VOV4.M'nông: Ơi kônh wa ndrel băl mpôl, du nau kan geh âk nŭih uănh rnôk aơ lah chuh đŏng lah mô vắc xin ntop tay ân kon se ntop nglai 4 ân nŭih teh. Mhe aơ, Groi Thủ tướng Chính phủ Vũ Đức Đam đă N’gâng kan dak si mbơh nau chuh vắc xin ntop, ƀư kloh nau khuch, mô ân mô tŏng dak si, ndơ dŏng kơl an nŭih ji. Tĭng nau mbơh bah N’gâng kan dak si: rơh rlau aơ, tâm lam ntur neh, srê O-mi-cron hŏ njêng săk ngăn đah ăp ntil êng BA.2; BA.2.3; BA.2.3.2; tâm rnôk nau njêng mhe BA.5 hŏ geh kơp dơn tâm âk dak geh nau mra lăp tât dak nơm ndrel mra ƀư jêng nau âk lơn nŭih ntưp srê Covid-19 tâm rơh tât. Việt Nam, rnoh nŭih ntưp srê Covid-19 tâm rơh rlau aơ n’huch yơn rnoh nŭih ntưp mhe ti lŏ hao tay tâm ăp nar rlau aơ tâm du đê̆ n’gor, nkuăl ƀon têh. Ndri ma, ân geh ƀư ăp nau kan njrăng, rdâng srê, chuh vắc xin n’hao ntop, nkah tay ăp nŭih mra geh nau ntưp ji ndrel lŏ nkoch mbơh gay ƀon lan n’hao nau njrăng, rdâng.

            Nau ngăn lah, nau chuh n’gang vắc xin srê Covid-19 hôm mbrơi, ngăn lah chuh nglai 3, nglai ân bu têh ndrel kon se ntơm 5 tât tâm dâng 12 năm. Geh nau hôm rmeh âk vắc xin Covid-19 tâm Trung ương ndrel ăp nkuăl ƀư nau rlau năm dơi dŏng lah mô ƀư ndơn vắc xin ndrel chuh tâm rơh tta. Mbơh kloh lơn mpeh nau kan geh tât nau khuch bah chuh vắc xin njrăng srê Covid-19, Kruanh n’gâng kan dak si Nguyễn Thị Liên Hương mbơh: Tât rnôk aơ, ntŭk kan dak si lam ntur neh ndrel ăp dak kŏ năl vắc xin lah nau kan tam ngăn gay ma njrăng, rdâng srê Covid-19. Tâm lam ntur neh, âk dak hŏ chuh vắc xin njrăng srê Covid-19 nglai 3, nglai 4 ân ƀon lan. Rlau 80 neh dak ndrle nkuăl neh hŏ ntrŭnh chuh vắc xin ân kon se ntơm 5 tât tâm dâng 12 năm ndrel du đê̆ dak chuh ân kon se tâm dâng 5 năm:

            ‘Rnôk aơ ê geh nau mpơl mbơh mpeh khoa học lah vắc xin Covid-19 khuch tât jŏ jong tât n’hâm soan ƀon lan. Tâm rnôk nau tam bah vắc xin n’huch ngăch, ndri ma, ân geh mât jŏ jong, ân geh chuh nglai tal 3, nglai 4 tĭng nau ntĭm bah N’gâng kan dak si. Chuh vắc xin njrăng srê Covid-19 gay đăp mpăn nau đă bah nau kan njrăng, rdâng srê, ndri ma ƀon lan ân geh chuh tâm di nar, tŏng ăp nglai”.

            Groi Thủ tướng Vũ Đức Đam đă ăp n’gâng kan, nkuăl mĭn, kơl djăt tĭng ăp nau blau bah ăp dak tâm nau pơk hvi ăp nŭih geh chuh ntop tay (nglai 3, nglai 4), n’huch năm deh kon se geh chuh. Groi Thủ tướng Vũ Đức Đam, đă:

            ‘N’gâng kan dak si ân geh nau mbơh ma săm ƀŭt bah năp nơh, geh nau mbơh ân tŏng ngăn n’hêl ân ăp n’gor tâm ban moh nŭih geh chuh moh nglai, n’hao nau nkoch trêng bonh đă ngăn lah mpeh ntil njêng săk mhe mpeh nau tam bah vắc xin mhâm ƀư ân geh đăp mpăn bah năp măt ndrel jŏ jong. Ân geh ƀư kloh đah nau ntrŭnh mbơh bah N’gâng kan dak si hŏ geh ăp nau đă bạh N’gâng kan dak si ăp nŭih geh chuh ân geh leo lor bah ăp nŭih tâm nau geh chuh lah ntrong kan lah ân geh leo ntrong”./.

Nŭih rblang: H’Thi