VOV4.M’nông: Rnôk aơ, ăp n’gor tâm lam dak hŏ ân kon se hăn nti tâm ngih săm ƀŭt, kơp n’ăp ma kon se hŏ geh chuh vắc xin njrăng Covid-19 ndrel kon se ê geh tă chuh vắc xin. Tâm rnôk srê Covid-19 dôl ma geh nau tât jêr, ntŭk kan n’gâng kan hŏ nchrăp ăp nau rdâng ân nâp ân ăp nau tât saơ F0 tâm ngih săm ƀŭt ndrel mra ƀư ăp nau săm ân kon se geh nau ji.

Bol ma rnoh kon se ntưp srê Covid-19, rnoh nŭih ji jâk dêh lơn, yơn hôm geh nŭih kht lah ntưp âk. Rnôk kon se plơ̆ hăn nti tay, nchrăp lah rnoh kon se ntưp Covid-19 mra hao âk. Ndri ma, ăp nŭih ƀư nau kan ngăn ngên nkah tât nau jrăng srê ndrel mô ân geh âk kon se ntưp rêng ndrel du tơ̆, yor rnôk aơ ăp ntil dak si săm Covid-19 mô geh âk dŏng ma kon se. Giám đốc Ngih dak si Nhi Trung ương Trần Minh Điển ân lah, mhâm ƀư gay đăp mpăn ân kon se rnôk hăn nti geh âk nkô̆, tâm nê geh ntŭk kan ntĭm nti, ngâng kan tâm nkuăl ndrel dak si tâm nkuăl ndâk ăp nau tât gay ma dơi rdâng ueh nâp ngăn ân ngih săm ƀŭt. Êp nê, ăp nŭih me mbơ̆ ân geh nchrăp ueh nau mĭn ân kon ndrel ma ngih săm ƀŭt ntĭm nti kon nơm ƀư ăp nau kan njrăng rdâng srê, ngăn lah kơt tĭng “5K”. Rnôk ntoh ăp nŭih ntưp mô lah hŏ ntưp ma kman SARS-Cov2 tâm jrâu nti, ri ngih săm ƀŭt ân geh ngăch tâm rgop nsum ma ngih dak si bah nkuăl gay ma mbơh nau tât ăp rnăk vâl gay ma ƀoi tĭng nau hăn ro bah kon se aơ:

            ‘Phung he ân geh joi ƀoi tĭng ân ueh tâm jrâu nê dơm ndrel mra joi tâm êp ntŭk sưng ma ăp oh nê gŭ nti, du đê̆ ntŭk ma kon se nar pâl dơm, nơm mô kâp ân geh ntâl n’ăp ma mpông du ngih săm ƀŭt mô lah ân ntâl mpông du jrâu nti ôh. Nau mĭn mbơh ngih săm ƀŭt đăp pmpăn geh rnôk ri mô di lah “mô geh Covid” ma nau mĭn nê ngih săm ƀŭt đăp măpn ri nơm ân geh ndâk ƀư nau nchrăp nau kan ân tâm di, nơm geh ƀoi tĭng ân ngăch, joi saơ ntŭk nê ân ngăch gay ma đăp mpăn ngih săm ƀŭt nê kloh, đăp mpăn.

            Lah geh ngăn kon se ntưp ma srê Covid-19, ri ăp me mbơ̆ kon se ân geh mĭn rjăp, mô dơi klach rvê ir. Rnôk kon nơm tâm ngih, me mbơ̆ ân geh uănh ăp nau tât, nau geh rnôk nê gay ma kơl an ndrel ma mbơh ân ngih dak si tâm nê gay ma kon nơm geh săm ueh ngăn. Giám đốc Ngih dak si Nhi Trung ương Trần Minh Điển, nkah lah:

            ‘Aơ lah du ntil srê ji, ndri ma nau nkhah srang kŏ lah du nau ueh. Lah nơm mô geh nkhah kon se ri păng nơih ngăn ntưp rêng tât ăp kon se jê̆ lơn, jêh ri me mbơ̆, jêh ri u che, ngăn lah ăp nŭih me dôl ma bŭn. Ndri ma, tâm ăp nau tât, ăp rnăk vâl ân geh uănh njrăng nau tât tĭng nau ntĭm mbơh bah n’gâng kan dak si du trong ueh ngăn kơt lah mhâm nau săm tâm ngih ndrel moh nau mpơl jêng saơ jâk lơn, kơt lah rnoh jâk ma ân geh tât khám tâm ngih dak si mô lah ân geh lăp tâm ngih dak si, gay ma đăp mpăn ngăn ân kon se”.

            Tâm rơh rƀŭn mhe aơ mpeh nau kan săm ân kon se ntưp ma srê Covid-19, Groi Thủ tướng Vũ Đức Đam hŏ jao ân N’gâng kan dak si ƀư tơm, tâm rgop nsum đah N’gâng kan ntĭm nti ndrel ăp ntŭk kan geh tât ndâk nau ƀư ăp nau tât ndal rnôk geh kon se tât ngih săm ƀŭt plơ̆ ntĭm nti nâm ơm, geh kon se ntưp ma srê Covid-19. Nkre, ân geh ndal ƀư ân jêh, ntrŭnh mbơh ăp nau ntĭm nti mpeh nau blau ƀư ăp nau kan ndrel nau leo săm Covid-19 đah ăp kon se tâm dâng 18 năm, ngăn lah kon se tâm dâng 12 năm./.

Nŭih rblang: H’Thi