- Tât nar 23/10 lam ntŭr neh hŏ năl geh 628 rkeh nuĭh ntưp COVID-19, tâm nê geh rlău 6,5 rkeh nuĭh khĭt tă bah COVID-19. Âk dak năl geh tay ăp njêng săk mhe bah kaman SARS CoV-2 đah rnoh ntưp rêng ngăch rlău ăp njêng săk bah năp nê nơh.

- Tĭng tiến sĩ Fahad Razak, du hê nuĭh rnâng kan Canada mpeh nuh srê COVID-19 an gĭt, ăp njêng săk bah kaman corona way ntoh du bông khay djang n'hanh khay sial puh, jêng tât nău hao âk rnoh ntưp n'hanh khĭt. N'hanh trong rƀŏng dja mbra hôm geh tay du tơ̆ tâm năm aơ đŏng. Tiến sĩ Fahad Razak lah rjăp, lah he mô saơ du rlong tât ntưp mhe tâm khay COVID-19 hô, ri ăp nuĭh rnâng kan mbra mbơh dŭt bah nuh srê tâm khay năm mhe.

- Gay nsrôih tay rơh rdâng lơh nuh srê COVID-19  dôl ta rơh jăch ndăn, WHO njrăng đă 6 trong kơl an ăp dak lăp kan nsum. Lor bôk năp lah ntuh kơl an chuh n'gang ăp tŏng 100% an nuĭh geh ma nău ntưp dŭt hô. Bar lah ŭanh năl tay n'hanh rblang rêng gen kaman gay groi nđôi ăp njêng săk mhe, n'glăp rgum rhŏ dŏng groi nđôi n'hanh uănh năl SARS-CoV-2 đah ăp nău ji trong n'hôr n'hâm êng ƀa ƀă, lĕ ma kop siăk. Pe lah đăp mpăn geh du trong mât chăm sơch nuĭh ji COVID-19, n'glăp rgum tâm ăp trong mât chăm n'hâm suan bôk năp; njêng trong nchrăp an ăp rơh ntoh luh đah nău nchrăp mpeh ndơ dŏng kan dak si n'hanh tơm nuĭh  kan. Puăn lah mât ăp trong njrăng n'gang n'hanh mât kân bah ntưp kaman ta ntŭk kan dak si. Lôch nê, ăp chính phủ ân tâm ôp kloh đah nsum mpôl mpeh ăp nău rgâl tâm trong kan njrăng n'gang nuh srê COVID-19.  

- Ta Việt Nam, nchih rgum bah Bộ y tế, ntơm bah bôk khay 10 tât nar 24/10, Việt Nam năl geh bơi 22 rbăn nuĭh ntưp COVID-19 mhe, rĭng geh mô hŏ tât 1 rbăn nuĭh/nar, hŭch rlău n'gul đah khay 9. Kơp tât nar 23/10 lam dak hŏ chuh geh bơi 262 rkeh vaccine njrăng n'gang nuh srê COVID-19.

- Lah ta rnôk rđău đă Tâm nchră n'hao dăng pah kan njrăng n'gang nuh srê n'hanh pah kan chuh n'gang vaccine COVID-19 ƀư tâm nar 20/10 mhe aơ, Thứ trưởng Bộ Y tế Nguyễn Thị Liên Hương dăn đă ăp n'gor ŭanh khlay an ƀư tay trong njrăng n'gang nuh srê tĭng nău rđău đă bah Chính phủ, Thủ tướng Chính phủ n'hanh tĭng nău ntĭm nti bah Bộ Y tế, ăp n'gâng kan geh tât. Tĭng ƀư jăp, lĕ n'hâm suan, ăp kôp ăp trong njrăng, n'gang nuh srê; lơn lah ntrôl ngăch chuh tay vaccine nuh srê COVID-19, pơk uănh ăp tŏng lôch jêh geh chuh ta lam trong chuh n'gang n'hanh nkoch trêng nău lư n'hao nău dơn kan, nău gĭt êng bah nuĭh ƀon lan, nsum mpôl… lơn lah rnôk khay sial puh dôl tât dăch geh ma nău hao âk rnoh nuĭh ntưp n'hanh lăp nhih dak.

- Ta Dak Lak, nô nău nuh srê COVID-19 tâm khay 10 geh trong rƀŏng hŭch mpeh rnoh âk nuĭh ntưp. Kơp tât nar 24/10 n'gor năl geh bơi 200 nuĭh ntưp, hŭch rlău 1 n'gul rđĭl đah khay 9. Dŭt njrăng, geh du đêt nar tâm khay 10, Dak Lak mô năl geh nuĭh ntưp COVID-19 mhe. Yơn lah, khay 10 n'gor geh 2 hê nuĭh khĭt tă bah COVID-19 đŏng, lĕ 2 nuĭh ji dja hŏ ranh da dê, ơm geh âk nău ji tâm săk n'hanh mô hŏ chuh vaccine nuh srê COVID-19.

- Pah kan chuh vaccine nuh srê COVID-19 hôm dơi n'gâng kan dak si Dak Lak an ƀư lĕ n'hâm suan tâm khay 10 đŏng. Kơp tât nar 20/10, Dak Lak hŏ đăp mpăn nkrum lam n'glai 1,2 an rmôt ntơm bah 12 năm deh let lơ. N'glai 3 an rmôt 18 năm deh  let lơ geh tât 87,2% n'hanh n'glai 4 geh rlău 70%. N'glai 3 an rmôt ntơm bah 12 năm deh let lơ geh bơi 75%. Dak Lak hŏ chuh nkrum  lam n'glai 1 an kon se ntơm bah 5 tât 11 năm deh n'hanh n'glai 2 an rmôt dja geh tât bơi 56% đŏng. N'gor mât tay ăp trong njrăng, n'gang nuh srê COVID-19 đah 03 n'gâng tơm lah: uănh năl mham, an gŭ rgum êng, săm ji. Nkre đă ăp n'gâng kan, nsum mpôl, ăp nhih pah kan đơn vị, nhih pah kan n'hanh nuĭh ƀon lan ndrel kan, tĭng ƀư jăp tay nău mbơh njrăng lor 2K n'hanh tĭng jăp ăp nău mbơh mpeh njrăng, n'gang nuh srê COVID-19 tâm nô nău mhe bah nhih pah kan dak si ăp gưl: