Tâm bah ri aơ, ndrel đah ao ư̆r râng kan êng, ao blu n’glang bah ăp bác sĩ mom râng hăn kơl êng hŏ  jêng dêh bên n’hanh răm mƀak đah nuĭh ƀon lan, lơn lah ta ăp xã nkual  jru, nkual ngai, nkual jêr jŏt bah n’gor Dak Lak.

Lôch rnôk dơi but săm n’hanh ntĭm nti  trong mât chăm  n’hâm suan ta nsưng but săm, wa Y Juôn Niê (ama H’Bluin) ta buôn Ea Nur, thị trấn Pơng Drang, nkuâl Krông Buk dơi leo  tay tât ntŭk dơn sŏk dơm dak si. wa Y Juôn nkoch: Tâm bah ri  aơ way ji lam săk yơn saơ mô khuch âk jêng mô hăn  but săm. Nkhêp geh mpôl  bác sĩ  râng hăn but săm dơm ta ntŭk jêng păng hăn uănh  năl na nê̆ mpeh nô nău  n’hâm suan bah săk nơm. Wa Y Juôn saơ ăp bác sĩ  tât kơl êng but săm răp jăp, rah rơch n’hanh ăp ntil dak si dơi nchih ăp tŏng đah ăp ntil nău ji  way ngăn đŏng.

"Leo ƀư but săm n’hâm suan kơt aơ an nuĭh ƀon lan ri dŭt uĕh, rnôk geh ăp bôk nău kan kơt aơ ri nuĭh ƀon lan geh n’hâm suan mô lăng ngăch dăng dơi hăn tât but săm tât xã, nuĭh ƀon lan dơi mât chăm n’hâm suan, đăp mpăn n’hâm suan ngăch dăng ri ăp  nuĭh dơi rhơn nđơr n’hanh geh nuih n’hâm rhơn uĕh".

Nău kan but săm ji an nuĭh ƀon lan ta thị trấn Pơng Drang mpeh bôk nău kan râng êng tă bah Hội nai dak si  mom n’gor Dak Lak kan nsum đah Tỉnh Đoàn an ƀư, đah bơi 20 y, bác sĩ râng êng. Tâm du ôi, hŏ geh bơi 500 tơ̆ nuĭh ƀon lan dơi but săm n’hanh phăt dơm dak si. du đêt nuĭh ji geh mpơl jru hô ri dơi ăp bác sĩ mbơh nti hăn but săm ta ăp nhih dak si bah lơ. Râng bôk nău  kan, bác sĩ H Luốc Niê, dôl pah kan ta Trung tâm y tế nkuâl Krông Buk nkoch:

  "Dŭt rhơn n’hanh n’hao êng săk dơi hăn n’hanh mpôl râng bôk nău kan mât chăm n’hâm suan ƀon lan. Ƀư bôk nău kan kơt aơ ri rlău ma geh nău khlay na nê̆ but săm, mât chăm n’hâm suan an ƀon lan ri hôm kơl an rmôt y bác sĩ bah trung tâm y tế tâm ôp, nău tă ơm gĭt kan đŏng kơt n’hao nău dơi blău kan bah ăp nuĭh”.

Đah 6 chi hội mpeh nhih pah kan, bơi 1.000 hội viên lah ăp y bác sĩ mom, tâm bah ri aơ nơh, Hội nai dak si mom n’gor Dak Lak hŏ an ƀư âk nău kan râng êng, but săm na nê̆ n’hâm suan an ƀon lan. Ăp bôk nău kan kơt “Njăr trong hăn kơl nuĭh yor n’hâm suan nsum mpôl”; “Năm mhe râng êng rhơn tết Nguyên Đán ndrel nuĭh ach o”, trong kan “Druh ndăm râng êng khay rlu nti”, “Khay druh ndăm”… dơi ăp hội viên râng gơih nđơr.

Tâm 5 năm aơ, Hội nai dak  si mom n’gor Dak Lak hŏ ƀư rlău 120 but săm ji, mbơh nti n’hâm suan, phăt dơm dak si an 86.000 tơ̆ nuĭh ƀon lan ta nkual jru, nkual ngai, nkual rnoi mpôl đê̆ đah rnoh prăk rlău 4,2 rmen prăk. Tâm ăp rơh hăn, Hội hôm kan nsum đah ăp nuĭh tơm kơl pă an 2.400 nklâm ndơ lah ndơ dŏng sa khlay, kho ao an nuĭh ƀon lan geh nău rêh jêr jŏt; kơl an rhiăng nklâm học bổng, ƀư thŭng dŏng nti, ndeh wah jâng an kon se  ach o, kon se kon đơi, kon se nti rnoi mpôl đê̆ klaih rlău ach o nti gơih. Leo ƀư kơi năp nti ăp trong kơl rêh lor  bôk năp an hang rbăn nai ntĭm nti ăp nhih nti mầm non, tiểu học; nkoch trêng nti nti  n’hâm suan deh nse an druh ndăm, njrăng n’gang nuh srê an hang rbăn kon se nti, sinh viên…

Nô Y Lê Pas Tơr, Groi Bí thư Rnâng kan Tỉnh Đoàn, Kruanh Hội LHTN Việt Nam n’gor Dak Lak an gĭt, nău kan bah Hội nai dak si mom hŏ rgop kơl âk mpưm tay ăp rmôt râng kơl êng yor đăp mpăn lam rêh jêng kon nuĭh, ƀư gơih nđơr an nuih n’hâm rêh uĕh an lam ƀon lan tâm đoàn viên druh ndăm Dak  Lak.

"Ăp yuh nô nai dak si mom hŏ ntik n’hao nuih n’hâm râng êng yor nău rêh nsum mpôl n’hanh ntik n’hao dơi nău kan way kan bah he gay râng tâm ăp trong leo ƀư nsum bah  mom ndăm n’gor nơm, rgop n’hao ngăch dăng n’hâm suan an ƀon lan ta ăp ntŭk jêr jŏt, nkual jru, nkual ngai, nkual n’har bri”.

Tĭng bác sĩ Phan Thành Trinh, Kruanh Hội nai dak si mom Dak Lak, đah nău lah dâk kan “Nai dak si mom Dak  Lak ƀư tĭng nău Wa, râng kan êng yor n’hâm suan lam ƀon lan”, ăp hội viên way nsrôih râng ăp nău kan gay rgum âk tay nău gĭt blău, nău tă ơm gĭt kan, n’hao nău blău kan, bah nê rhŏ dŏng an nuĭh ji nar lơn ma uĕh lơn.

"Hội nai dak si mom rgŏ jă tay trong leo ƀư Nai dak si mom ƀư tĭng nău Wa, râng kơl êng yor n’hâm suan nsum mpôl lam ƀon lan. Lơn lah, ăp hội viên mbra ntik n’hao dơi nuih n’hâm hăn chŏl lor bah he ta ăp ntŭk, nkual n’hanh rhŏ dŏng an đăp mpăn lam rêh jêng kon nuĭh".

 Mô  rnam nău jêr jŏt krit jêr, rmôt nai  dak si mom Dak Lak hŏ hăn dâk râng êng hăn tât ăp ƀon lan nkual jru ngai, gay but săm ji an kônh wa ƀon lan. Ăp trong hăn mô dơn kơl khân păng tiăr nti nuih n’hâm kan dak si uĕh , n’hao nău blău kan dak si ma hôm mpơl dơi nuih n’hâm dơn kan, ntik suan dăng, an lĕ nău gĭt blău an mât ngăch dăng n’hâm suan nuĭh ƀon lan./.