VOV4.M’nông: Jêh rnôk dơi N’gâng kan dak si pă an dŏng, ăp ntil dak si săm Covid-19, ntoh lư ngăn lah Molnupiravir dơi pă âk ta ntŭk tăch. Yơn lah, tĭng nău ntĭm, nău dŏng dak si săm Covid-19 yor nai dak si nchih, lah rwăt êng n’hanh săm êng mbra ƀư khuch jêr njrăng. Gay wât lơn mpeh nău aơ, rmôt nchih nkô̆ way nkoch lĕ geh rơh tâm nchră đah nai dak si Lại Quang Miễn, Groi Kruanh Ngih dak si nkual ƀon têh Buôn Ma Thuột.

- Nai dak si dơi an gĭt ăp nuĭh F0 ri dơi săm dak si Molnupiravir mêh ?

- Nai dak si Lại Quang Miễn: Jêh rnôk UBND n’gor Dak Lak an n’gor săm dak si Molnupiravir an nuĭh ji F0 ta jay ri tât nar 19/1/2022 Ngih dak si lĕ ndâk njêng trong nchrăp gay săm an nuĭh ji F0 ta jay mô geh nău ji mô lah geh nău ji đêt. Đah nău ntĭm săm, bôk năp săm đah bu klô, bu ur bah 18 năm deh let lơ. Mô dŏng an nuĭh bah dâng 18 năm. Bu ur bŭn mô lah dôl an kon pu mô săm. Đah nuĭh geh nău ji ơm tâm săk ma mô đăp mpăn ri he mô săm đŏng. Du đêt ăp nuĭh ma ăp nuĭh ranh, geh n’ăp nău ji ơm, geh nău ji play nuih, ji klơm soh, mô lah djuôr leh mô dơi dŏng dak si Molnupiravir.

- Nău nuĭh ƀon lan rwăt êng dak si Molnupiravir gay săm Covid-19 tam mbra m’hâm mêh ?

- Nai dak si Lại Quang Miễn: Lah nuĭh ƀon lan rwăt êng dak si nchăng n’gang kaman gay săm lah du nău tih têh yor dak si săm nchăng n’gang kaman Molnupiravir rlơ̆ nău ntĭm đah du đêt nuĭh. Lah ăp nuĭh dun nău ntĭm ma dak si ri jêr dơi bah, đê̆ đŏng lơ mbăn lơn. Y học mĭn lah aơ nău ji tâm ntưp rêng rmôt A, lah rmôt ji klach ngăn jêng nuĭh ji rnôk dŏng an geh nău nchih dak si bah ăp y, nai dak si. Rwăt êng sĭt ngêt ri nău geh jêr njrăng, dŭt klach.

Kơp tât aƀaơ, Ngih dak si săm F0 ta jay an nklăp 187.000 nuĭh, tâm nĕ lĕ bah 7.638 nuĭh, dôl săm lah 10.415 nuĭh n’hanh njŭn gưl bah lơ 43 nuĭh. Êng ăp F0 săm ta jay geh dak si nchăng n’gang kaman âk, mô geh nuĭh dŏng dak si ma nău ji hao mbăn mô lah khĭt. Lĕ rngôch ăp nuĭh săm dơi đăp mpăn da dê.

- Ndrĭ, nai dak si geh nău ntĭm an nuĭh ji ntưp Covid-19 m’hâm mêh ?

- Nai dak si Lại Quang Miễn: Aƀaơ, N’gâng kan dak si đă lĕ rngôch ăp nuĭh ƀon lan rnôk ntưp Covid-19 an dŭt n’hâm an nkân nkân, mô rvê, mô klach. Ƀư tĭng rjăp nău ntrŭnh 5K gay njrăng n’gang kop srê an rnăk wâl n’hanh ƀon lan. Aƀaơ mpôl hên geh ndâk njêng 25 rmôt dak si hăn ăp ntŭk. Ăp cán bộ bah ngih dak si lĕ dơi tiă nti mpeh săm F0 ta jay n’hanh săm F0 geh dak si nchăng n’gang kaman. Yor rĭ, rnôk ntưp, nuĭh ji mô lah rnăk wâl an tât ngih dak si mbơh. Lah nuĭh ji geh ndơ, ngih dak si mbra an ntrŭnh săm F0 ta jay. Jêh rnôk ntrŭnh săm F0 ta jay ri cán bộ dak si mbra ôp ƀa ƀơ n’hanh nuĭh ji an ôp ƀa ƀơ đah ngih dak si gay tâm ôp, ntĭm, uănh nđôi săm ta jay, kơt: uănh trong mham, uănh duh săk, ăp nău geh dơi rêh nar 2 tơ̆ ôi n’hanh kêng măng gay mbơh an nuĭh kan dak si. Lah nuĭh geh nu nău mbăn ri nuĭh kan dak si mbra nking n’gang ngăch, hăn uănh nđôi mô lah ntĭm săm tay mô lah an njŭn hao gưl bah lơ săm.

Lah uĕh ăp nău nkoch bah nai dak si !

Nuĭh rblang: Y Sưng Phê Ja