Ta Dak Lak, nuh srê ji luh mham rih dôl ntoh hô, nuĭh ƀon lan nha hôm uănh lhơ pah kan njrăng n’gang nuh srê đŏng. Tĭng rnoh nchih rgum bah Ntŭk rgum mât kân kop ji n’gor Dak Lak, ntơm bah bôk năm tât aƀaơ, lam n’gor năl geh 1 rbăn nuĭh ntưp ji luh mham rih, tâm nê geh 1 hê nuĭh khĭt.

Rnoh nuĭh ji luh mham rih năl geh ntoh ntơm bah khay 7 tât aƀaơ lah bơi 500 nuĭh, dah lĕ rngôch rnoh âk ntưp ta n’gor tâm 6 khay bôk năm. Tâm rnoh nê, mô đêt nuĭh ji lăp nhih dak si dôl tâm nô nău ji luh mham rih jru, geh nău mpơl nkah njrăng lor. Pe nkuâl geh rnoh nuĭh ji luh mham rih dŭt âk lah nkuâl Ea H’Leo, nkuâl Ea Kar n’hanh nkual ƀon têh Buôn Ma Thuột. Wa Hoàng Hải Phúc, Groi giám đốc mât ŭanh Ntŭk rgum mât kân kop ji n’gor Dak Lak an gĭt, nkô̆ hao âk rnoh nuĭh ntưp ji luh mham rih ta n’gor lah tă bah nuĭh ƀon lan hôm ŭanh lhơ, thơ tha tâm pah kan njrăng n’gang. Rnôk ntưp ji way hăn rvăt êng dak si ngêt săm ta jay, ƀư nău ji  lơn ma jêng jru jêr săm, geh ma nău khĭt âk./.