Ta du nar yŭr mham tă bah Liên đoàn lao động  n’gor Lâm Đồng tâm rgop đah Hội chữ thập đỏ n’gor ta Đà Lạt, yuh Phạm Thị Hồng, đoàn viên công đoàn nău kan ntĭm nti gĭt saơ: aơ ;ah nău ƀư dŭt n’hâm khlay jêng an dơi mât uĕh n’hanh ƀư ƀa ƀơ lơn, wăch rgum tay âk nuĭh tâm nău rêh jêng râng:

 “Rnôk dơi dơn nău mbơh geh nar rgum yŭr mham ta ntŭk aơ ri oh nô nai ta ngih sam ƀŭt ŭch êng hăn râng, yŭr mham tâm nuih n’hâm dŭt uĕh. Gâp mĭn lah rgop du gưl jêt an nău rêh ri saơ dŭt lah răm”.

Wa Nguyễn Tấn Chờ lĕ geh 48 tơ̆ râng yŭr mham ŭch êng

Aơ lah ngoăy tâm âk nău ƀư ntoh lư geh tâm bôk nău kan tâm rgop đah Liên đoàn lao động n’gor n’hanh Hội chữ thập đỏ Lâm Đồng lvang 2019-2023, gay mât uĕh nău way ơm yŭr mham rhŏ an trong kan săm ndal, săm ji, nchrăp tâm ăp nău ndal, n’hanh tâm di nău ŭch tâm trong kan săm nuĭh ji.

Mhe aơ, Ban Ntĭm rđău rgŏ jă yŭr mham ŭch êng n’gor Gia Lai ƀư rƀŭn nchră n’glôch jêh trong kan yŭr mham ŭch êng năm 2022, mbơh ƀư trong nchrăp năm 2023. Tĭng nău bơh, năm aơ lam n’gor Gua Lai lĕ ƀư rgŏ jă geh 84 rơh yŭr mham ŭch êng, săk rnglăy wơt dơn rlău 18 rbăn đơn vị mham, geh 120% rnoh trong nchrăp dơi jao. Tâm nĕ, Ngih dak si đa khoa n’gor Gia Lai lĕ wơt dơn rlău 14.600 đơn vị mham n’hanh Ngih dak si Quân y 211 wơt dơn rlău 3.300 đơn vị mham. Geh 416 đơn vị mham ndal lĕ dơi pă ngăch an ăp ngih dak si gay săm ndal nuĭh ji. Wa Dương Đình Diện-Groi Kruanh ban rnâng kan Ban ntĭm rđău rgŏ jă yŭr mham ŭch êng, Kruanh Hội chữ thập đỏ n’gor Gia Lai, lah:

“Năm 2022 đah nău ntĭm rđău dŭt n’hâm bah UBND n’gor kơt ntĭm rđău rgŏ jă yŭr mham ŭch êngg ri rêng hvi tâm ntrong leo yŭr mham ŭch êng  dơi rêng hvi tâm rơh kơn nuĭh ƀon lan n’hanh nar lơ wăch rgum âk nuĭh râng ntrong leo yŭr mham ŭch êng. Mpôl hên mĭn âk nar tât rƀŏng tĭng ri mpôl hên nsrôih rêng hvi nău ƀư kơl nuĭh, yŭr mham kơl nuĭh gay nsum mpôl ƀon lan dŭt n’hâm râng ntrong leo yŭr mham ŭch êng tâm năm tât”.

Ta Dak Lak, Ban ntĭm rđău rgŏ jă yŭr mham ŭch êng n’gor lĕ ƀư rƀŭn nchră rnê rhơn nuĭh yŭr mham ntoh lư năm 2022. 52 nuĭh ntoh lư tâm ntrong leo yŭr mham ŭch êng lĕ dơi rnê rhơn rơh aơ. Aơ lah ăp nuĭh râng yŭr mham âk rơh tâm năm 2020 n’hanh 2021. Wa Nguyễn Tấn Chờ, deh năm 1967, ta thôn Tiến Thịnh, xă Quảng Tiến, nkuăl Cư M’gar, n’gor Dak Lak lĕ 48 tơ̆ râng yŭr mham an lah:

“Gâp saơ he an ƀư du đêt ndơ gay kơl an ăp nuĭh mâp mô lap tâm nău rêh. Tât aƀaơ gâp lĕ geh 48 tơ̆ yŭr mham n’hanh dăn yŭr an nuih klơm gay bah kơi aơ bôl gâp roh ri gâp n’glơi an du đêt neơ ndơ nĕ an nău rêh, an nuĭh êng. Yor ăp nuĭh kon tâm rnăk wâl gâp hăn yŭr mham n’hanh gâp ŭch njuăl đah ăp nuĭh, he lơi mĭn tih tâm nău yŭr mham khuch an săk soan ma yŭr mham ta aơ, bôk năp lah he kơl nuĭh, tal 2 lah pơng kơl săk he rgâl mham, săk jăn ngăch lơn mô geh khuch an săk soan”.

Du nar yŭr mham ŭch êng ta Lâm Đồng

Dak Lak lah ngoăy tâm 10 n’gor bôk năp lam dak mpeh ntrong leo yŭr mham ŭch êng. N’gor aƀaơ geh 200 Ban ntĭm rđău yŭr mham ŭch êng ăp gưl; 8 Câu lạc bộ rgŏ jă yŭr mham n’hanh yŭr mham nchrăp lor... Rĭng du năm n’gor geh nklăp 30.000 nuĭh dăn râng yŭr mham, wơt dơn rlău 20.000 đơn vị mham.

          Wa H’Yim Kđoh, Groi Kruanh UBND n’gor, kruanh Ban ntĭm rđău Yŭr mham ŭch êng n’gor Dak Lak an lah, dơi geh săk rnglăy aơ knơm tâm nău lăp dŭt n’hâm bah ăp nuĭh Ban ntĭm rđău rgŏ jă yŭr mham ŭch êng ăp gưl, ăp rmôt kan, ntŭk kan, ƀon lan n’hanh nău ƀư uĕh bah ăp nuĭh ŭch êng.

“Tâm khay tât kuăl jă tay rgŏ jă âk nuĭh râng yŭr mham âk lơn, n’hanh mpŏng lĕ rngôch ăp nuĭh ngăch dăng geh nău tât pă tât đah nuĭh ji. Aơ lah nău răm an lĕ rngôch nuĭh ji n’hanh he nsing nơm đah nău nsrôih âk bah lĕ trong chính trị ndrel đah lĕ rngôch ăp rnoi mpôl tâm n’gor Dak Lak mbra geh âk tâm pă mham an nuĭh ji gay nuĭh ji geh du nău rêh uĕh lăng lơn”.

Mhe aơ, ta nkual ƀon têh Buôn Ma Thuột lĕ ƀư hăn mbơh Câu lạc bộ rmôt mham mpêt RH- n’gor Dak Lak. Câu lạc bộ geh 3 rmôt đah 43 nuĭh, lah ăp nuĭh geh rmôt mham RH-, mpeh tâm nsum mpôl nuĭh geh rmôt mham mpêt. Aơ lah ntŭk rgum, tâm rnglăp ăp nuĭh gay ndâk njêng rmôt mham mpêt khar nchrăp lor, njêng geh nuĭh rmôt mham mpêt khar râng yŭr mham ŭch êng đăp mpăn.