VOV4.M'nông: Nkô̆ nău ma lam rêh jêng kon nuĭh uănh khlay aƀaơ lah gĭt dơi chuh lah mô n'glai vaccine kơi ntop tay an kon se n'hanh n'glai 4 an bu kuâng. Mhe aơ, Groi Thủ tướng Chính phủ Vũ Đức Đam đă Bộ Y tế ntĭm nti na nê̆ mpeh nău chuh vaccine kơi ntop tay; ƀư kloh jêng ăp nău tât ji lôch chuh; mô an geh mô tŏng dak si, ndơ năp dŏng kan dak si yor an ma nuĭh ji. Tĭng nău mbơh bah Bộ Y tế: mhe aơ, lam ntŭr neh, njêng săk mhe Omicron hŏ jêng rgâl săk tơm đah ăp nchah kon BA.2; BA.2.3, BA.2.3.2; tâm rnôk njêng săk nchah kon BA.5 hŏ năl geh ta âk dak geh ma nău lăp tâm dak he n'hanh jêng tât geh nău ntưp rêng âk COVID-19 tâm let năp tay. Ta Việt Nam, rnoh ntưp COVID-19 tâm bah ri aơ geh trong rƀŏng hŭch âk rnoh nuĭh ntưp mhe plơ̆ hao tay đêt tâm ăp nar rlău aơ ta du đêt n'gor, nkual ƀon têh. Yor kơt nê̆, ân tĭng ƀư tay ăp trong njrăng, n'gang nuh srê, chuh vaccine ntop n'hao tay, chuh nkah tay an ăp rmôt nuĭh geh ma nău ntưp n'hanh nkoch trêng tay gay nuĭh ƀon lan way gĭt njrăng, n'gang  nuh srê.

Dŭt njrăng, rnoh ngăch chuh vaccine njrăng n'gang COVID-19  hôm mbrơi, lơn lah chuh n'glai 3, n'glai an nuĭh âk năm deh n'hanh n'glai an kon se ntơm bah 5 tât 12 năm deh. Geh nău rmeh bưm âk vaccine COVID-19 ta Trung ương n'hanh ăp n'gor jêng tât geh ma nău ân tât ntlơi jăng lah mô ntrôl ngăch dơn vaccine n'hanh an ƀư chuh n'gang tâm let năp tay. Mbơh gĭt kloh lơn mpeh ăp  nkô̆ nău geh tât jêng nău ji lôch chuh vaccine njrăng n'gang COVID-19, Thứ trưởng Bộ Y tế Nguyễn Thị Liên Hương an gĭt: Tât aƀaơ Nhih pah kan dak si lam ntŭr neh n'hanh ăp dak năl lah vaccine lah du trong nkra dŭt tam gay njrăng, n'gang nuh srê COVID-19. I ngăn lam ntŭr neh, âk dak hŏ chuh vaccine njrăng, n'gang  COVID-19 n'glai 3, n'glai 4 an nuĭh ƀon lan. Rlău 80 dak n'hanh nkual neh hŏ an chuh vaccine an kon se ntơm bah 5 tât 12 năm deh n'hanh du đêt dak hŏ chuh an kon se ntơm bah dâng 5 năm deh:

“Aƀaơ mô hŏ geh ndơ an saơ khoa học năl lah vaccine COVID-19 khuch jŏ jong tât n'hâm suan nuĭh ƀon lan. Tâm rnôk nău tam bah vaccine hŭch ngăch, yor kơt nê̆, gay mât nău tam njrăng n'gang, ân chuh n'glai 3, n'glai 4 tĭng nău ntĭm nti bah Bộ Y tế. Chuh Vaccine njrăng COVID-19 gay đăp mpăn nău ŭch geh pah kan njrăng, n'gang nuh srê, yor kơt nê̆ nuĭh ƀon lan ân hăn chuh di nar khay, di rnoh”

Groi Thủ tướng Vũ Đức Đam dăn đă ăp n'gâng kan, ăp n'gor gŭ mĭn, ôp uănh nău tă ơm gĭt kan bah ăp dak tâm nău pơk hvi nuĭh chuh ntop tay (n'glai 3, n'glai 4), njŭr rnoh năm deh kon se dơi chuh vaccine. Groi Thủ tướng Vũ Đức Đam đă:

Bộ y tế ân dăp rgum tay ăp tŏng rêng ăp si ƀŭt ntơm nơh, geh si ƀŭt tŏng ăp na nê̆ gay ăp n'gor tâm ban ŭch dơn ngoăy nuĭh i dơi chuh moh n'glai chuh, n'hao dăng nkoch trêng, rgŏ jă nkoch mpeh ntil mhe mpeh nău tam bah vaccine mhâm ƀư chuh an đăp mpăn ta năp măt n'hanh jŏ jong. Ân mpơl dŭt kloh tâm si ƀŭt Bộ Y tế rnôk hŏ geh ăp nău rgop bah Bộ Y tế ăp nuĭh dơi chuh ri ân ntĭt leo lor ăp oh nô mpeh săk chuh tĭng rêng lah ân ntĭt leo lor./.

Nuĭh rblang: Điểu Thân