Dak Lak lah ntŭk geh rnoh ntưp ndrăng ta so, ep geh tâm rmôt âk bah lam dak. Rnoh chuh vaccine đêt tâm rnôk nuĭh ƀon lan hôm e thơ tha tâm njrăng n’gang jêng nău ndrăng ta aơ hôm e âk jêr jŏt.

Knŭng tâm 2 khay bôk năm 2024, Krông pách lĕ kơp dơn 3 nuĭh khĭt yor ndrăng, lah nkuăl geh rnoh nuĭh ntưp ndrăng âk ngăn n’gor Dak Lak. Wa Y Doãn Niê, groi kruanh UBND nkuăl Krông Pách djôt dơn, trong kan njrăng n’gang ndrăng bah nkuăl mâp âk jêr jŏt yorr âk rnăk mât so eo mô tâm rgop đah ngih pah kan ntŭk kan tâm trong njrăng n’gang srê.

Nuĭh ƀon lan mât so eo ta nkuăl dŭt âk m’ơk lêng ta mir, cán bộ thú y âk tơ̆ tât chuh njrăng n’gang yơn rnăk wâl mô dơi nhŭp n’hanh ndra mô an chuh vaccine.

Ta nkual ƀon têh Buôn Ma Thuột mô lah âk ntŭk ta n’gor Dak Lak bah ƀon lan tât nkuăl têh, nkual ƀon têh mâp âk so eo hăn bah dih. Nău aơ geh âk nău mô lap đah nuĭh hăn trong. Yuh Trịnh Thị Hồng Hạnh, ta phường Tân Lợi, nkual ƀon têh Buôn Ma Thuột dŭt klach lĕ tă geh so kăp:

Tă aơ du pơh gâp hăn jâng hăn chợ, dôl hăn geh ndal ta trong luh du mlâm so. Rnôk nĕ gâp klach n’hanh rlơn bôk năp bah gâp lah nchoăt, yơn gâp lơ nchoăt, so lơ tĭng n’hanh janh lơn. Uănh saơ so m’ơk lêng lah gâp dŭt klach.

Rĭng du năm, Dak Lak geh nklăp 6.000 nuĭh geh so eo kăp hăn săm njrăng lor. Êng bah bôk năm tât aƀaơ, n’gor geh 4 nuĭh khĭt yor ndrăng.

Wa Đỗ Xuân Dũng, Groi Giám đốc N’gâng kan tuch tăm mât rong n’hanh hun hao ƀon lan n’gor Dak Lak an gĭt, nkô̆ nău dŭt âk bah srê ndrăng hao lah yor mô hŏ mât uănh mpôl so, eo; rnoh chuh vaccined ndrăng hôm e đêt, knŭng geh 37%. Nău êng nău kơt dŏng ăp trong rmal tih nău ntrŭnh mpeh mât uănh so eo, chuh vaccine ndrăng an so, eo mô hŏ rjăp.

Ntơm sa ơm mô hŏ saơ ntŭk kan êng nuĭh geh rmal nău an so eo kăp. Luật ri geh hôm he mô hŏ kơt dŏng. Bah meng nău nkoch trêng mbơh rblang mpeh trong kan njrăng n’gang ndrăng ri an ƀư tĭng rjăp trong rmal nău tih. Âk nuĭh ma mât rong so eo mô bvbư tĭng di nău ntrŭnh bah pháp luật n’hanh ƀư khuch jru ri ngih pah kan dơi kan dơi ntôn nău tih hinh sự đah nuĭh tơm mât rong tĭng nău ntrŭnh.

Tĭng wa Nguyễn Thiên Văn, Groi Kruanh UBND n’gor Dak Lak, gay n’hŭch geh ntoh srê ndrăng kơt n’hŭch rnoh nuĭh khĭt ndrăng, ăp nău kan n’hanh n’gâng kan ƀon lan an rgum ăp nuĭh gay ƀư tĭng rjăp ăp trong nchrăp njrăng n’gang ndrăng ma n’gor lĕ an. Tâm nĕ, an n’hao trong kan mât uănh mpôl so; n’hao rnoh chuh vaccine njrăng n’gang ndrăng, nkre, ntrôl dăng tronbg kan nkoch mbơh an nuĭh ƀon lan wât kloh mpeh nău klach bah ndrăng. Wa Nguyễn Thiên Văn an lah, nău wât n’hanh râng bah nsum mpôl lah nău khlay an nău lôch uĕh tâm trong kan njrăng n’gang.

Ăp ntŭk mât uănh nkoch trêng rgŏ jă nsum mpôl ƀon lan gay n’hao nău wât bah nuĭh ƀon lan mpeh nău klach bah ndrăng đah kon nuĭh. Nuĭh mât rong so, eo tĭng nău chuh vaccine njrăng n’gang ndrăng an mpôl so, eo. Rnôk geh so eo kăp an tât ngih pah kan dak si but uănh, săk ngăch.

Dak Lak dôl tâm rnôk duh phang, lah nău dơh an ndrăng ta mpôl so, eo ntoh, ƀư klach tât nău rêh kon nuĭh. Yor nê, ndrel đah nău lăp dŭt n’hâm bah ăp ngih pah kan dơi kan, nuĭh ƀon lan n’hao nău wât njrăng n’gang kop ji gay n’hanh bah ndrăng./.