Nai dak si Y Nham Niê kruanh Trạm y tế xã Krông Na, nkuăl Buôn Đôn, n’gor Dak Lak dôl nar măng gŭ pah kan ta ƀon lan gay ma mât săm săk soan an nuĭh ƀon lan n’har bri lah du nuĭh ntoh lư kơt nĕ.

Kơt nău way , nar 16 ăp khay, nai dak si Y Nham Niê, kruanh trạm y tế xã Krông Na, nkuăl Buôn Đôn ndrel đah ăp cán bộ, nuĭh pah kan lăp ta ƀon Đrăng Phôk, xã Krông Na gay ma uănh săm ji, mbơh nău mât săm săk soan an ƀon lan. Ƀon Đrăng Phôk ta nklang rđŭng bri ngih dak mât York Đôn, ngai đah trạm y tế bơi tât 20km, jêng nău hăn tât trạm y tế xã gay ma uănh săm ji geh âk nău jêr. Ăp rơh sĭt ta ƀon, nai dak si Y Nham way ndăn mbơh tơih nău kan njrăng nău ji an ƀon lan.

“Tâm nkual njônh ngai aơ rĭ nău ji âk ngăn, ngăn lah nău kop sâr hôm nha geh dŭt âk, ntop ta nĕ lah ăp mhe aơ geh tay ăp nuh srê êng bâh ntŭk êng ntưp rêng tât âk đŏng. Nău mĭn bâh nuĭh ƀon lan mô gĭt vât âk, nuĭh ƀon lan gĭt nău ji mâp nai dak si hôm, hôm nău njrăng der, njrăng nuh srê rĭ bu mô hŏ gĭt vât”.

Ntơm nơh, ăp nuĭh kơl kan an n’gâng kan dak si ta thôn ƀon way geh hăn ta ăp jay nkah mbơh an ƀon lan uănh săm ji ăp khay, rĭ aƀaơ, djăt ma tât nar 16 ăp khay, ƀon lan tât êng ta ngih văn hóa cộng đồng gay ma uănh săm nău ji n’hanh mbơh nău mât chăm săk soan. Yuh H’Thép Knul ta ƀon Đrăng Phốk an gĭt.

“Nai dak si Nham tât ta aơ uănh săm ji, mbơh đah ƀon lan ta aơ dŭt na nê̆ ngăn, bâh geh nai dak si rĭ ta ƀon hên lĕ gĭt mât njrăng ueh an săk soan”.

Lah nuĭh rnoi Rđe  deh kuăng ta nkual neh xã Ea Bar, nkuăl Buôn Đôn, lôch nti ngành Y Khoa, năm 2002, nô Y Nham Niê sĭt pah kan ta trạm y tế xã Ea Bar. Bâh năm 2016 tât aƀaơ, nai dak si Y Nham geh đă sĭt ƀư kruanh Trạm y tế xã Krông Na. Rlău 20 năm dăch bên đah nău kan n’hanh lĕ geh 7 năm pah kan ngai jay rlău 20km rlău ma ăp nuĭh êng, nô gĭt nău rêh bâh ƀon lan ta nkual njônh ngai, n’har bri mâp âk nău jêr jŏt, hôm nha geh âk nău way mô tâm di, geh mô ueh tât săk soan nuĭh ƀon lan.

Đah nău gĭt blău tă lôch nti n’hanh nău nsrôih đah nău kan, nai dak si Y Nham mô klach rvê trong hăn jêr, trong ngai, nar duh tâm ban nar mih, nsrôih ndrel đah ăp nuĭh kan ndrel n’hanh mpôl pah kan kơl kan an n’gâng kan dak si rgŏ jă ƀon lan nklơi nău mĭn nău kan mô hôm tâm di, mbơh nău mât chăm săk soan deh nse, rgŏ jă mê̆ bơ̆ ndơ̆ oh kon nơm hăn chuh n’gang di khay di năm. Bâh geh nău nsrôih bâh nai dak si Y Nham n’hanh mpôl kan dak si ta ntŭk, nău kan mât chăm săk soan bôk năp an ƀon lan ta xã Krông Na geh âk nău dơi. Rnoh deh kon tal pe n’hanh nău tâm gŭ ur sai mô tŏng năm deh, tâm gŭ ur sai dăch ndul mham ta ntŭk hŭch âk, rnoh chuh n’gang geh rlău 70%. Nai dak si Y Nham nkoch.

“Nău min khlăy ngăn bâh gâp lah mât chăm săk soan an ăp nuĭh, mô geh mưch ntŭk aơ ntŭk ri, ƀon lan geh nău ji, ngih dak pă kan lah gâp hăn kan dơm. Gâp way nsrôih sŏk ăp nău gĭt, nău tă blău kan bâh nơm gay ma kơl an ƀon lan dơm”.

   Mô dơn nsrôih tâm nău mât chăm săk soan an ƀon lan, đah nău kan lah kruanh Trạm y tế xã, nai dak si Y Nham hôm nha geh nău nchrăp na nê̆ an ăp nău pah kan bâh Trạm tĭng ăp pơh, ăp khay tâm ban kơt leo kan tâm nău mbơh nău tât bâh nuh srê ta ntŭk gay ma geh ăp nău dăn đă, mbơh tơih ôp nău ngăch gay ma njrăng rdâng ndrel đah ntŭk kan ba lơ. Ta meng nĕ, nai dak si Y Nham hôm nha ntĭm an ăp nuĭh kan tâm Trạm gay ma khân păng n’hao nău blău kan. Nô Y Sới HWing, groi kruanh Trạm y tế xã Krông Na an gĭt.

“Nai dak si Nham lah du hê nuĭh dŭt nsrôih, dŭt gơih nđơr, pah kan dŭt jăp. Ăp khay lôch rƀŭn nchră chi bộ lah đồng chí Nham geh ndơ̆ mbơh du ntil nău ji gay ma mbơh tơih, gay ma ndơ̆ mbơh nchră du trong mât săm rnôk geh nău ji kơt nĕ, nai dak si lĕ ntĭm lor, nău blău kan bâh nai dak si mbra ntĭm nti an oh nô ta trạm, gay ma rnôk nai dak si geh ntŭk hăn rĭ oh nô tâm Trạm dơi mât săm êng”.

Ăp nău ntop kan bâh nai dak si Y Nham Niê dŭt di rnê ngăn, nô mô dơn lah du hê nai dak si blău mpeh nău kan, trong kan, blău mpeh nău kan dak si mât săm nuĭh ma hôm nha lah du hê nuĭh ntoh ang tâm n’gâng kan dak si ta trong n’har bri. Bâh geh nău rdâk njêng n’hanh mât dơi nău knơm gay ma njêng nău knơm bâh ƀon lan lĕ kơl an nai dak si Y Nham mbơh tơih dơi ăp bôk nău kan n’gâng kan dak si lam ngih dak sĭt tât thôn ƀon geh săk rnglăy âk ngăn.