VOV4.M'nông: Dơi saơ ntưp ta Trung Quốc kêng dŭt năm 2019, Covid-19 ngăch jêng nuh srê têh ƀư lam ntŭr neh rsêng rsăng. Tât aƀaơ, nuh srê hŏ lơh rlău 6,5 rkeh nuĭh khĭt tâm rnoh rlău 600 rkeh nuĭh ntưp.  

Lam ntŭr neh ân tâm rlong gay njêng ăp ntil vaccine n'hanh trong săm gay bah ir jêng nău ji jru n'hanh khĭt tă bah njrăng n'gang COVID-19. Nơm geh ăp nău nsrôih nê, aƀaơ hŏ geh ăp nău mpơl uĕh an saơ lam ntŭr neh hŏ mât kân dơi nuh srê.  

Yơn lah, geh ma nău ntoh ăp njêng săk mhe bah kaman SARS-CoV-2 hôm ta nê đŏng. Yor kơt nê̆, ăp dak  ân chuh tay vaccine ăp tŏng an ăp rmôt nuĭh geh ma nău ntưp âk n'hanh uănh năl tay gay mât kân bah nău ntưp rêng bah kaman. Tĭng nhih pah kan dak si lam ntŭr neh, khay 10 dja ăp nuĭh rnâng kan bah Nhih pah kan mbra n'glêh an gĭt nuh srê njrăng n'gang COVID-19 hôm nha lah nkô̆ nău jăch ndăn lam ntŭr neh đŏng lah mô.

Rlău rơh krit nji n'hanh âk rngot klâng bah nuh srê njrăng n'gang COVID-19, tât aƀaơ Việt Nam hŏ mât kân dơi nuh srê n'hanh lăp tâm rơh mhe "bên di đăp mpăn, ngăch rplăch, mât kân geh nău tam nuh srê Covid-19". Bah meng nău pơk hvi tay săk nuĭh chuh nkrum lam vaccine nuh srê Covid-19, chuh n'glai 3, 4...gay njêng jâng nsing nâp, dak he pơk lhoi mbrơi ăp trong rdâng lơh nuh srê gay tâm di lơn đah nô nău mhe, rgop nta trong dơh dâk hao tay wăng sa.

He hŏ ntlơi nău mbơh ngăch dăng n'hâm suan, nkre, mô nchâp đă mpăng rgum âk nuĭh n'hanh gŭ srang ngai. Dŭt mhe aơ lah nău rgâl mpeh nău way nchâp đă wăn bok put mbung ntŭk âk nuĭh gŭ. Ntơm nơh, bok put mbung kơt lah ndơ mô dơi ƀah rih đah săk nuĭh ƀon lan rnôk ăp tơ̆ luh bah dih jay ri aƀaơ hôm du đêt nuĭh n'hanh du đêt ntŭk hôm nchâp đă ân wăn bok put mbung gay njrăng n'gang nuh srê Covid-19 dơm. Nău mbơh njrăng lor 5K dơi rgâl jêng 2K + (bok put mbung + puh nkhĭt kaman + vaccine + dak si + săm ji + công nghệ + nău gĭt êng bah nuĭh ƀon lan…)

Dak he hŏ an chuh rlău 258 rkeh dĭng vaccine njrăng n'gang nuh srê Covid-19 n'hanh lah ngoăy tâm ăp dak geh rnoh âk dĭng vaccine n'hanh rnoh nkrum vaccine âk lam ntŭr neh. Nơm geh rnoh nkrum lam vaccine âk, he hŏ ntrôl rŭch dơi nuh srê. Yơn lah, đah nău ntoh bah ăp kaman njêng săk mhe tĭng trong rƀŏng hao ntơm mpơl kloh bah khay 7/2022. Tâm rnôk ăp khay bah năp nê rĭng ăp nar dak he hŏ năl geh 500-700 nuĭh ntưp ji, ri tât khay 7 rnoh dja hŏ  hao tât 1.000 nuĭh n'hanh tât aƀaơ lah nklăp 2.900 nuĭh. Rđĭl đah khay 7, rnoh nuĭh ntưp mhe nuh srê Covid-19 tâm khay 8 hao 2,4 tơ̆, geh 24 nuĭh khĭt hao 18 nuĭh.

Rnoh nuĭh ji jru, rnoh nuĭh khĭt geh trong rƀŏng hao âk đŏng. Ntơm bah bôk khay 9  tât aƀaơ, dơn geh 2 nar dak he mô geh nuĭh khĭt tă bah nuh srê Covid-19 dơm, hôm ƀa ƀă ăp nar geh 1-2 nuĭh, êng geh nar tât 5 nuĭh khĭt. Bộ Y tế njuăl mbro ăp si ƀŭt đă ăp n'gor ntrôl ngăch chuh vaccine, n'hao ăp trong nkra hŭch bah âk nuĭh khĭt…

Ta Dak Lak, nô nău nuh srê Covid-19 tâm bah ri aơ geh âk nău tât krit nji đŏng. Tĭng nchih rgum bah Ntŭk mât kân kop ji  n'gor Dak Lak, êng tâm quý 3, n'gor hŏ năl geh rlău 1.300 nuĭh ntưp Covid -19. Dŭt njrăng, rnoh nuĭh ntưp hao ngăch tâm khay 9, tâm khay 9 Dak Lak năl geh 4 nuĭh khĭt tă bah nuh srê Covid-19 đŏng.  

          Gay nking nchăng trong ntưp rêng ngăch bah nuh srê Covid-19, Dak Lak hŏ ntrôl dăng pah kan nkoch trêng nău lư tâm ban kơt chuh ngăch vaccine njrăng n'gang nuh srê Covid-19 an ăp nuĭh đŏng. Tĭng nê, tât nar 25-9, Dak Lak hŏ chuh nkrum lam n'glai 1 vaccine njrăng n'gang nuh srê Covid-19 an rmôt nuĭh ntơm bah 5 năm deh let lơ. N'glai 2 n'hanh n'glai ntop chuh tay rơh 1 an nuĭh ntơm bah 12 năm deh let lơ geh âk rlău mô lah dah  rnoh rĭng geh nsum lam dak đŏng. Yơn lah, rnoh âk chuh nkah tay tâl 2 an rmôt rlău 18 năm deh n'hanh n'glai 2 an kon se ntơm bah 5 tât bah  dâng 12 năm deh hôm mbrơi n'hanh rnoh tât geh đêt lah 66% n'hanh 44% dơm.  

Tâm nar 24/9 mhe aơ, Ủy ban nhân dân n'gor Dak Lak hŏ ƀư rơh rgŏ jă trong kan nkoch trêng njrăng n'gang nuh srê Covid-19 tâm nô nău mhe đah nkô̆ "Yor an du Việt Nam ngăch dăng" n'hanh chuh n'gang vaccine njrăng n'gang nuh srê Covid-19 an kon se ntơm bah 5 tât bah dâng 18 năm deh. Ta rơh lễ rgŏ jă, kruanh rđău kan n'gor Dak Lak lah rjăp, n'gor nsrôih tĭng ƀư tay ăp trong njrăng, n'gang nuh srê Covid-19 đah 03 n'gâng tơm lah: uănh năl, an gŭ rgum êng, săm ji. Nkre đă ăp n'gâng kan, nsum mpôl, ăp nhih pah kan đơn vị, nsum mpôl n'hanh nuĭh ƀon lan ndrel dâk kan, tĭng ƀư jăp tay nău mbơh njrăng lor 2K lah: Wăn bok put mbung, puh nkhĭt kaman nkre đah chuh vaccine, dak si, pah kan săm ji, dŏng công nghệ, nău gĭt êng bah nuĭh ƀon lan n'hanh ăp  trong nkra êng ƀa ƀă. Ndrel đah nê kuăl jă lam ƀon lan râng chuh vaccine njrăng n'gang nuh srê Covid-19, rgop ntrôl ngăch rnoh chuh n'gang an kon se ntơm bah 5 tât bah dâng 18 năm deh.

VOV.VN

Nuĭh rblang: Điểu Thân