Nklăp 2 pơh bah năp, kon se ji 19 khay deh, gŭ nkuăl Hải Lăng, n’gor Quảng Trị ntơm ntoh ji đah nău saơ môr ji ta tôr kiău, lăp ngih dak si ta Khoa Tai-Mũi-Họng, Ngih dak si Trung ương Huế gay săm. Jêh nĕ, kon se ji dơi uănh năl mham, luh kaman ƀư ji Whitmore jêng dơi njŭn hăn Ngih dak si Nhi khoa. Jêh 2 pơh săm đah kháng sinh tĩnh mạch, kon se ji lĕ đăp mpăn săk soan, têl sôt ta tôr kro n’hanh dơi hăn sĭt ngih dak si săm bah dih đah kháng sinh đêt ngăn 3 khay. Geh nuĭh ntưp Whitmire mbăn lơn lah kon se Trịnh Ngọc N, 6 khay deh, gŭ nkuăl Cam Lộ, n’gor Quảng Trị. Mon ntơm ji lor rnôk lăp ngih dak si 5 nar đah duh hô na nao, ji ndŭl djroh 6-7 tơ̆ du nar nkre nsôr ngăch, jêr nsôr. Rnôk dơi nchroh geh kaman ƀư ji Whitmore, ăp y nai dak si Ngih dak si Nhi khoa lĕ ngăch săm kháng sinh dŭt n’hâm an kon se. Wa Lê Thị Gái, u bah nuĭh ji Trịnh Ngọc N. an gĭt:

Mon duh 39 độ tât 40 độ mro lah nsum lah mô rlu tât nar tal 3 tâm rnôk duh mon khĭt brŭt, jêh nĕ knơm tâm ngih dak si njŭn an mon lăp ngih dak si Trung ương, ri rnôk nĕ lăp ngih dak si hăn săm ndal dâl.

Ji Whitmore dŭt âk ntưp tă bah trong tâm ntô mô lah ndơ sa, dak ngêt geh kaman. Ji way ntoh ta rnôk geh phŭt sial dak lip, ntŭk mô uĕh răk rao. Nuĭh ji ntưp an dơi săm kháng sinh jŏ nar, way lah chuh khang sinh bah 2-4 rơh. Lah tâm di uĕh, ji dơi săm bah dih đah kháng sinh trong ngêt đêt ngăn tâm 3 khay. Thạc sĩ, nai dak si Trần Thị Hạnh Chân, pah kan ta Ngih dak si Nhi khoa, Ngih dak si Trung ương Huế an gĭt.

Ji Whitmore ntưp dŭt âk tă bah trong tâm mâp ntô mô lah ndơ ngêt sa geh kaman jêng trong mkra knŭng geh răk rao. Yor âk rnôk he mô dơi gĭt moh kon kaman, knŭng geh rnôk sŏk kon kaman mư gĭt lah ji Whitmore.

Ta ngih dak si Trung ương Huế, tĭng kơp uănh lvang 2014-2019, ngih dak si lĕ wơt dơn 83 nuĭh dơi nchroh Whitmore. Bah bôk năm 2024 tât aƀaơ, Ngih dak si Trung ương Huế wơt dơn n’hanh săm 17 nuĭh ji. Ta Dak Lak lĕ saơ 2 hê ntưp ji Whitmore kơp bah bôk năm 2024 tât aƀaơ. Tĭng nău kan dak si, tât aƀaơ hin, ji Whitmore mô hŏ geh vaccine njrăng n’gang ji. Trong mkra njrăng n’gang khlay lah dêr tâm mâp đah neh n’hanh tu dak geh ntưp kaman, lơn lah ăp nuĭh geh ji ơm lor kơt chrai njŭng, ji klơm ... lah mô lah geh sôt, dêr an sôt tâm mâp đah neh mô lah dak ƀâ̆ rnôk mô hŏ bah nkre re. Mô sa ndơ sa mô lah ngêt dak mô hŏ mkra dơi ntưp kaman. Rnôk luh bah dih, an wăn bok put mbung mât n’gang trong n’hâm, ngăn lah tâm ntŭk ntô geh âk nsuk mhŭl. Rnôk geh ăp nău mpeh săk soan, mô an săm êng ma hăn tât ăp ngih dak si nsing nơm gay ăp nai dak si mbơh ntĭm, but uănh, nchroh n’hanh săm ngăch.