Tâm du njăr trong jong tâm lơh  kăl e lơh Prăng n’hanh mprơh Mỹ, Tahen ƀon lan Lào n’hanh tahen ƀon lan Việt Nam hŏ way ndrel rdâng lơh nsĭt tay nău đăp mpăn,  dah rŏng tâm  ban kơt mât njrăng đăp mpăn, ƀư tơm  n’hanh nău  lam lĕ rngôch bah bar dak.  Lôch nar ntru lơh lĕ rngôch phŭng rlăng, tahen bar dak Việt Nam n’hanh Lào mô  dơn n’hao dăng tâm boh krêp dêh jŏ jong đah bar mpôl tahen, ma hôm ntrŭt ntrôl tâm boh geh nău tam tâm gŭ mĭn khoa học, lơn  lah dak si tahen bar dak hŏ kan nsum ƀư geh nău dơi ăp nău  ji ndop nuih klơm lor bôk năp, pơk luh trong rƀŏng hăn mhe tâm pah kan mât chăm n’hâm suan nuĭh ƀon lan bah mpôl tahen dak si Lào.

 Lah ngoăy tâm ăp nuĭh ji mhe ndop leh  ta Nhih dak si Trung ương 103 Tahen Lào, wa Vanxay Lixayalath, 58 năm deh ta n’gor Savannakhet mô mpôn dơi nău rhơn lôch ndop  leh geh nău dơi tă bah ăp y bác sỹ Việt Nam n’hanh Lào kan nsum tĭng ƀư. wa Vanxay nkoch, 5 năm bah năp nơh, păng saơ he geh nău ji leh n’hanh lôch 2 năm păng ân ndjăt kloh mham. Năm e nơh, păng hŏ hăn tât Nhih dak si Trung ương 103 Tahen ƀon  lan Lào đăng ký but săm n’hanh ndop leh.

Lor rnôk ƀư rek săm gâp saơ tâm săk dŭt lêt rgănh, ăp ntil ndơ sa jêr lvăn n’hanh jâng ti dŭt ji, nho yơn lôch dơi ăp bác sĩ ta aơ rek săm gâp saơ dŭt n’gơch aih săk jăn.

Tâm ban kơt wa Vanxay, nô Sangthong Keomonasi, 32 năm deh ta thủ đô Vientiane rngot rhơn rnôk nkoch mpeh njăr trong hăn joi nău rêh bah he đah âk ntil nău lap. Nô Sangthong nkoch: Đah aƀaơ nklăp 5 năm, păng saơ rgănh lam săk,  mĭn lah geh nău way ji ngăn dơm jêng hŏ mô hăn but săm n’hanh rvăt êng dak si  gay ngêt sĭt dăng êng n’hâm suan. Rnôk nău ji mô hŭch bah, nô mơ hăn tât nhih dak si but săm mơ gĭt lah  he geh djôr leh rơh n’glĕ  dŭt. Rnôk nê, nô roh lĕ nău mpŏng ăp ntil trong nchrăp kan bah nô n’hanh rnăk wâl ân manh nkêh an êng du ding gay rgum săm ji. N’hanh nău  lap  hŏ tât đah nô dơi gĭt Nhih dak si Trung ương tahen 103 Lào dôl tâm boh đah  Nhih dak si Quân y 103 bah Việt Nam ƀư ndop leh.

Lor rnôk rek săm gâp ân ndjăt kloh mham leh 3 tơ̆/pơh. Aƀaơ gâp saơ kơt lah hŏ dơi geh du nău rêh mhe.

Aƀaơ lĕ rngôch ăp nuĭh ji lôch ndop n’hâm suan sĭt dăng tay ngăch, lôch jêh uănh năl mham, sinh hóa n’hanh dak chrach rgâl kloh, du đêt nuĭh ji hŏ plơ̆ tay nău kan ăp nar. Đại tá Savengxay Dalasath, Giám đốc Nhih dak si Trung ương 103 Tahen ƀon lan Lào an gĭt,  nău ndop geh nău dơi leh bah nuĭh an rêh ta Lào mô dơn nchih nkah nău têh jêng n’hanh hun hao bah Nhih dak si, ma hôm lah njuat hăn khlay đah n’gâng kan dak si bah Lào. 

Nău ndop leh geh nău dơi  an ăp nuĭh ji rơh dja,  lah mô geh nău kơl bah ăp bác sĩ tahen Việt Nam ri nklăp mpôl hên mbra mô dơi ƀư lôch jêh nău kan. Mpôl hên mpŏng let năp  tay bar nhih dak si, bar mpôl tahen n’har lơn ma  geh ăp njuat hun hao dăng lơn  đŏng lĕ mpeh săk blău kan n’hanh rnoh âk.

Trong nchrăp tâm boh ndop leh dơi bar Nhih dak si tahen 103 bar dak an ƀư ntơm bah năm 2018. Tât aƀaơ, bar ding hŏ kan nsum ƀư geh nău dơi 9 tơ̆ ndop ta Nhih dak si Trung ương tahen 103 Lào. Mpeh Việt Nam nchrăp nuĭh kan, ndơ dŏng, dak si n’hanh ndơ năp dŏng kan ntop kơl, hôm Nhih dak si bah Lào nchrăp jrô rek săm, jrô bĭch săm ji lôch rek, njêng ban rđău đă, ăp nuĭh kan rnâng kan, tiăr nti tĭng ăp rêng kan way kan hŏ dơi Việt Nam ntĭm nti.

PGS. TS Vũ Nhất Định, Groi Giám đốc Nhih dak si tahen 103 an gĭt, ta nâm nău ntĭm nti bah nuĭh rnâng kan Việt Nam, ăp bác sỹ bah Nhih dak si Trung ương 103 Lào hŏ tĭng kơn ƀư tơm mpeh kỹ thuật du đêt gâl kan tâm rnôk ndop leh tâm ban kơt ăp rêng kan tĭng groi nđôi nuĭh ji lôch ndop n’hanh nchroh ăp nău tât mbra geh.

Nău kơl băl an ƀư kỹ thuật ndop leh ta Lào lah du nău kan dŭt jru hvi ntop geh tay nău tâm rnglăp krêp dêh đah bar dak, bar tahen n’hanh ăp rnoi nuĭh bah Lào. N’hanh gâp  mĭn lah, aơ lah nău kan ân nthoi ƀư tay bah ăp rơh u che he hăn lor bôk năp n’hanh lah nău nkah ăp rơh mom ndăm bah kơi mât ndray tay nău tâm boh tâm brê Việt – Lào, kloh rsang, dah rŏng.

Tĭng trong nchrăp, tâm năm aơ, Nhih dak si tahen 103 Việt Nam mbra đă tay ăp nuĭh rnâng kan ntop  kơl tay Nhih dak si Trung ương 103 tahen Lào tĭng ƀư bah 10 tât 20 kôp ndop  leh. Bah meng nê, Nhih dak si Trung ương 103 tahen Lào ŭch tât năm 2025 mbra ƀư tơm êng lĕ rngôch kỹ thuật ndop  leh, bah nê rgop n’hao têh pah kan mât chăm n’hâm suan lam ƀon lan tâm ban kơt ăp dak tâm nkual n’hanh lam ntŭr neh./.