Nuih n’hâm đah nău kan, dŭt n’hâm đah nuĭh ji, nai dak si Y Hồng Nga pah kan ta Ngih dak si nkuăl Kon Rẫy, n’gor Kon Tum dơi geh đah nău rŏng bah nuĭh ji kơt nuĭh kan.

Ta nar duh phang, r’ôl bah trôk nar lvang rgâl yan, jrô ji khoa ngoại rek jĭm, ƀư hoơi săk, mât uănh săk soan deh nse n’hanh bu ur bŭn-Ngih dak si nkuăl Kon Rẫy, ntop tay bêng rhăt. Ndrel đah nău njê bah nuĭh ji, nai dak si đa khoa Y Hồng Nga, đêp rmên  chop khâl ăp nuĭh. Yuh an gĭt, gay but uănh di nău ji, săm ngăch bah, ndrel đah nău way kan, mô đêt đah nău khlay dơn nău nsing nơm bah nuĭh ji:

Gâp lah du nai dak si, gâp lah nuĭh Xơ Đăng dŭt wât âk nuĭh ji tât but uănh, săm ji ta aơ njê da dê, yơn lah gâp nsôih nta an gay but uănh, săm ji dŭt uĕh an nuĭh ji lah nuĭh rnoi mpôl đêt. Lah du hê nai dak si gâp mĭn nta an lor jêh nău kan ma gưl bah lơ jao, đah nuĭh ji gâp dŭt n’hâm, nsrôih săm uĕh ngăn an khân pơng.

Dêh tâm du rnăk wâl geh bơ̆ lah nuĭh Xơ Đăng, mê̆ lah nuĭh Yuăn, nai dak si Y Hồng Nga geh nău ŭch êng đah ăp nuĭh ji nuĭh rnoi mpôl đêt. Gay ntop kơl nuĭh ji tâm rnôk săm ji, đah nău ƀư Bí thư Chi đoàn Ngih dak si nkuăl Kon Rẫy, Y Hồng Nga lĕ rgŏ jă đoàn viên druh ndăm ntŭk kan, jêh nĕ rgŏ jă bah âk rmôt kan jay sa lŏng bôk tôr, kho ao ndrôm sam ƀŭt an dơm... kơl nuĭh ji. Bah meng nĕ, ăp rơh nkah gĭt kơt nar ndâk njêng Đoàn thanh niên cộng sản Hồ Chí Minh 26/3, Nar rklaih đăp mpăn miền Nam 30/4, Nar tahen ơm 27/7..., Chi đoàn ƀư ăp nău nkah gĭt, tâm pă jêr jŏt đah nuĭh ƀon lan. Điều Dưỡng Nguyên Trần Mỹ Hạnh an gĭt, tâm ăp nău ƀư bah druh ndăm Ngih dak si Kon Rẫy geh nău uĕh bah nuĭh Bí thư chi đoàn:

Yuh Nga lah du hê geh nuih n’hâm, lĕ đah nău kan n’hanh nuĭh ji. RLău ma nău kan way kan yuh Nga nti nău blău ơm tiăr nti ăp nău mhe. Yuh Nga dŭt n’hâm, nsrôih râng ăp nău ƀư bah Đoàn rgŏ jă. Yuh Nga lah du hê hăn lor an ăp oh yuh tâm chi đoàn ngih dak si tĭng.

Tĭng nai dak si Nguyễn Luận, Groi giám đốc mât uănh ngih dak si nkuăl Kon Rẫy, yor hôm e mô tŏng tât 15 nai dak si ăp nẩ kâp uănh nău kan ta ngih dak si dŭt ji ŏk n’hanh r’ah. Nai dak si nkre kâp ƀư nội, ngoại, deh nse, oh bê, săm ndal nkre ntĭm rđău bah ngai đah ăp nău dơi ndơ̆ tât săm ndal ta ăp ngih dak si xă. Ndrĭ yơn nai dak si Y Hồng Nga mô knŭng lôch uĕh nău kan way kan, hăn lor mro tâm ăp nău ƀư bah ngih dak si. Nai dak si Nguyễn Luận, an gĭt:

Nai dak si Y Hồng Nga uănh tât mro mât uănh săk soan, but uănh săm ji an nuĭh ji, mbơh ntĭm an nuĭh ji mpeh đah nău mât uănh săk soan bah nơm tâm rnôk bĭch ngih dak si n’hanh rnôk sĭt. Mpeh nău ƀư ntrong leo ri nai dak si Y Hồng Nga lah du hê Bi thư Chi đoàn bah ntŭk kan dŭt nsrôih tâm ăp nău ƀư, lơn lah yŭr an mham ŭch êng, nău kan but uănh, săm ji kơl nuĭh an nuĭh ƀon lan.

Nai dak si Y Hồng Nga lĕ mĭn lah nău dơi pah kan n’hanh dơn geh âk nău rŏng bah nuĭh ji n’hanh nuĭh kan ndrel ta Ngih dak si nkuăl Kon Rẫy, n’gor Kon Tum. Yuh mpŏng ŭch mbra dơi hăn nti chuyên khoa I-deh nse gay n’hao nău blău kan, rhŏ an nuĭh ƀon lan ta ngih dak si nkuăl Kon Rẫy uĕh lơn.