VOV4.M'nông: Ta nkual Tây Nguyên, nuh srê Covid-19 dôl hao ngăch ta Dak Lăk n'hanh Lâm Đồng. Tĭng Ntŭk rgum mât kân kop ji ta n'gor Dak Lăk, tât 4h kêng măng 21/02, lam n'gor năl geh 988 nuĭh ji Covid-19 mhe n'hanh 3 nuĭh khĭt. Kơp tâm 1 pơh dŭt mhe aơ, Dak Lak năl geh rnoh nuĭh ntưp dŭt âk bah ntơm tât aƀaơ đŏng, đah 4.145 nuĭh.

Lĕ rngôch kon se mầm non n'hanh kon se nti ntơm bah jrô 1 tât jrô 6 hŏ rlu nti na nê̆ ta nhih nti, plơ̆ nti tay pơk sŏng dăng bah ngai n'hanh ăp trong kơt nti êng ƀa ƀă. Ta Lâm Đồng, nuh srê Covid-19 hao âk đŏng, đah 2.364 nuĭh ntưp tâm pơh aơ, tâm nar 21/2 geh tay 3 nuĭh khĭt. Sở Y Tế Lâm Đồng hŏ geh si ƀŭt rđău đă ntŭk rgum kan dak si ăp nkuâl, nkual ƀon têh tâm n'gor nsŏng kơl an UBND pơk tay nhih dak si manh ntăm ƀư, njêng ăp rmôt mât chăm nuĭh ntưp Covid-19 ta ƀon lan gay kan nsum đah n'gâng kan dak si uĕh an ăp nuĭh ji./.

Nuĭh rblang: Điểu Thân