Srê duh rtoh luh mham rih dôl ntoh ta n’gor Dak Nông đah bơi 500 nuĭh ntưp. Tĭng uănh nđôi bah nău kan dak si, măch rhai dak hun hao tâm ăp ndơ dŏng mô mĭn tât kơt gri n’gâr dak bah quạt điều hòa, ƀư duh rtoh mham rih ntoh âk tâm rnôk duh hô. Tâm 5 khay bôk năm 2024, lam n’gor Dak Nông kơp dơn 463 nuĭh duh rtoh luh mham rih Dengue, hao rlău n’gul nkôp đah rơh aơ năm 2023. Kop ji rgum âk ngăn ta ăp nkuăl mpeh bah dâng lah Dak Song, Dak Rlâp n’hanh Nkual ƀon têh Gia Nghĩa.

Lơn lah ta Gia Nghĩa, tĭng groi nđôi bah n’gâng kan dak si, aƀaơ rnoh ntưp duh rtoh mham rih lĕ rlău 330 nuĭh/100.000 nuĭh ƀon lan, rlău 2,2 rnoh nking n’gang. Wa Êban Thanh Sơn, Groi Giắm đốc ntŭk uănh nđôi kop ji n’gor Dak Nông, mbơh nău rvê nuh srê duh rtoh luh mham rih mbra ntoh âk tâm ăp khay yan mih tât. N’gâng kan dak si dôl uănh nđôi tĭng nar gay năl nu nău nuĭh ji, nchrăp nuĭh kan, ndeh rklư, ndoh ndơ dak si nchrăp mkra ăp ntŭk srê.