Gay ntroh n'gôr, rgŏ jă n'hanh nkah gĭt ăp nău rgop bah rmôt nai dak si, dơi geh nău ŭch an bah Ban Tuyên giáo Trung ương, puăn nhih pah kan báo chí lah: Báo Nhân Dân, Đài tiếng nói Việt Nam, Đài truyền hình Việt Nam, Thông tấn xã Việt Nam hŏ kan nsum đah Bộ Y tế - ƀư bôk nău kan- mâp măt, nkah gĭt cán bộ dak si- nkhêp geh nar nai dak si Việt Nam 27/2.

Bôk nău kan dơi ntơm pơk ma nău mpât mprơ bah ăp nghệ sĩ Nhà hát - Đài Tiếng nói Việt Nam mprơ rnê ƀon tơm, neh dak n'hanh ăp nău rgop bah ăp nuĭh tahen ao n'glang dôl nar măng mât chăm n'hanh n'hao ngăch dăng n'hâm suan ƀon lan.

Ntơh măt kruanh rđău kan puăn nhih pah kan báo chí, wa Lê Quốc Minh, Ủy viên Trung ương Đảng, Tổng Biên tập Báo Nhân Dân, Groi kruanh Ban Tuyên giáo Trung ương, Kruanh Hội Nhà báo Việt Nam hŏ njuăl ăp nău mbah rhơn dŭt uĕh lăng tât ăp kruanh rđău kan Bộ Y tế, kruanh rđău kan ăp đơn vị mpeh nhih pah kan nkhêp geh 68 năm Nar nai dak si Việt Nam, mbah rhơn rmôt nai dak si nsĭt tay âk nău dơi, lah ntŭk nsing nâp an nuĭh ji n'hanh ƀon lan lam dak.

Nkah tay ăp rơh rdâng lơh nuh srê Covid-19 krit nji n'hanh ntul rlong pe năm aơ, wa Lê Quốc Minh lah kloh: Tâm rnôk nê hŏ geh mô gĭt dah âk nău kan uĕh lŏng, nău mô sŭch lach, nuih n'hâm rŏng nuĭh bah rmôt cán bộ n'hanh nuĭh kan dak si mô kă rnam krit jêr, mô dơn nê klach rvê tât săk khĭt rêh, khân păng hôm nchŏl săk, hăn lor lăp tâm nklang nuh srê đŏng, mâp đah ăp nău tât rmoh rman mpeh he, lĕ nuih n'hâm rhŏ dŏng, mât chăm nuĭh ji tâm ăp ntŭk an gŭ rgum êng, ăp nhih dak si manh ƀư....N'hanh hŏ geh cán bộ dak si roh nkre mô hôm plơ̆ sĭt. Nuĭh ƀon lan lam dak hŏ nchih nkah n'hanh gĭt ăp nău rgop dŭt têh kuâng nê. Lôch nuh srê Covid-19, n'gâng kan dak si dôl mâp dŭt âk jêr jŏt, kŏ kol. Nê lah nău mô tŏng dak si, ndơ dŏng kan dak si; khoah mpeh prăk kaih an nhih dak si ngih dak; trong kơl đah cán bộ dak si mô hŏ tâm di jêng geh tât âk nuĭh rlu kan:

"Đah nău khlay lah ăp nhih pah kan báo chí tơm, Báo Nhân Dân, Thông tấn xã Việt Nam, Đài Truyền hình Việt Nam, Đài tiếng nói Việt Nam mbra rong an lor mpeh nău nkoch trêng pah kan mât chăm n'hâm suan ƀon lan, mpeh ăp nău kan bah n'gâng kan dak si, bah ăp nai dak si".

Bôk nău kan dơi nthoi đah tâm nchră geh nkô̆ "Nsrôih yor an n'hâm suan ƀon lan- Dak si rlău dơi jêr jŏt". Nê lah nău nkoch bah Groi Giáo sư, Tiến sĩ, Thầy thuốc nhân dân Nguyễn Viết Nhưng, Giám đốc ơm Nhih dak si klơm soh Trung ương ndrel băl kan ndrel geh Nkhôm rnê Hồ Chí Minh đah rkŭm ndơ "Gŭ mĭn kơt dŏng kỹ thuật têh blău mhe - tâm nău nchroh, săm ji trong n'hôr n'hâm" n'hanh joi trong hăn tât dŭt bah nău ji hiăn. Nê lah ăp nău tă ơm gĭt rdâk njêng lam rêng kan dak si tâm dâng, njrăng n'gang geh nău tam n'hanh n'hao săk blău rhŏ dŏng, rƀŏng tât di nuih n'hâm nuĭh ji bah ăp bác sĩ chuyên khoa 1 Trần Phước Đoàn, Groi Giám đốc Ntŭk rgum mât kân kop ji- n'gor Tây Ninh, bác sĩ chuyên khoa 1 Phạm Thị Hồng Lam, Groi Giám đốc Trung tâm y tế nkuâl Nghi Xuân, n'gor Hà Tĩnh, bác sĩ Phạm Ngọc Dung, Kruanh nhih dak si xã Quảng Sơn, Trung tâm Y tế nkuâl Hải Hà, n'gor Quảng Ninh.

 Râng tâm nchră, kruanh rđău kan ăp nhih dak si Trung ương Huế, Nhi Trung ương, Nhih dak si 199- Bộ Công an, Nhih dak si Vinmec, Viện Huyết học- Truyền máu Trung ương hŏ nkoch nău mĭn rvê n'hanh ăp nău nsrôih rlău jêr jŏt lôch bah nuh srê Covid-19, mpeh nuĭh kan dak si rlu kan, mpeh mô tŏng dak si, ndơ dŏng kan, dak si puh rao, ndơ năp dŏng dak si. Groi Giáo sư, Tiến sĩ Trần Minh Điển, Giám đốc Nhih dak si Nhi Trung ương an gĭt:

"Nar ntri, Bộ Y tế n'hanh kruanh rđău kan ăp nhih dak si têh hŏ rgum hop jŏ tât 9h măng, he hŏ uănh năl dơi lah nău droh rklaih păng mbra ƀư lôch jêh mbrơi mbrơi tĭng kơn. Yơn lah, tâm nkô̆ nău gay ăp nhih dak si ngih dak dŏng kan uĕh lơn, di lơn, ri nê lah nău way trong kan mât dŏng êng tơm prăk".

Hôm Giáo sư, Tiến sĩ Phạm Như Hiệp, Giám đốc Nhih dak si Trung ương Huế ri lah:

 "Ăp jêr jŏt dja nklăp mpôl hên mbra dơi nkra bah, ntĭt kơt du luật but săm ji mbra dơi dŏng tâm năm 2024 yor tâm luật but săm ji nê hŏ geh dŭt âk ntŭk ma he hŏ nkra dơi ntĭt kơt mpeh rnoh khlay ndơ, rhŏ dŏng dak si, ntĭt kơt rgum bah nsum mpôl, tâm pă gưl, n'hanh ăp nkô̆ nău nê mbra kơl nkra dơi ăp nkô̆ nău kŏ kol ma n'gâng kan dak si dôl mâp".  

Lah ta rơh mâp măt, nkah gĭt cán bộ, nuĭh kan dak si, Thứ trưởng Rnâng kan Bộ Y tế- Đỗ Xuân Tuyên an gĭt: Let năp tay, Bộ Y tế rgum ƀư  lôch jêh soih aih trong kan an tâm di, nchâp đă nău way ƀư ăp trong nchrăp luật, rgâl mhe dak si rnă njrăng lor n'hanh n'hao ngăch dăng n'hâm suan. N'hao nău dơi mât bôk kan nhih dak si, săk tam but săm ji n'hanh nuih n'hâm, nău mbơh ngơi rhŏ dŏng an nuĭh ji. Ôp ŭanh tay ăp tŏng lam lĕ rngôch rhŏ dŏng dak si tĭng trong rƀŏng di, ăp tŏng, rgâl mhe trong trok tâm, nău way dŏng prăk kaih an nău kan dak si rnă njrăng lor… Bộ mbra ntrôl dăng rgâl dơh glêh siƀŭt, n'hao nău săk tam, nău dơi nkoch trêng , mbơh gĭt nău lư, lơn lah nkoch trêng trong kơl, njêng nuih n'hâm tâm ban ŭch bah lam rêh jêng kon nuĭh đah ăp trong n'glêh an, nău dâk kan tâm pah kan dak si./.