ăp ntŭk ngai mbra n’hŭch ăp prăk xăng ndeh, mông nar, nuĭh mât rong n’hŭch geh dŭt âk prăk”.

Mô êng ta n’gor Dak Lak, ta n’gor Lai Châu gay n’hŭch nău tâm ban trong kan mât uănh săk soan, lơn lah an ƀon lan nkual jru, ngai, nkual rnoi mpôl đêt, Đảng n’hanh Ngih dak lĕ geh ăp nău kơl, trong mkra na nê̆ kơt rmôt nău kơl n’hanh trong mkra kơl lor ăp nău săk soan bah nuĭh ach o, nkual ach o; rmôt nău kưl gay n’hao dơi gĭt tât bah nuĭh ach o, tât ndơ dak si nsum n’hanh n’gluh dŭt lah rmôt nău kơl prăk kaih an nuĭh ach o, nkual ach o tâm but uănh, săm ji. Yuh Lò Thị Khăn, rnoi Lự ta xă Bản Hon, nkuăl Tam Đường, nkoch:

“Mât uănh săk soan bu ur ri an hăn but uănh bŭn, but uănh săk soan bah nơm. Oh yuh jêh deh, chuh njrăng n’gang lor. Mô mât uănh săk soan ri bah kơi aơ klach he geh kop ji, geh nău lŏ mô dơi hăn uănh lor. He geh bảo hiểm y tế lŏ rnăk ach o ri mô roh âk, mô geh bảo hiểm y tế ri lŏ roh prăk”.

Tâm trong kan mât uănh săk soan an rnoi mpôl đêt n’hanh nkual yôk aƀaơ, ăp ntŭk dŭt uănh tât nău n’hao mbơh rblang nău wât n’hanh ƀư tĭng mât uănh săk soan kah an nuĭh mê̆ n’hanh kon se; Ntop kơl n’hao nău but uănh oh bê ăp rơh n’hanh ntop kơl dak sia n bu ur lor, tâm n’hanh jêh deh kon; Ntop kơl but uănh săk soan ăp rơh an kon se bah dâng 24 khay; Ntop kơl ndơ sa kah n’hanh njrăng n’gang brêp têh nkual rnoi mpôl đêt n’hanh nkual yôk an kon se. Yuh Bùi Thi Toan, xóm Lục, xă Yến Nghiệp, nkuăl Lạc Sơn, n’gor Hòa Bình an gĭt.

“Ta ƀon mpôl hên ăp kon se bah 5 năm deh lah geh chuh vaccine ăp khay di rơh bah pơng, đah săk soan nuĭh têh lah geh bu ur mpôl hên way ăp rơh but uănh ntop đah ngêt dak si brun, bŭn dơi chuh vaccine, chuh ntop kơl an bŭn”.

Bôk nău kan dak si lam dak ta nkual rnoi mpôl đêt ăp năm dăch aơ lĕ dơi ƀư n’hanh ƀư tĭng geh săk rnglăy, ƀon lan ăp rnoi mpôl đêt lĕ geh nău wât but uănh, săm ji, deh nse ta ngih dak si. Săk rnglăy nĕ, du gưl knơm nău kơl ƀa ƀơ ntĭm rđău bah ăp gưl ủy Đảng, n’gâng kan ƀon lan ăp ntŭk tâm trong kan njrăng n’gang nuh srê, kop ji, mât njrăng săk soan an nuĭh ƀon lan. Lơn lah, trong kan mât uănh săk soan an ƀon lan rnoi mpôl đêt dơi uănh khlay hun hao lĕ đah trong, ndoh ndơ ngih wâl, dak si, uĕh tam but uănh, săm ji dơi rgâl uĕh; ƀon lan rnoi mpôl đêt dơi gĭt tât ăp ndơ mât uănh săk soan mhe. 100% ƀon lan rnoi mpôl đêt nkual jêr jŏt, rnăk ach o, rnăk êp ach o dơi an thẻ bảo hiểm y tế.