Ta năp nu nău ji măt chăng ntưp reng ngăch tâm ntŭk gŭ rêh, ngăn lah ta âk ngih sam ƀŭt, nar nđaơ (12/9) N’gâng kan dak si n’gor Kon Tum geh sam ƀŭt njuăl ăp n’gâng kan, nău kan geh tât, UBND 10 nkuăl nkaul ƀon têh tâm n’gor, ăp ntŭk kan mpeh tâm n’gor n’hanh ngih dak si ta ntŭk đă nchrăp lor, n’hao njrăng n’gang ji măt chăng.

Tĭng nĕ đah ăp ntŭk kan mpeh tâm n’gor, N’gâng kan dak si n’gor Kon Tum đă n’hao groi nđôi, saơ ơm ăp nuĭh ntưp ji măt chăng, lơn lah ta ăp ngih dak si, ngih pah kan, xí nghiệp ƀư rjăp gay ăp trong nking n’gang mô an srê ntoh, ntưp rêng ta lam hvi srê ji măt chăng tĭng nău đă bah N’gâng kan dak si nchrăp njrăng-N’gâng kan dak si. N’gâng kan dak si n’gor Kon Tum đă đŏng N’gâng kan ntĭm nti, UBND 10 nkuăl, nkual ƀon têh bah n’gor rnôk saơ kon hŏk geh nău ji kơt: duh đêt, ŏk r’ah, ji mblông dơ̆, geh krêp ĕk măt jêr lin măt, geh môr bah năp tôr mô lah bah dâng kang an ntĭm kon se tât ăp ngih dak si but uănh săm ji gay dơi but uănh, mbơh ntĭm, săm ngăch.