Vay tât ngih dak si Đa khoa nkuăl Tây Nguyên, wa Mai Thanh Nhàn, tâm xã Hoà Thắng, nkual ƀon têh Buôn Ma Thuột, n’gor Dak Lak nkoch, păng ŭch ngăn tât nau rgâl tâm nau đăng ký rnôk khám săm ji:

            ‘Rnôk aơ đăng ký khám săm ji nơih ngăn ndrel bah oi roh mông nar, Ntơm nơh lah bốc số jehe ri mât thẻ Bảo hiểm, jêh rnôk nai dak si lôch khám ri mơ hăn trok prăk ndrel sŏk thẻ bảo hiểm ri ma roh mông nar ngăn. Rnôk aơ, ƀư tĭng nau kan mhe aơ păng ngăch ngăn”.

            Nơih ngăn ân nŭih ji, nau kan ntrơn rgâl mrô hŏ geh Ngih dak si Đa khoa nkuăl Tây Nguyên ntrŭnh ƀư âk, kơt: đăng kí khám săm ji bảo hiểm y tế đah căn cước công dân geh chíp, pă hoá đơn điện tử, mô kâp ndŏ prăk măt, dăn mông, nar khám lor tâm máy...tĭng wa Nguyễn Trí Dũng, Kruanh Jrâu kan công nghệ thông tin, ăp nau kan hành chính công, rnoh ƀư nau kan dak si ndrel dŏng nau kan công nghệ thông tin kŏ geh nchih lir mbơh, kloh rvah:

            ‘Phần mềm mât ueh ngăn, nơih ân nŭih ji rnôk khám ndrel săm nau ji yor khân păng dơi geh huch nau leo săm ƀŭt hăn ndrel. Bah nê, ngih dak si kŏ tĭng dơi âk nau kan kơt lah nau tâm di, nau mbơh bah bảo hiểm y tế geh đăp mpăn”.

            Rnôk aơ, tâm du nar, Ngih dak si Đa khoa nkuăl Tây Nguyên ndơn bơi tât 1.500 tŏ nuih ji tât khám, ndrel rlau 1.600 nŭih ji geh săm gŭ tâm ngih dak si. Nai dak si Trịnh Hồng Nhựt-Groi Giám đốc Ngih dak si mbơh, ntrơn rgâl mrô hŏ leo nsĭt nau ueh ân ăp nau rgâl tâm nau kan:

            ‘Ngih dak si Đa khoa nkuăl Tây Nguyên hŏ ntrŭnh âk nau kan phần mềm lăp tâm nau dŏng ndrel dŏng tâm rnôk khám, săm ji ndrel săm kŏ kơt lah nau mât mpeh ăp ndoh ndơ dŏng gay leo nau săk tam ngăn kŏ kơt lah rgum gleh tay nau kan hành chính, pơk trong nơih ân nuih ji ndrel ueh nơih ân mông nar ân nai dak si âk lơn gay ma kơl an nŭih ji”.

            Wa Nguyễn Hữu Vũ Quang, Groi Giám đốc n’gâng kan dak si n’gor Dak Lak mbơh, mô êng ma nŭih ji tâm n’gor, ma nau kan ntrơn rgâl mrô dôl geh bư tâm lam ntŭk kan dak si bah n’gor. Ăp rmôt kan dak si dŏng phần mềm kơl an nau kan mât, khám săm ji, nau chuh n’gang...Phần mềm mât dạk si tâm dâng geh ƀư tât 185 ngih dak si xã, phường, nkuăl têh. Rnôk aơ, geh 21 rmôt geh nchrăp trong kan săch, mbơh nau khám, săm ji tă bah ngai. Ntŭk kan kŏ ntrŭnh phần mềm “nai dak si bah ăp ngih” gay rgâl nau ndơn nau kan dak si ân ƀon lan ndrel n’hao nau dơi, nau nâp nau kan bah ăp ngih dak tâm dâng.

            Wa Nguyễn Hữu Vũ Quang, mbơh, tâm rơh tât, ntŭk kan dak si Dak Lak lŏ rgâl mhe ntrong pah kan, n’hao nau tam, nau dơi tâm nau mât nkre lŏ ntrŭnh ân ngăch nau ntrơn rgâl mrô:

            “Tal bôk năp lah ndâk rmôt prăp mrô gay ma ma tă bah nŭih ji geh n’hâm soan điện tử bah ƀon lan gay ma mbơh ăp nau mbơh aơ tâm ntŭk mât prăk bah neh dak mô lah tâm ăp ntŭk khám săm ji; Tal bar lah hun hao ntrong kan mrô tâm nau kan dak si nŭih ƀon lan dŏng định danh điển tử tă bah VNEID rgum tâm trong kan mrô dak ri đah ntŭk mât bah neh dak; Tal pe lah pă mbơh nau kan trực tuyến ân ƀon lan ndrel rmôt kan, nsôih 100% nau kan lam ntrong ân tŏng, ăp nau kan hành chính”./.